السلام عليكم ورحمة الله وبركاته
تدرون زوجي قبل كان انسان وبعد ماتزوج صار كائن فضائي جاي من كوكب المريخ او يمكن من كوكب القرده:hahaha:
تدون كيف راح اعلمكم هاذي ام زوجي من تزوجنا وهي كل ماشافت زوجي قالت له انت قبل شئ والحين شئ وراح اذكرها لكم في نقاط
1- ام زوجي تسئلني تقول بدر <<--ترى موب اسم زوجي بدر بس نرمز له كذا >> تقول بدر وجهه موب زين ماياكل ارد انا اقول الا يأكل ومافيه الا العافيه ردت علي ينوع بالالأكل والا يأكل رز بس قلت لا ننوع مره رز مره معكرونه واللي موجود نسويه ردت علي قالت زاد وليدي وجهه مو عاجبني الواحد اذا جاء تعبان يبي رز علشان ينفعه موب مكرونيه << هي تسميها كذا>> سوي له كل يوم رز خل ترد صحته ,, مع العلم ان زوجي جسمه ملياان موب معصقل ,,,,,,,,, بعد هالسالفه يمكن بشهرين او اكثر رجعت جابت هالطاري قلت والله اغلب الايام رز قالت هاااااو مايأكل الا رز حرام عليس بيبس بطنه وبيتعبه وهالرز ما منه فايده لازم يأكل خضار وينوع بالأكل ,,,,,,,,,لاحول ولاقوة الا بالله اطلعي من مخي وش تبيني اسوي لك قلنا كذا مو عاجب وكذا مو عاجب,,,,,,,,
2- مره كانت ام زوجي عندنا وجالسين نتقهوى وهي ماتشرب قهوه علشان القولون المهم جلست تزن فوق راسه خلاص لاعاد تشرب قهوه وش تبي بها من تزوجت وانت تشفط بها القهوه قبل ماتتزوج ياحليلك فنجال واحد ويككفيك ,,,,,,,,, ومره كنا عندها وحلفت هي الا تسوي القهوه وجلسنا نتقهوى حط زوجي فنجاله قال بس قالت بعد واحد قال لا خلاص قالت ايييه من تزوجت وانت ماعاد تبي قهوتنا ماعاد يعجبك الا قهوة حرمتك >>> الحين مو قبل تقولين لا تشرب قهوه موب زينه كثرتها والحين تبينه يشرب<<عجـــايب
3- مره متجمعين خواته وانا كنت جالسه معهم سئلتني من بين حريم عيالها بدر وينه قلت طالع قالت والله ها الولد ماخذ قلبي من تزوج وهو مو عاجبني وجهه فيه شئ ,,,,,,,,,,,قلت مافيه الا العافيه ان شاء الله ,,,,,رجعت قالت قبل مايتزوج بسم الله عليه سيارته ماتتحرك الا للدوام ومايطلع الا للمسجد وينوم بدري ومن تزوج وهالسياره ماعاد توقف كل شوي طالع ورايح ثم تلتفت علي هو وين يروح قلت للأستراحه مع عيال عمه رجعت قالت الله يستر وتعيدها اول وش حليله عند التلفزيون لا يطلع ولا شئ ,,,>> وش رايك يا خاله اربط سلسله من رجله لباب الشارع علشان مايقدر يتعدى باب الشارع << طيب والباقين موب عيالك ,,,,,,,,,,
4-نزل زوجي عند امه ولقى اخوه عندها قال لاخوه وصلني للورشه ابي اطلع سيارتي طلع زوجي مع اخوه بعدها بيومين وكانو سلفاتي كلهم فيه قالت طلعت سيارت بدر قلت لها ايه قالت عساها ماكلفت قلت لا شئ بسيط رجعت قالت والله ماخرب هالسياره الا كثرة الروحات والسفريات قبل مايتزوج هالسياره ماطلعت من الرياض والحين تعدت وراحت اكيد بتخرب,,,, وانتي ماتروحي الا للأسواق البعيده تتعبون السياره ,,,,,>> طيب السياره ليش مصنوووعه << وعلى فكره اخووه رايح لدبي بسيارته وعلى قلبها مثل العسل
5-نفس الشئ جالسين مع خواته دخل علينا زوجي وهو لابس بدله وجلسوا خواته اللي تمدح البدله عليه واللي تعلق عليه وبعد ماطلع قالت بدر اول مايعرف لا بدل ولا جنوز انا مربيتهم على الثياب بس من يوم تزوج وطايح بها اللبس ,,,<<عمركم شفتوا احد يلعب كوره بثوب <<
6-مره قال لي زوجي مشتهي العشاء سمك قلت اوكي سويت سمك مع رز وقال ابتصل على امي تجي تتعشى معنا قلت خلاص واحسب حسابها في العشاء لانها مسويه حجب ماتأكل اي شئ وبعد ماحطيت السفره وجلسنا نتعشى ونسولف سئلها زوجي قال عسى السمك عجبك قالت ايه وانت قال ايه زين قالت نسيت طبخي ومدحك قبل ماتتزوج ,,,,>>>على فكره زوجي قبل مايتزوج كان زبون دائم للمطاعم يقول اتذكر طبخ امي قبل ماتتزوج اختي واخته صار لها 8 سنين متزوجه <<
7- زوجي سوى عملية بواسير قبل سنه تقريبا طبعا مستحيل يمر هالحدث من دون تعليقاتها جلست تقول البواسير ماتجي الا من سوء التغذيه ويمكن انك تنشفين الرز مرره علشان كذا اتعبه وجاه بواسير ماجته من قبل لا يتزوج ,,,,,>>سلامات الله يطول بعمرك شايفتني اوكل ولدك حصى علشان تقولين سوء تغذيه << على فكره البواسير فيه من قبل لايتزوج بس ماسوى العمليه الا بعد الزواج
8-زوجي بعد الزواج سمن شويتين لا والله كثير مو شويتين وكنت جالسه مع خواته ويتكلمون عن السمنه وانهم ودهم ينحفون قالت هي لناتها ايه والله وش تبون بالسمنه حاولوا تنحفون اخف لكم اذا جيتوا تشتغلون في بيوتكم وتناظرون عيالكم قمت انا من لقافتي قلت ايه والله بدر الحين يحاول ينحف ويرجع مثل اول انا قلتها والا ماقلتها ردت علي بعصبيه قالت هاااو بدر يسوي رجيم قلت يعني يخفف من الاكل مو مثل قبل قالت زاد وانا كل ماشفته اقول وشفي وليدي وجهه اصفر كنه ليمونه معصوووره وجهه قبل لايتزوج قمر كامل ,,,,,,<< ,,,, مو توك تنصحين بناتك علشان ينحفوون
9- في بيت وحده من خواته جالسين قام زوجي وقال يالله تصبحون على وقال لي انا في السياره انتظرك اخته تحاول فيه بدري اجلسوا وهو طلع ومارضى يجلس قالت اخته يمكن فيه النووم ينوم بدري هو قلت لا ما ننام الا بعد صلاة الفجر وقالت خالتي بصوت متفاجئ ماينام الا الفجر ليش قلت ماعنده دوام الا الساعه 2 الظهر ومن الفجر الى الظهر يمديه يشبع نوووم قالت لا مو مثل نوم الليل قبل مايتزوج ياحليله من تجي الساعه 12 الا هو داخل غرفته ونايم ........<< خلاص ابسحبه بالقوه للسرير وانومه غصب علشانك>>
10- برمضان جاء اخوه وزوجته اللي ساكنين في بيت خارجي يفطرون معنا يوم افطرنا قلت لسلفتي خلينا نرقى للشقه نجلس عند التلفزيون احسن من مقابل الجدران ورقيت انا وياها يوم اذن العشاء اتصل عليها زوجها قال يالله انزلي قالت خالتي هي وينها قالوا لها انهم رقوا فوق قامت رمت على زوجي كلمه قالت زاد وانا اقول ليش جالس عندي للأذان علشان فيه زوجة اخوك فوق قال زوجي انا كل يوم اجلس لأذان العشاء وسكتت ماقالت شئ رقى علي زوجي وسئلني انا متى ارقى قلت اذا اذن العشاء سئلته ليش وعلمني السالفه ,,,,,<<<<سكت ماقدرت اعلق اذا ولدها تضايق من هالكلمه اجل انا وش اسوي
^
^
^
^
قطره من بحر
ومازال مسلسل وليدي وجهه مو عاجبني من يوم تزوج وهو مسود وفيه شئ وليدي ماياكل
هاذي حصلية 4 سنوات زواااج كأن ولدها ماخذ وحده من الشارع ماتعرف تسوي شئ
بنات انتم عندكم مثل هالنمونه والا هاذا شئ ناااادر
اقول لاتجي وحده ماشيه 200 وتقول هذا ولدها وانتي مالك حق تحرمينها منه ترى انا اساعده على برها وماله داعي اقول كيف
ترى انا احب واعشق حمولتي وخصوصا خواته يهبلوووون والله ماقد شفت مثلهم ولا قد جرحوني بكلمه وحتى لو صار يرجعون ثاني يوم يتعذرون
بس ان طاعك الزمان والا طيعه يوم جوا الخوات طيوبات جت الام الله يهديها
نصيحه للأمهات اذا انتي تحبين ولدك وماتتحملين تشوفينه مع وحده غيرك نصيحه لاتزوجينه ووتعبين بنت الناس وتتعبين ولدك معك
فيه وحده مثل حالتي والا هاذي حاله مستعصيه
رموشهاظلال @rmoshhathlal
محررة
يلزم عليك تسجيل الدخول أولًا لكتابة تعليق.
نوف مكه
•
طنش تعش تنتعش عدوك يرتعش
وريحي راسك
كل ماقالت لك شي قولي لها طيب واسكتي
الين تطفش وتشوفك ماخدتها على قد عقلها وتتركك في حالك
وريحي راسك
كل ماقالت لك شي قولي لها طيب واسكتي
الين تطفش وتشوفك ماخدتها على قد عقلها وتتركك في حالك
اوف اوف اووووف
الله يعينك عليييييييييييهااااااا
لو منك كان انفجرت
بس الصبر زيييييين
الله يعطيك صبر ايوووب يااارب
شفت ام زوجي اهون بكثير
ربي يسخرهم لنا
الله يعينك عليييييييييييهااااااا
لو منك كان انفجرت
بس الصبر زيييييين
الله يعطيك صبر ايوووب يااارب
شفت ام زوجي اهون بكثير
ربي يسخرهم لنا
الصفحة الأخيرة
هذي النوعيه منتشره
بعض الامهات يغارون من حرمة الولد
الله يصبرنا بس