ترملت وعندي ثلاث اطفال

السلام عليكم ورحمت الله وبركاته
خواتي ما اعرف كيف ابدى موضوعي بس بكتب لكم اللي بيخطر علي واللي في قلبي
اولا انا توفي زوجي قبل عشر ايام الله يرحمه ويغفر له
لم يترك لنا سوى الحزن والالم على فراقه زوجي توفي بمرض السرطان بعد معاناه مع المرض سنتين لم يذق فيها طعم الراحه ولا النوم الم مستمر واوجاع وقله نوم ومستشفيات وعلاجات لمده عامين كاملين ماخلينا شيخ يجون فتره ويرفضون يكملون او مايردون على مكالمماتنا او يعتذرون او او ......
وكل شيخ يقول شي مره سحر ومره عين ومره حسد والاغلب قال سحر مع حسد وحسبي الله ونعم الوكيل فيمن كان السبب
زوجي كان لي الزوج والاب والام والاخ والصديق
كان يدور رضاي كان مايخليني احتاج شي او نفسي في شي الا وراح جابه حتى في مرضه
صح كانه له سيئات لاكن الان توفي والرسول عليه الصلاه والسلام قال فيما معنى الحديث اذكروا محاسن موتاكم نسيت كل السيئات ما استرجعت ذاكرتي الا الخير اللي فيه والحب الايام الحلوه اللي قضيناها سوى عشره عشر سنوات راح بين يوم وليله والحمدلله اللي مصبرني وجابر كسر قلبي اني ماتخليت عنه فتره مرضه كنت له الزوجه والام والطبيبه والحبيبه وكل شي وهو كان لي كل الدنيا ومافيها بدايه زواج مرينا بضروف مايعلم فيها الا ربي مانملك ريال واحد حتى الخبز ماعندنا ريال عشان نشتريه وقف معانا اخوه الصغير وقفه اخ ولا بننسى فضله علينا بعد سنه كامله من زواجنا لقى زوجي وظيفه في شركه معقب والحمدلله مشت امورنا وتيسرت وصرنا نطلع وونسافر ونجيب واستراحات وعزايم ووقبل سنتين تعب زوجي بالمرض وطاح على الفراش اول سنه من مرضه يداوم يوم وخمسه مايقدر الا بعد رمضان اخر سبعه شهور ماقدر يداوم جته جلطه برجله ولا قدر يتحرك من الالم والجلطه والسرطان كلها اجتمعت فيه كنت خايفه لا يتخلون عنه الشركه ويستغنون عن خدماته والحمدلله كان فيهم الخير مشوا راتبه كامل ولاكن توفى الله يرحمه وتوقف معاه الراتب والايجار يوم الاحد بيروح اخوه يصرف حقوقه ومستحقاته وزوجي مو مسجل بالتامينات يعني مافي راتب تقاعد ولاهم يحزنون والحين افكر كيف بعيش انا وعيال اخوانه مبيقصرون بس بنعيش دايم عاله على الناس ان صرفوا علينا الشهر ذا الشهر الجاي مبيصرفون كل واحد وراه عيال وبيت ومسؤليات دبرتها في راسي وشلت هم ماتشيله جبال انحل حالي بين يوم وليله همي عيالي ومصروفهم ومن وين لي فقررت اني ابداء بتجاره وبحكم اني ماعندي راس مال ولا اقدر اطلع لاني بالعده قلت ماعندي غير الطبخ الحمدلله بشهاده الجميع نفسي حلو بالطبخ بس ما ادري من وين ابدى وكيف ولاعندي سواق ولا اقدر اكلم حتى لو لقيت سواق فشوروا علي ابغى حل اقدر احل فيه اموري ولا امد ايدي لاحد ابغى اعيش انا وعيالي بكرامتنا من غير منه من احد