كيفكم يا بنات؟ ان شاء الله بخير. الله يسعدكم دنيا واخره ويناولكم مرادكم يارب. الموضوع طويل ويحتا له وقت.
هذا اول موضوع لي واسأل الله ان يسعد كل من قرته. الموضوع راح يفيد كل بنت احترق شعرها او ضعف او صار كأنه بلاستيك او صار مطاط بسبب عوامل كيميائية مثل الفرد بانواع الكيراتين او الجلات او انواع اخرى او الصبغات، الكلام الي بكتبه بعد تنفع للي تبي تقوي شعرتها وتعيد له الحيويه واللمعه. اتمنى من كل وحده تمر تدعى لي دعوة (بظهر الغيب ). كلامي عن تجربه صارت لي. اللهم لك الحمد هذا بفضل ربي ان الهمني لا تقولين مستحيل لان ما في شي مستحيل باذن الله وحاولي وما بتخسرين بإذن الله. كتبت الموضوع لقلة المصادر الي لقيتها عن هالموضوع. وارجع واقول عن واقع تجربه. احترق شعري وهو طويل ونعومته وسط بس كان صحي وكان ويلمع ولفته مموج. كان قوي ماشاء الله لاني اعتني فيه. سافرت والماي الي بالبلد الي انا فيها الماي ما كان صافي يبهت الشعر وينشفه وخلاه يتساقط. نوع الفرد من طقت الجلات على الرغم ما عمري استخدمته بحياتي ولا عندي اي خبره فيه. قريت التعليمات ونسيت خطوة الحمايه خليته ل ١٥ د على شعري والحمدلله على ما صار. بعد ما غسلته تحول الى شي ثاني. فروة راسي تحرقني، صار شعري بلاستك، جاف جدا، ريحته قويه وسيئه، مطاط وما يمديني حتى امشطه. كانه شعر لعبه. ندمت ولكن على طول طلعت بحل اني ابتدي اعالجه بنفسي. اول ما بديت فيه الحنا عشان يخفف من مفعول الفرد ويسحب المواد الكيميائيه الباقيه ويستقبل الشعر المواد الجديده الي بعالجه فيها. النظام جدا مكثف وشوي متعب ولكن النتيجه مبهره جدا. المهم جدا ما يتعرض للحراره ولا تمشطينه كل شوي او كل يوم بمعنى اخر تجنبي تتعاملين معاه. المشط لازم ماركه زينه او مشط البروش الي مايقطع او امشاط من ماركة wet and silky افضل وقت تمشطين الشعر اول ما تحطين البلسم عالشعر قبل يلين الشعر. هذا الوقت راح تشوفين ان الشعر يتمشط وما يتساقط كثير. البلسم وحمام الزيت مهم تبتعدين عن المنابت ركزي عالاطراف وعلى الشعره نفسها. مهم بعد اول يوم نستخدم فيه الحنا نقص كل الاطراف. نحاول نرفع الشعر بعد مانسبح او نجدله ومانتركه سايب. استخدمي ماي مقري عليه او اقري عليه انتي بنية الشفاء. او ماي عادي.
النظام مكون من
-يومين حنا بالاسبوع ( الشي الرئيسي)
-يومين ايام حمام زيت ( للتطريه واستقبال فوائد الحنا الي تقويه)
-زيوت للشعر باستمرار بعد الحنا وحمام الزيت اهمها زيت (السمسم مخلوطه بنفس الكميه بزيت الفازلين للشعر الي غطاته لونها ازرق ) اذا عندج حساسيه من السمسم استخدمي زيت القطران. ( تقوية الشعر وتنعيمه) مهم تكون اصلية بعض الزيوت توفرها شركة now وهي افضل شركة للزيوت بالنسبه لي.( اي شركة ثانيه بس اهم شي اصليه)
بالنسبه لي يوم حنا، يوم حمام زيت، يوم او يومين راحه، يوم حنا، ويوم حمام زيت
سويت لي حنا بذكر طريقتها استخدمها مرتين الى ثلاث بالاسبوع ( مهمه جدا ان يستخدم مرتين لان الشعر يحتاج الى تكثيف العنايه). + شامبو و بلسم صحي غير تجاري او رخيص مو شرط غالي بس اهم شي زين اسألي وابحثي عنه.
- افضل شامبو جربته شامبو قارنيه الترا دكس لانه شامبو مغذي ويخفف النفشه ويطري الشعر ( جربته) او شامبو بالعسل الملكي وعسل بروبوليس من نفس الماركه ( ماجربته) او اي شامبو انتي مستمره عليه وصحي+ بلسم ممتاز جربتيه وخالي من اي مواد مضره مثل الباربين والسولفيت وغيرهم.
- حمام زيت ( غير عن البلسم) اخذي انواع ترمم الشعر من ويلا او فاشكول مثلا الي بالثوم( مافيه ريحه ثوم ابد). بذكر طريقه الحمام الزيت والبلسم بعد الحنا.
- الحنا مفيده جدا جدا بتعيد الحيوية للشعر من ثاني اسبوع ان شاء الله المكونات مهمه كل مكون تضيفينه تساعدين الشعر يتشافى اسرع
مكونات الحنا :
٣ بيضات (مهم جدا لانه بروتين يغلف الشعره وينعمها) اذا عندج حساسيه شاليها وكثري زيوت ولكن مافي بديل.
- ملعقتين كبار مايونيز ( فيه زيوت مفيده)
- ملعقتين كبار زبادي
- نص كاس جل بذور الكتان وهو عباره عن
كاسين ماي مع بذر الكتان يطبخ على نار هاديه لين يثقل الخليط ويتحول الى جل ياخذ ١٥-٢٥ دقيقه المهم الاستمرار بالتحريك وعلى طول بعد ما يخلص يصفى وهو حار قبل يجمد ويحفظ الجل بوعاء ( الجل يستخدم كماسك للعلاج ويستخدم ك جل لتثبيت الشعر) مفيد يلمع الشعر ويوخر البهتان ويقوي الشعره
- كاس ماي يغلى فيه ٣ شاي ليبتون واذا انتهينا صبينا فيه ربع كاس ليمون + ملعقه خل ابيض( مهم الليمون والخل عشان تتخمر الحنا وتطلع فايدتها ) نخليه لين يدفا ونحطه عالشعر (عشان ما يستوي البيض)
- نص اصبع زبده تذوب او تكون بحراره الغرفه لاتكون حاره اهم شي ( للترطيب)
- زيوت للشعر ( مهمه جدا الشعر جاف ومتكسر نبي شي يرطبه حطي الي ودك فيه كل زيت تضيفينه تضيفين لصحه شعرك كثير بمقدار 5 ملاعق كبيره لكل زيت( زيت سمسم - زيت جوز الهند- زيت الزيتون - زيت الخروع- زيت القطران (يسارع جدا بالعلاج ومفيد مفيد مفيد للشعر اهم شي اصلي) - زيت الشعر من فازلين جدا جميل- زيت الارغان واي زيوت اخرى مثل زيت الافوكادو او زيت اكليل الجبل اقل شي تكون عندج 5 زيوت منهم عالاقل
- حنا اصلي بمقدار ٦-٨ ملاعق ( قللي وزيدي حسب الحاجه) تقدرين تستبدلينه بسدر بس اهم شي يكون اصلي والافضل طبعا حنا. توضع لين ما تثقل وتصير بقوام الكيك.
- تخلط المكونات السائلة واخر شي الحنا مهمه جميعها تكون بدرجه حراره الغرفه او دافئة
نخلي الحنا تطلع فوائدها لمده ٣ ساعات ويفضل ليله كامله بس بدون ما نحط البيض فيها ونخلي البيض قبل ما نحطها بالشعر بساعتين وتوضع عالشعر اقل شي ٣ ساعات وعادي لو بتنامين فيه الشعر بيستفيد كل ما خليتيها عالشعر . غلفيه ببلاستيك نايلون وفوقه اي شي قماش عشان تثبت الكيسه. بعد الثلاث ساعات يغسل بشامبو وبلسم ويمشط وقت البلسم وبعدين الزيوت الي ذكرتها فوق خلطة زيت السمسم او القطران ( بذكر طريقه البلسم تحت ) وباقي خلطة الحنا توضع بالثلاجه (صالحه لثلاث ايام فقط)
طريقة البلسم والحمام زيت :
طريقة البلسم بعد ما يغسل الشعر بشامبو يوضع البلسم (ومهم نبتعد عن الجذور الله يرضي لي عليكم مانبي يتساقط ) نلبس قفازات ونبلل منشفه الشعر بماي حار جدا ونغطي الشعر فيها وكل اربع دقايق نعيد الحركه لمده ١٠-١٢ دقيقه. وبعدها نغسل الشعر والجسم كامل اذا حابين ونطلع ونحط اي زيت للشعر. ونفس الشي للحمام الزيت بس مهم ما نغسله قبلها بشامبو نبلله بماي - نوضع البلسم - نمشطه ونفس الحركة بالمنشفه وبعدها نغسله بماي ونحط اي زيت. الزيوت ما نركزها بالجذور كثير ( عشان ما تقلب فروة الراس اسفنجة وتساقط الشعر نحط شوي بالجذور مع التدليك ونكثره بالاطراف ).
وهذا نظام اعادة اصلاح شعري استفدت من اول مره بالحنا بان ٦٥٪ من ريحه الفرد القويه راحت المره الثانيه للحنا ٢٥٪ راحت. باقي تقريبا ١٠٪ بالموت اشمها. التقصف خف كثير وشعري صار رطب جدا بمقارنه اول ما سويت الفرد واومن بانه راح يتحسن اكثر واكثر من اول شهر . مدة الكورس تختلف من شعر لشعر ولكن تقريبا بستمر اقل شي شهر على الكورس المكثف وبعدين بقرر اذا بقلل استخدام الحنا او بمشي عليه. زيت القطران في خلال ثلاث شهور بيرجع الشعر مثل ما كان. عالعموم اذا شفت يحتاج عنايه بستمر على الخطه ثلاث شهور وهذا وقت كافي يرجع بنسبه ٥٠٪ بالمية مثل ماكان. دعوه منكم راح تسعدني ( بظهر الغيب) اي سؤال اسألوني في الكومنت. الله يرزقكم ما تحبون ويارب تستفيدون. وصلى الله وبارك على نبينا محمد وعلى آله وصحبه وسلم اجمعين.
فعلاً الحنا مفيد جداً للشعر
الله يعطيك العافيه ياقلبي على الموضوع