ترى في أحد مر بنفس مشكلتي😢ولا انا وحيدة

السلام عليكم ورحمة الله
يمكن مو المكان المناسب لموضوعي ماعرفت فين احطه ارجوكم يامشرفات لاتنقلونه بس محتاجة تفاعل المجربات واللي ماعندها الا تشاؤم وتحطيم لاترد الله يعافيها😳 الله ينفس عنكم كربات الدنيا والآخرة ابحث عن بصيص امل يخليني متفائلة ويقضي على تخوفي..
خذوا مشكلتي....
انا ولدت الحمد لله وعمر بنتي الان سنه وشوية
ولدت طبيعي ... شق العجان عندي ماكان بالطريقة المائلة اللي متعارف عليها كان بطريقة مستقيمة ..
ماعرفت الا الان عن هذا الشي😕
فرحت وزعلت يوم عرفت ليش
بشرح لكم بشكل سريع
فيه نوعين من شق العجان
1/المايل سواء عاليمين أو اليسار وله إيجابياته وسلبياته وأغلب الدكاترة يستخدمونه.
2/المستقيم اللي من أسفل المهبل الى مسافة قصيرة مايوصل لفتحة الشرج هذا المهم
وله إيجابياته انه يلتئم بسرعة ومايشوه المكان وترجع الواحدة كأنها بكرية صح مو زي الشق المايل
لكن عيبه يحتاج عناية واهتمام يعني ماتمشين كثير وتتجنبين الامسااااااااك الين يلتئم صح🖒 لانه رقيق الجلد وممكن ينفك الخياط. ويسبب بلاوي لاحقة😢
طيب ارجع لنفسي/
استغربت مو زي البقية بعد ولدت ماكنت احس بالم يذكر ماشاء الله لاقوة الا بالله كنت أمشي طبيعي وماكأن فيه خياط خواتي يتعبون وماتقدر تمشي من الالم
كان فيه الم عندي بس محتمل والمشي ممتاز
الشق هذا بعد ماتزودت عنه بمعلومات طلع من النوع اللي مايستخدمونه الأطباء كثير يخافون منه لانه ممكن يسبب ناسور مهبلي اذا زاد القص عن حد معين وبعضهم يوصلوه لفتحة الشرج😢
وقت ولادتي لما قصتني الدكتورة قالت قصيت لين فتحت الشرج صرخت ليش قالت لا فيه مسافة يمكن قصدت تحكي لي نوع الشق!!!
خيطتني وضبطتني واستغربت اني مااحس بذاك الالم اللي الكل يحكي عنه..
اهملت نفسي وكنت امشي كثير وتعرفون الامساك حق النفاس كنت ابكي منه وكنت اجلس عالكرسي العربي عشان يخفف الامساك تعبت من الأفرمحي الله يكرمكم
سمعت نصيحة اختي مع ان خياطي نوعه مختلف عنها والمفروض مااجلس عليه لان المنطقة حساسة والجلد فيها رقيق وبكذا انفتحت غرزتين تقريبا رحت اراجع عندها عشان تعدل قالت ماشاء الله رجعت بكريةو الغرزة اللي انفتحت ترجع تلتئم...لاتمشين فاتحة رجولك واجلسي عالكرسي العربي ورح ينبني نسيج وترجع باذن الله..
لكن للاسف انفتحت الغرزة وتوسع المكان حبتين . استسلمت ومارجعت وحملت الحمل الثاني وقلت اعدل في الولادة الثانية باذن الله.
مشكلتي في ولادتي الثانية عندي تخوف حاليا ملتئمه حوالي 4 سم بين المهبل وفتحة الشرج لكن فوق حوالي 2 سم او 1 ونص مفتوح
حاليا تعرفون الامساك مع الحمل واحس بضغط من فوق بسبب ثقل الرحم ويسبب الم مكان الشق واخاف يتمزق اوقات وقت قضاء الحاجة ويزيد قلقي اخاف مع الدفع والطلق يتمزق اكثر..!!!!
خايفة مع الدفع ينفتح عالشرج وينشق يتمزق وارجع في مشاكل ثانية وأفكر ماأطلب شق عجان بس اخاف يلاقون يحتاج شق ويشقون على جنب ويخيطون واللي تحت مفتوح ويصير مرفوع مع جهة مزموم ومع جهة مفتوح وماابغى اتشوه مع كل مكان
....
هل ياترى وحدة جربت مثلي
واذا قلتم كلمي الدكتورة واشرحي لها صعب
يمكن اولد في حكومي باذن الله ومااعرف اطيح في ايت دكتورة وتكون شاطرة ولا تعصب وتعاندني وتقص على جنب وهذا اللي شايلة همه😔
بالله ياأخواتي اللي حالتها زيي او تعرف احد او هي دكتورة او ممرضه وتقدر تفيدني لاتقصر معي. وش اسوي شايلة هم والولادة قربت😣....

الله يرزق كل وحدة ترد او ترفع الموضوع من خير الدنيا والاخرة ويحقق لها ماتتمنى...