تزوجته غصب عني وحياتي كلها متلخبطه

السلام عليكم
بنات انا قصتي طويله
وصار لي متزوجه 5 سنين والى الان احس اني مو متزوجه
بنات انا مثل اي بنت حلمت اني اكمل دراستي وبعدين افكر بالزواج
لكن بعد مانخطبت اختي الي اكبر مني
جو اهلي خطاب واخطبووني مع العلم اني كنت بثالث ثانوي
ورفضت وقلت مابي اتزوج بس اهلي اغصبووني وقالوا الولد مايتفووت وزين ومن هالكلام
وحنا ردينا عليهم ووافقنا وماراعوا اني كنت اصيح وشبه منهارة لاني ماكنت مفكرة اني اتزوج الا بعد تخرجي هذا اولا
ثانيا ماكنت ابي اتزوج من اقاربي طبعا الي خطبني هو من اقربائي
مع ان كل خواتي الي تزوجوا كانوا يخيروونهم اهلي ومايغصبوون عليهم ابد بس انا ماخيروووني الى الان اسئل نفسي ليه رفضووا انهم يسمعوون اختياري
المهم انكتب كتابي وملكنا وطولت الخطبه جلست مخطوووبه سنتين
وكان عذرة لانه ماكان قادر على تكاليف الزواج الين ماقدر يجمع وبعدين تزوجنا
وانا كنت من الاوائل في الدراسه وكنت ناوويه ادخل تخصص كنت احبه بالجامعه لانه كان حلمي
ولما فاتحت اهلي اني ابدخل الجامعه رفضوا وكانت امي تبي تشق شهادتي اذا مارضيت بالتخصص الي هي تبيه
في حين كل خواتي اختاروا التخصص الي يبونه
وحتى اختي الي اصغر مني بسنه دخلت الجامعه والقسم الي تبيه
المهم بعد سنتين من الخطبه تزوجت وتفاجئت ان زوجي رفض انه ياخذني معه للمدينه الي يشتغل فيها
لانه يستنى من الحكومه تعطيه بيت لانه هو عسكري بمدينه عسكريه
مع العلم ان اغلب اصحابه بالشغل كانوا ماخذين اهلهم معهم ومستاجرين اجار
يعني مااستنوا الحكومه تفرز لهم بيووتهم
المهم جبت منه ولدين والحمد لله
وجلست عند اهلي 3 سنوات وهو مايجيني الا بالشهر او الشهرين مرة
وكان شخص مايتحمل المسؤليه كنت انا مجمعه رواتب الكليه وداخله فيهم اسهم
فلما اهله كانوا يبوون يسافروون ويتمشوون كان هوماعندة فلوووس وقالي بيعي الاسهم ولما بعتهم قال راح نسافر بالفلووس
وبعد كذا طلع لنا بيت بالمدينه العسكريه وانا فرحت لانه كان ودي الم شمل العائله واحس اني متزوجه
ولما قالي انه طلعلنا بيت انا فرحت وقلت يعني اجهز الشنط عشان نجيك او تجينا قال لا ماراح اقدر اجيبك لان البيت يحتاج اثاث وانا ماعندي فلوووس واستني 4 او 6 شهووور انا تحطمت
وقعدت افكر قلت مافيه غير اتدين وفعلا تدينت من ابوووي فلوووس واثثت البيت
ولما سكنت معه شفت الويل لاطلعه ولارووحه تخيلووا بنات 4 شهووور ماطلعت كله حاشرني بالبيت
وانا عندي شغاله وهي عندي سنتين والى الان ماعطاة زوجي الا 3 رواتب بس
وكل ماجمع رواتبه وقاالوا اهله نبي نسافر قام اخذ رواتب الشغاله وسافر بهم
المهم انا قلت لازم ادور حل
وخطرت لي فكرة اني اقنعه انا ندخل جمعيه عشان نسد فلوس الشغاله ولانني اعرف زوجي انه ماراح يلتزم ويعطيني كل شهر للجمعيه وخصووصا اذا تهاوشنا قام وزعل ويرفض يعطيني فلووس الجمعيه
جلست اجمع الفلوووس بحسابي بالبنك وماعلمته اني مو داخله بالجمعيه عشان ماياخذهم ويلعب فيهم
المهم جمعت 9 الاف ريال ولما اخذ بطاقه صرافي وشاف المبلغ انبهر وقال انا بحاجه للفلوس ابيهم عشان اشتري سيارة مع المبلغ الي اخذته من البنك
ولما رفضت فقام يحسسني اني بخيله واني مااوقف معه ومن هالاشياء واعطيته المبلغ
ولما اشترى سيارة
وجاء بعد شهر قال وين الجمعيه ماجتنا قمت وعلمته الحقيقه انه انا كنت مو داخله جمعيه كنت اجمعهم له
زعل وقعد يهاوشني وقال انه راح يووديني بيت اهلي انا وعيالي الين مايدبر المبلغ عشان يعطي الشغاله فلوووسها وانه من هنا ورايح ماراح يجيب لي شغاله
وكلام كثير
المهم هووو الحين مايكلمني نهائي صار لنا 3 ايام مانكلم بعض
وصراحه بنات انا كذا مرتاحه مرتاحه انه مايكلمني لاني انا بعد طفشت منه ومابي اكلمه ومتحسفه على اليووم الي شفته
بنات بعض مرات اقووول تطلقي منه لانه هذا مايتحمل مسؤليه مو راعي زواج وانتي تووك صغيرة عمرك 23 سنه
وبعض مرات اقوول لا راح استحمله عشان عيالي وبس
ومادري ليه يعاملني كذا مع اني جميله انا ماامدح نفسي بس كل من شافني خطبني حتى لما كنت عند اهلي كانت امي ماتاخذني معها للزواجات لان الناس يخلوون خواتي الصغار ويخطبوووني
والى الان كل من شافني انبهر باناقتي وجمالي
وانا الحين صار لي 5 شهووور ساكنه معه بالبيت الي من الحكومه
ومن اول يووم جيت عند زوجي دلعته دلع مايحلم فيه احد
كل يووم حلا مافيه يووم الا حلا جديد
وكل يووم عشاء غير ومراعيه تنظيف بيتي اول باول
حتى انه جاني كلام من زوجت رفيق زوجي انه يمدحني عند اصدقائه
ويسووولف لهم عن طبخي والاشياء الي اسووويها وطلبت مني اعلمها شنو اسوووي
بنات انا صرت اهرب من حياتي صرت اواسي نفسي باحلام اليقظه اجلس 3 ساعات على فراشي قبل ماانام اتخيل اني بعالم ثاني واني متزوجه واحد ثاني يقدرني ويتحمل المسؤليه ويحبني اتخيل اني الى الان بنت وماتزوجت وكملت دراستي صرت اهرب من حياتي لاحلام اليقظه وتخيلات وقصص انسجها لنفسي
بنات لو انتوا مكاني شنو تسووون
تتطلقووون او تستمرووون بالزواج