تزوجت غصب ومب قادرة اتقبله ولا قادرة احبه وابغي الطلاق !!!!

السلام عليكم ورحمة الله وبركاته
سالفتي طويييييلة و معقدة بس حاولت اختصرها قد ما اقدر 
وانا تعبت ماتمت استشارية اجتماعية مارحت لها ورحت المؤسسة اللي تهتم ف شؤون المرأة والطفل لكن ماشي فايدة.
.
.
.
انا كنت عايشة احلى عيشة فبيت اهلي الحمدلله
كل بنت فالعايلة حلمها تكون مكاني ،لان اهلي بشكل عام متشددين بس ابوي مخليني ع راحتي ( اطلع و ارد مع صديقاتي ، سينما ، ليسن وجامعة)
.
وايد كانو يخطبوني ( لانهم يبغون يناسبون ابوي لانه معروف باخلاقه و طيبته وخواتي المتزوجات معروفات ب اخلاقهن الطيبة مع اهل ازواجهن واهم شي انه نحن من مواطني الدولة وانا كنت اخر بنت ) بس انا كنت ارفض وما افكر فالزواج نهائيا شالته من بالي ، 
.
لين خطبني واحد (بصراحة اخلاق ومحترم بس هم متشددين شوي) ،
انا رفضت ، ضغطوا علي وايد واختي كانت تحاول تقنعني ( كنت اقتنع و ارد مرة ثانية لرايي القديم واقول مابيه ) والوالدة تمت تبكي وتقول انتي اكيد صديقاتج لاعبين ف مخج وانتي اكيد حاطة شخص فبالج ولا اكيد ساحرينج ومن هالكلام .
.
للامانة ف فترة خطبتي كنت احب لكن تركته لوجه الله ويشهد الله اني ماكلمته بعدها يعني صارلي سنة تقريبا ماعرف شي عنه ونسيته بس طبعا بعد معاناة !
و طلع رفضي لخطيبي مب بسبب اللي كنت احبه
بس كان رفض داخلي!
.
. 
وافقت عشانهم وعشان كلام امي 💔
هم كانو يشوفون اني راح اعيش سعيده عندهم
و بالاماانة ( كللللهم انصدموا كيف وافقنا عليهم ؟ لان نحن غير عنهم تفكيريا و للعلم قبل اكثر من سنة صارت مشكلللللللة كبيييييييييرة بين عايلتنا و عايلتهم ) 
.
.
وانا كااااارهة هالزواج ومابيييييه ، ماكنت ابا اعيش معاهم   وماكنت احب اهله ب امانه !
تمت الخطبة الرسمية و مدتها (10 شهور تقريبا)
ماخليت احد ماقلتله اني مابا اتزوج ( اقصد اخواني وخواتي وبنات عمي كانو حاسين وبنات عمتي و سويتلهم فلم هندي و صحت وحالتي حالة)
وكلمت ابوي ان يفصخ الخطبة و قال لي انتي بتسودين ويهي و بتفضحيني عند الناس ومن هالكلام.
تعبت نفسيا والله ، كلهم كانو حاسين اني مب مرتاحة ومابيه بس محد سوى شي !
و استخرت ( ماحسيت ب راحة لاني كنت رافضتنه من البداية )
و قلت حق اختي و فهمتني ان الاستخارة معناتها (اذا الشي صار يعني خيرة) ف قلت اوكيه و مشيتها 
.
المهم ملكت وبين الملكة والعرس شهر !
و فيوم الملكة كنت ابا احط شروطي (ادرس وبيت و اشتغل)
وامي ماعجبها و صرخت ف وجهي قالت بقص راسج ( للعلم انه عندنا عيب البنت تحط شروطها وعيب تطلب مهر)
وكلمت اخوي ابا اتطلق فترة الملكة و قالي كل البنات يمرون بنفس حالتج و عقب يتأقلمون ومن هالكلام.
قلت حق نفسي يابنت تقبلي بالامر الواقع خلاص 
طاح الفاس بالراس . .
يشهد الله ان فترة الملكة حاولت احبه واتقبله
طرشت له هدايا و كنت اقوله كلام حب 
لكن مااااش . . شعوري اتجاهه مثل ما هو (ماقدرت احبه)
.
واتفقت وياه ان مايجامعني لمدة اسبوعين او شهر
ابا اتاقلم وياه (لاني ادري اذا جامعني فالبداية بتلوع كبدي وبصيح لاني ماحبه ومابيه و حرام هو ينجرح !)
ف وافق
.
.
.
و مر على زواجي الحين 15 يوم حاولت قد ما اقدر ابين له اني طبيعية لكن مادري كيف حس وخلاني اقوله كل شي ف عرف اني مغصوبة ع الزواج واستغرب قال انا ابد ماحسيت انج مغصوبة علي ! و لو كنت ادري كنت بطلقج فترة الملكة ( للعلم ريلي و اهله زينين ، بس نفسيا والله مابيه ، عايفة هالزواج بكبره)
وعلاقتنا متوترة و هو حاول يجامعني لكن بكيت بشدة مدري شو جاني 
.
والحين افكر فالطلاق لكن صعبة وااااايد ( ف عايلتنا ماشي ولا مطلقة و اذا اتطلقت بكون اول مطلقة فالعايلة مع مرتبة الشرف هههههه بس خايفة ع امي وابوي والله ، و عادي جدا يتبرون مني ! هاللي مصبرني ولا انا كنت بشرد من بيت زوجي من زمان )
.
واللي بتقولي انتي ف نعمة غيرج يتمناها 
ترا مايحس بالنار الا واطيها
وربي تعبت لا قادرة احب زوجي ولا قادرة اعطيه حقوقه
خايفة من غضب الله ومن لعنة الملائكة .
بس قريت ان الملائكة لا تلعن البنت اذا كانت مجبرة ع الزواج من هالرابط
http://islamqa.info/ar/163990
بس مب متأكدة
.
وربي مب عارفة شسوي ؟ كرهت حياااتي 😢
واتمنى الردود ماتكون جارحة ابا نصايح او دعاء او شي يخفف عني
(قل خيرا او اصمت)