تزوج عليها اكثر من خمس مرات وهي قرفانه منه -- ايش تسوي بحالها مسكينه.

اخواتي الحبيبات
مشكلة اختي كتبتها في رد سابق لأحد الاخوات ومالقيت صراحه فايده من كتابتها
اختي الكبيره عمرها 35 وعندها خمس اطفال
عرفت قبل مده ان زوجها متزوج عليها والصراحه مو هذا اللي هز كيانها وبس
المصيبه انها بعد هذا الموضوع عرفت بلاوي الله لايويكم قولو امين
والله لو انا مكانها هالمسكينه كنت مت من كثر جروحي
تصورو ان زوجها متزوج خلال العشر السنوات اللي مضت عليها اكثر من خمس مرات
بين مسيار ومتعه والله اعلم ايش بعد
زوجها ملتزم صراحه ومو حق حرام ولعب
ولكن المشكله انه مفهمها انها حب حياته وروحه وكيانه
مفهمها انه من غيرها يمكن يموت
خلاها تحبه اكثر من نفسها وعيالها وكل الدنيا
المسكينه طايحه فيه هدايا وليالي رومنسيه وحب وغرام وهو لما يقصر معاها في شي
يعتذر لها بأنه مايعرف يسوي الحركات اللي هي تسويها
وانه سعيد بوجود وحده مثلها في حياته
تصورو يااخوات انه تزوج كثير وهي حامل ويطلق وهي ماتدري
واحيانا لما يسافر يتزوج وحده وياخذها معاه السفر بدال زوجته
والغريب انها لما تتصل فيها وتكون شاكه في شي تكلمه بكل راحتها ويرد هو بكل راحته علشان كذا ماشكت
والسبب هو انه يقول لأي وحده يتزوجها انه اذا اتصلت زوجتي ترى برد عليها حتى لو انتي جنبي معليش
طبعا هذي لأنها زواج مصلحه توافق ولا عليها منه ومن زوجته
اختي تقول انه ياما صدقته في اشياء كثيره
كان لما يبتعد عنها بالايام ويسوي نفسه تعبان وزهقان
ولما كان مايصير عنده انتصاب تسأله ليه ماعاد لك رغبه فيني؟
يقول لا والله بس الشغل طالبين مني اوراق ولازم اخلصها خلال ساعات وافكر في هالموضوع
وان السكر مرتفع عنده هالايام ومايصير عنده انتصاب
وان الشركه طالبين منه شغل كثير وعنده ضغوطات عمل جدا كثيره وديون وملايين الاعذار
بينما هو لاهي مع زوجاته اللي ماتصدقون من اي بلد هم
اكتشفت ان وحده فلبينيه وطبعا طلقها واخذ وراها مصريه وبعدين وحده من بنجلادش
وطبعا على فترات ويطلق
وكان ياخذ وحده معاه للسفر وماتدري اي وحده وتموت وتعرف مين هذي
تقول صدقته وحبيته واعطيته كل حياتي وكنت اسويله ليالي رومنسيه
وفي الاخير الصدمه عدمتني
ياليت متزوج وبس
الا الأخ منوع وحركات
وكل المتعه معطيها لغير ام عياله
ولما عرفت ماطلبت غير طلاقها المسكينه بس الكل اقنعها انها طالما بتتطق ومعاها خمس بزوره
فالافضل لها انها تعيش في بيتها حتى لو ماتبغى تشوف وجهه
اختي قرفانه منه مع انه يتودد لها
تقول انا مااقدر احكم ولا اعرف كم هو متزوج الآن وكم وحده يعرف ولا عاد ابغى اعرف
تقول انها اصبحت في جحيم متواصل
وانا والله لما اشوفها اموت من الحزن عليها
انا اتذكر كل الحركات اللي كانت تسويها زوجها وهو يتعذر بمليون شي
اختي اغلب وقتها عند اهلي بالبيت لأنها مو طايقه المكان اللي هو فيه
ومالمسها من زمان
هي تقول انا عارفه اني بقضي عمري الباقي في هذا الحال
بس اللي قاهرها مسكينه انه هو يقدر يستمتع كالعاده مع زواج المسيار والمتعه
وهي امسكينه مو لاقيه حل لحياتها ولا تقدر تعطيه وجه بعد كذا
كل وحده تحط نفسها مكان المسكينه هذي وتقول ايش حيكون تصرفها بالله
انا لما حطيت نفسي مكانها قلت الموت احسن من هذا الجحيم
او الطلاق ارحم بس وين في هالمجتمع القاسي
حسبي الله ونعم الوكيل والله يصبرها ويعوضها خير:(