تسعير المنتجات

صبحكم الله بالخير والنور والسرو
بحاول اختصر لكم الموضوع وان شاءالله اقدر اوصل لكم الفكره وتستفيدون كثير ناس ماتعرف تسعر منتجها واغلب الأسئله اللي توصلني بهذا الخصوص
انا ما اقدر احدد سعر لكل المنتجات لأن فيه اللي يشتري غالي وفيه اللي يشتري رخيص وكل وحده وشطارتها ولاكن بقدم لكم نصيحه حاولي دائماً يكون منتجك جوده عشان ماتخسرين زباينك لأن اللي يشتري منك مره راح يرجع يشتري اذا كان منتجك جوده بغض النظر عن السعر
بكلمكم الأن عن اللبان المسقى وبحدد لكم سعر الكيلو بكم تشترينه وبكم تقدري تبيعينه
الأن كيلو لبان اذا كان حوجري عماني وهذا افضل شي ف السوق حالياً ومطلوب نقول مثلاً اخذت كيلو
١٠٠٠ قرام وبقسم الكيلو على ١٨ علبه مثلاً لأن الكيلو تقريباً
يعبي ١٨
يطلع لي ٥٥ قرام هذي سعة العلبه تمام
ارجع احسب قيمة كيلو اللبان مثلاً ١٥٠ ريال
وقيمة الزيوت العطريه نقول ٢٠٠
وقيمة العلب ١٨ علبه يعني درزن ونص لو قلنا ب ٥٢ مثلاً
الأن نحسب القيمه ١٥٠ +٢٠٠+٥٢ يطلع لي الناتج
٤٠٥ نقسمها على ١٨ عدد العلب يطلع الناتج ٢٢،٥
هذي قيمة العلبه الوحده طيب نجي للبيع مثلاً بحط تعبي تجي وحده تقول انا ببيع بالضعف ولا بحط تعبي
يعني تبيع علبة اللبان المسقى مثلاً ب ٥٠ ريال
تعالو نحسبها ٥٠نضربها في ١٨ تتوقعون كم يطلع
تطلع ٩٠٠ ريال وانتي قيمة بضاعتك كلها ٤٠٥ ريال شايفين الفرق اكثر من الضعف
لو قلنا وحده ماهي طماعه بتبيع ب ٤٠ ريال بس
نضرب ٤٠ في ١٨ يطلع الناتج ٧٢٠ وبرضه انتي كسبانه تقريباً
٣٠٠ ريال وهكذا يعني عندي ١٨ علبه وزنها ٥٥ قرام وسعرها انا احدده على حسب الجمهور اللي انا استهدفه ببيع ب ٣٥ ب ٤٠ ب ٥٠ ماراح اخسر اقل من كذا ماينفع طبعاً
انا قلت كيلو سعره ١٥٠ هذا اللبان اذا تبين جوده اعطيتك سعر الكيلو لنوعيه ممتازه وفيه اقل طبعاً لاكن الحوجري مايجي اقل
٢٠٠ ريال هذي سعر ٣٠٠ مل زيوت عطريه
بنات الأسعار هذي خاصه باللبان المسقى وفيه ناس تضيف عليه مثلاً كسر عود او زهور او مسك او الوان ولاكن في حال بعتي بالضعف راح يغطي وزياده لأنك لو حطيتي عود بتحطي شي بسيط ماراح يكلفك اكثر من ٥٠ ريال اذا اخذتيه جاهز وبس والمعذره على الأطاله ولخبطت الأرقام ولاكن اعتقد ان الكلام واضح والفكره وصلت وهذا اهم شي
اشوفكم على خير في موضوع قادم بأذن الله