كيفكم اخواتي امبارح عملت تشكيلة معجنات وحبيت انزلها وان شاءالله بتعجبكم
مقادير العجينة:
انا عملت كيلو طحين وضفتلو كمان كاسة
4 ملاعق كبار سكر
ملعقة كبيرة لبن روب
كاسة زيت(ثلاث ارباعها زيت ذرة وربع زيت زيتون)
ملعقة كبيرة خميرة فورية
ملعقة صغيرة بيكنج باودر
ماكان عندي حليب بودرة فعجنتها بحليب سائل( انا عادة بحط 6 ملاعق كبار حليب بودرة وبعجنها بماء دافئ)
الطريقة:
بحط فوق الطحين السكر والخميرة والبيكنج باودر كل الناشف وبحركو مع الطحين جيدا بعدين بحط اللبن والزيت وبفركهم بايدي مع الطحين حتى مايضل اي شي متكتل بعدين عجنتها بالحليبوغطيتها بكيس وحطيتها بمكان دافئ تقريبا ساعة وبعدين عجنتها كمان مرة وخليتها كمان نص ساعة(ماشاءالله ولا قوة الا بالله)
عملت منها بلحمة قطعت بصلة وذبلتها مع شوية زيت وقطعت فلفل حار وفلفل رومي وقلبتو شوي مع البصل بعدين حطيت اللحمة مع رشت فلفل اسود وبهارات مشكلة وقلبتها شوي ثم قطعت بندورة مكعبات وحطيتها على اللحمة وحطيت ملعقة رب البندورة ونص مكب ماجي وخليتم على النار حتى نشفت المي
وعملت منها بيتزا
صلصة البيتزا اخذتها من منتدى ثاني بس بتجنن واعتمدتها من فترة
الصلصة: قطعت بصلة كبيرة ناعم وقلبتها مع شوية زيت وقطعت حبتين بندورة وقلبتها شوي مع البصل لما تقرب تستوي البندورة حطيت ملعقتين كبار كاتش اب وملعقة كبيرة رب البندورة وشوية خل ابيض بنخليهم على النار حتى تتسبك
بفردها على الوجه وحطيت هوت دوغ وفطر وفلفل رومي (الفلفل الرومي حطيتو بمقلاية من غير زيت وقلبتو على النار حتى صار طري) وحطيت زيتون ورشيت زعتر الاكل مش اخضر وحطيت الجبنة
وعملت كمان جبنة استعملت جبنة عكاوي الخاصة بالمعجنات
وعملت هوت دوغ جبتها نوعية زوان القطع الصغيرة
اعذروني على التصوير صورتهم على السريع
شكلهم زاكين