تصدقوون انها خطبتني لزوجهـــا ..!!!

الــــــــسلام عليـــكمـــ

شخباركمـ ياحلوات ؟؟

ترى احب الصور التعبيريه بس هي تكرهني ماتبي تجي (وجه يبكي )

اكيد كل وحده تحك من جهه تبي تعرف من الحلوه الي تخطب لزوجهـا ..هع..

هذا الله يسلمكمـ أختكم في الله
امووره وحلووه واهبل وكشخه وانظف واطبخ واقدس الحياه الزوجيه (وجه مطلع ضروسه )

بس ماليش حظ في القوااز (وجه حزين )
الله وكيلكم يجي واحد يخطبني ويهج كنه فص ملح وذاب من غير مايشوفوني طبعا
4في عين العدوو كلهم خطبوني وشردوا
والسبب ابووي الله يسامحه حاط مهري مبلغ وقدرره (وجه يبكي )
انا بنته الوحيده بين 5 اولاد ماشالله

المهم انه الحين عمري 27 سنه ومازال الخطاب يتوافدون طوابير على بيتنا < مااعرف اكذب (الوجه الي حاط ربطه )<<ههههههههه احس اني خبله خخخ

االلي يجوني الحين ياواحد مطلق عشرين وحده قبلي يامتزوج ثنتين ويبيني الثالثه يا متزوج وحده مثل فلقه القمر ويبي يتزوج عليها ويتشرط مايبي عيال جعله
بوجع يوجع ضروسه ومايفكونهن الا بزراديه قهروووني (وجه معصب )
المشكله واحد كرشته عشر امتار وصلعته تلق لق وعلى باله بيكهام على غفله .. المهم ان هاللي كذا ارفضهم وانا مغمضه

واصلا اخواني يرفضوون لان اغلبهم عيونهم فارغه بكره يتزوجني ويطلق ولا يجيب الثالثه على راسي .. قلت اريح راسي واعلنت ورفعت شعار
لاااااا للمتزوجيين ..
صاروا اخواني يقولون لي اخر شي شكلك بتتزوجين بنغالي خخخخ

الين ماجا اليوم الموعوود ..
رحت زواج ناس اقاربنا وانا على سنقه عشره ..
جت حرمه طخمه وتهبل وكشخه بس مبينه كبيره يعني بالاربعين تقريبا

وجلست تسالني عن عمري ودراستي وانا فرحانه على بالي بتخطبني لولدها (وجه منسطل )

المهم اني جاوبت على اسئلتها وجلست اسولف معهااا وهي مرره طيبه ودمها خفيف ماشالله .. المهم جت تعرفت على امي وخذت رقمنا ..
وانا ليلتها مانمت جلست اتخيل عريس الغفله حلو مثل امه ولا لا هع

دقت الحرمه على امي وقالت انها بتجي .. وانا اروح اكشخ واتعطر وانتظرها <بنات اخر زمن خخخخخخ

جت الحرمه ومعها عيالها معها ثلاث اولاد ماشالله كل واحد اطخم من الثاني .. <عينها طويله (وجه مستحي )

جت وقهويناها وسولفنا معها وبدت السالفه .. وقالت انها بتخطبني
وانا مسويه مستحيه وانا من جنبهاا (وجه مكشر )

بس اللي صدمني انها قالت بتخطبني لزوجهااااا (وجه يبكي )
عاد انا وجهي صار كذاا :29:
ليش ياربي وش هالحظ الاقشر (وجه حزين )

وقلتلها .. بسالك سؤال بس لاتزعلين انتي كم عمرك؟ قالت 42 سنه
ماشالله
قلتلها .. طيب دامك 42 يعني زوجك باخر الاربعينات او بالخمسين (وجه يبكي )
قامت تضحك .. (وجه مستغرب )

قالت ..استني تجيك السالفه ..
انا وامي جالسين واحنا الفضول بيقطعنا ونبي نعرف هالحرمه وش عندها :huh:

قالت الله يسلمكم
تزوجت قبل 8سنوات بس .. وكان عمري 35 سنه
وزوجي وقتها عمره 22 سنه بسسسس (وجه مستغرب)

والله راسي دار يوم قالت كذا وقلت تمزح .. وجلست تحلف انها ماتمزح

وكملت .. تقول هالولد صار لاهله حادث على طريق الرياض - الطايف
وتوفوا كلهم الله يرحمهم وهو كان يدرس بالجامعه ماسافر معهم
ورث بيت ابوه وسكن لحاله .. خافوا عليه الجماعه من ان الولد ينحرف
وهو لوحده وكان انا معنسه وصلت 35 سنه ولاتزوجت وسبحان الله
ربي جاب نصيبي بين يوم وليله وتزوجت هالولد .. :icon28:

المهم .. تقول انه طيب معها واخلاقه زينه ويصلي وماعندهم غير هالثلاث شباب الله يحفظهم وماعد قدرت تحمل ..

زوجها ماعنده مشكله بالحمل مع انها الحت عليه يتزوج .. ورفض ..

والحين هي مرضت .. عندها انسداد بشريان مدري شسمه بالقلب
وعندها سرطان الثدي الله يكفيكم الشر
وعندها شحنات زايده بالدماغ .. وزوجها كل ماله يتشبب على قولتها
وبدال ماتزوغ عينه لبرى تبي تزوجه .. لان طيب معاها ومع عيالها وقايم فيها حتى بمرضها ولايقصر معها ويستاهل على قولتها ولا كان ماجيت ودست على قلبي وخطبت له وهو حتى ماطلب منها تزوجه ..

وجلست تقولي نصير انا وياك زي الخوات انتي لك الدور الثاني كله
وليله لي وليله لك والسفر مخليته لك لان مااقدر اسافر ..
وانا حبيتك وارتحتلك وابغى اتطمن على عيالي :( لان كل مالي اوهن والمرض اكلني (هي مستاصله الثدي الايسر ورجع المرض من جديد ووصل لرئتها )

انا كنت رافضه ومازلت عند رايي اني ماخذ متزوج .. جا اخوي الكبير
وقاللي ان الولد ماشالله قمه بالاخلاق وطيب وينشرى بالذهب وانه يعرفه من زمان من ايام الثانوي والولد من عيله طيبه وكل موصفاته زينه
وعمره 29 سنه ووسيم ومايتفوت .. قلت ابغى اشوفه اول بدون مايشوفني لان بصراحه اهتم بالشكل ابي واحد وجهه سمح عشان يغطي على عيب انه معدد .. وشفته وهو جاي لابوي (وجه منسطل)

عجبني :( نحيف وحلوو وابتسامته تسطل :oبس كاسره خاطري زوجته والله اني حبيتها وبكيت شكلي اكثر منها ..

الحين كل يوم تكلمني صرنا اصدقاء :D<< :icon10:
بس كل ماطرت موضوع الزواج اصرفها .. ماابغى اجرحها (وجه يبكي)

امس اتصلت علي بالليل وقالتلي ترى اذا ماوافقتي بروح اخطبله غيرك
مزوجته مزوجته ابغى اتطمن على عيالي يكون عندهم احد يداريهم
اعمار عيالها 7و4و2 ماشالله ..

الحين محتاره .. اوافق ولا لا ؟

ترى نفسيتي تعبت وانا افكر من امس مانمت (وجه يبكي )
وهي بتجينا اليوم الخميس بعد صلاه العشى

امانه كل وحده تحط نفسها مكاني وتجاوبني :(