تصرفاتي الواثقه تسببت لي بمشاكل كثيره

بسم الله الرحمن الرحيم اتوقع الكثير راح يشوف مشكلتي سخيفه وتافهه لا وابشركم كل شي بالدنيا له حل الا هاللي فيني ابتلاءانا متزوجه من يوم طلعت على هالدنيا وانا تصرفاتي كلها ثقه بدون لا اقصد ولا افهم اصلا وش هي الثقه مدري يعني انخلقت كذا تلقائيا واثقه من نفسي وهذا سببلي مشاكل كثيره حتى يوم كنت بالابتدائي اتكلم بثقه واتصرف بثقه بس انصدم ان الكل يستنكر هالثقه ويرمي على كلام اني قبيحه ووع ومن هالحكي وصلت المراهقه وتعرفون المراهقه يحبونك على شكلك كنت احس محد يحب يصادقني واذا صادقوني انا اكون اقل وحده بالمجموعه والغريب اني ارجع البيت افكر وافكر ان ليه اليوم مايبوني؟ وليه يبعدون؟ ويوم اقوم الصبح اكشخ واشوف نفسي بالمرايا اخبل مع اني كنت مو قاصده بهالتصرف ثقه او مو ثقه اصلا كنت ما افهم بذي الامور واروح المدرسه والقى تعامل يحطم كل الثقه اللي بداخلي وينسفها وحالتي هذه كانت مع اقاربي كلهم مافي احد مارمى علي كلمه سيئه واولهم امي كل انواع القببح قالته عني ومن قلبها وربي كانت تقول اللي بيتزوجك امه داعيه عليه ياشينه واستمر هذا حالي بعدين كبرت ودخلت الكليه وكنت استغرب لاني لو تعاملت مع الناس تعامل فيه ثقه لازم ينرمى علي كلام اني مو حلوه واني قبيحه وان ثقتي مو بمحلها وشوي شوي صار عندي غيره من الجميلات ورهاب اجتماعي شديد وبداخلي فيه ذل مو طبيعي وشكلي هو سبب ذلي هو سبب معاناتي والله معاناتي الوحيده بالحياه هو شكلي القبيح صرت اكره المجتمع واكره نفسي قبل كل شي

وبعد ماتزوجت اكشخ واتضبط والقى كلام جارح ينفهم اني قبيحه حتى زوجي مو مره يتقبل شكلي وربي احيانا اروح عرس اكون اكشخ من العروس نفسها معليش الانسان يعرف حسناته وعيوبه زين لكن وش فايدة الكشخه تجي وحده ماتسوى تستفزني وتضحك والكل نظراته ضحك اني كاشخه كل هالشكخه والشكل استغفرالله
ادري بتقولون ناس مشوهه وناس محروقه وناس مريضه طيب وانا مافرقت عن المشوهين كلن يعلق علي وكلما رحت مكان ارجع صدري ضايق بسبب تجريح على قبحي من وانا بالابتدائي لين ماصار عمري بالثلاثينات مو راضيين يشوفوني الا شينه وكلمن شافني علق علي وصرت لقمه سهله كلن يمضغها قبل لا اتزوج زوجي قابلت خطابه في عرس وعلى اساس نتعامل انا وهي و قلت لها شوفيلي عريس يكون من عايله طيبه و الخطابه مره محترمه ما الومها يعني وش ذنبها تكذب؟ قالت يابنتي لاتزعلين مني لازم تتغاضين شوي وترضين بالمقسوم يعني لامؤاخذه انتي شكلك على قدك سامحيني ما اقصد شي بس يجوني بنات ملكات جمال وبعضهم مملوحات ولا يلقون المطلوب
تدرون ان اكبر عيب فيني يخلي الناس تتشمت فيني وش هو ؟ وعيب ناادر ما اشوفه بين الناس يعني انا من القلائل طبعا غير خشمي معيوب مره وحتى فمي فيه تشوه جيت اسوي عمليه الدكتور بنفسه قالي كلام كمل على قرادة حظي قالي العمليه خطيره عليك مره مره خفت وماسويتها حتى التجميل اللي الكل يسويه انا خطير علي
واكبر عيب فيني وجهي شفتوا الفرجار ؟ داااااااااائره دائره دائره مهما اسولف مع اللي قدامي احسه يستنقصني ويشوفني مو انسان هذه اكثر شي الناس تعايرني فيه حتى امي تعايرني بوجهي وجهي يحسسهم اني ماعندي احساس وانا صغيره كانو يسمون وجهي فطيره ومرات يعايروني يقولون لي ياتميس اااخ طعوون بقلبي للان لما كبرت نفس الموضوع كل اللي يشوفني مايشوف الا وجهي الكبير اللي كنه خبز مفرود وخشمي وشفايفي حتى زوجي علق على وجهي مره
وعندي خدود من كبرها طايحه تحت لدرجه مره بزر قالي قدام الحريم انتي عجوز عشان بعض العجيز خدودهم كبيره جدا ونفس الشي اذكر احد الاطفال علق على خشمي
طبعا الاطفال تحصيل حاصل انا انجلدت من كلام ودق الكبار وطعون بقلبي مايعلم بها الا الله

وجهي نفس كرة القدم راس ماله ملامح

ماخليت كشخه ماخليت مكياج ماخليت استشوار ماخليت اكسسوار ماخليت رجيم ماخليت صبغه بالله لحد يجيب طاري الكشخه لاني وصلت لمرحله اني اروح صالونات فايف ستار واطلع من عندهم شوي افضل لكن مايتغير شي لان العيوب اصلا بالقالب خشمي وفمي المشوه ووجهي الضخم فلا تقولون كشخه لاني ماقصرت واصلا نزلت الموضوع للفضفضه لاني عجزت من الحلول خلاص ماعاد فيه حل
قلبي مطعون من الدنيا اللي قست علي بسبب مالي ذنب فيه انا انخلقت كذا عشان اتعذب وكلام الناس ومعايرتهم بشي مو بيدي ,انا مثلي مثل غيري ابي الشكل الحلو والناس ماتحب الا الحلوين او عالاقل ناس مافيهم عيوب

انا مظلومه مظلومه ادري يمكن الكلام كبير بس انا اتعذبت بحياتي من الكلام الجارح لاتقولون حساسه انا مااحب كثر الكلام ولا كان كتبت لكم ورب الكعبه المواقف اللي تعرضت لها بسبب قبحي لاتعد ولاتحصى داخلي روح تتنى تكون ملكة جمال وشكلي الخارجي استغفرالله العكس تماما ذميمه

وترى الزمن فهمني مو انا اللي قلت على نفسي كذا الا بعد ما الكل فهمني مستوايا بكلمه او بغمزه او بنظره

ادري اللي اطلبه مستحيل بس اتمنى الله يبدل وجهي لوجه ثاني جميل مايمت لهالوجه اللي سببلي عذاب والم بنفسيتي بصله وشكرا