تصرفي مع سلفاتي هل انا على حق

السلام عليكم
فضفضه
بذكر كل شي من البدايه
كيف ممكن نتصرف مع بعض الناس الملاقيف
راح اتكلم عن حياتنا الزوجية وبعدها راح اذكر المشكله
الحمد لله انا متزوجه صارلي فوق 12 سنه من شخص احبه ويحبني وبينا تفاهم بأغلب امور الحياة الزوجية والحمد لله
...
انا اطلع اروح اذا انعزمت لصديقاتي وزوجي يوديني بنفسه يحب يشوفني مبسوطه وهو كذلك يروح عند أصحابه ويجي وكل شي تمام
..
سافرنا قبل سنتين إندونيسيا وانبسطنا ورجعنا واغلب النفسيات ماقالو لنا الحمد لله على السلامة بعد ما سوا لنا ابو زوجي عشا عشان سلامتنا ماهو هينا المشكله المشكله راح اذكرها بعد قليل
...
زوجي انسان يحب الطبيعه ويحب المسطحات الخضراء بعيد عن المدن يحب تسلق الجبال ويحب الغابات وهذه الاماكن لاتصلح للعوائل
..
المهم زوجي هو وثلاثه من اصحابه سافرو قبل 4 ايام .. رحله لمدة 15 يوم الى البوسنه
اول مقالي مازعلت منه ولا شي قلت الله يستر عليك
روح استانس
الحمد لله السواق موجود عندي وساكنه جوار بيت اهلي ومانقصنا شي
.
ويرسل لي رسائل تفتح النفس اجواء وانهار جنة الدنيا يارب نشوف الجزيره العربيه مثلها
..
من.هينا بدأت المشكله
عندي سلفات مدري ايش جايهم علي رغم ماذيتهم ولا تلحقتهم بشي
سلفاتي ثنتين خوات يدقون بالهرج البارح في اجتماع وكانو الثنتين قريبين مني يبغون ينكدون علي ليش تخليه يسافر لو زعلتي يمكن مايروح قلت زوجي اثق فيه خله يروح ينبسط ويجي ايش المشكله قالت الثانيه ليش ماخليته يأجلها بعد رمضان وتروحي معاه الشيطان حريص تزوغ عيونه على وحده أو يسحبونه الي معاه قلت انتم ليش تفكيركم خلاص اذا سافر الزوج لوحده خاين قالت الرجال لاتثقين فيهم إذا حصل احسن منك يبيعك بكلب والله لو انا ماخليه يروح إلا رجلي على رجله
كثرو الهرج بعضه ذكرته والبعض ماذكرته وبعضه جارح خصوصا من سلفتي الصغيره ورجعت لبيتي وانا ضايق صدري
..
سلفاتي هذولي يتصيدون الثغرات ويحاولون ينكدن
علي بطرق غير مباشره مايفرحون لي بشي
سكنت بيتي الجديد مقالو مبروك
سافرنا اول وجينا مقالو الحمد لله على السلامة
إذا جينا عند اهل زوجي يكثر التصنع
المهم مايفرحون لي بأي شي يفرحون ويستانسون كيف ينكدون علي
..
المهم اليوم اتصل زوجي بعد الظهر وكانت النفسيه زفت وقلت له الي دار بينا كله
قال طبهم عندي هالمخببات واتصل على اخوانه الي اصغر منه مادري ايش قالهم
بس قبل اشوي ارسلت وحده منهن تقول الله لايوفقك وعساك للمرض الي ماله علاج يالنمامه وسوتلي حظر
بنات ذكرت كل شي بتفصيل
هل انا على حق بتصرفي بهذه الطريقة