تصورات وافكار حلوة وخطيرة عن البناء والتأثيث من تجارب واقعية مع صور شاملة ... حياكم

والحين انا راح ابدأ واحط لكم افكاري مع السبب والصور كمان

أول شيء
مرحلة البناء

انا افضل يكون الدور الارضي خدمات فقط بدون غرف نوم يعني صالونات ومجالس ومطبخ وغرفة غسيل وغرفة الشغالة وغرف الطعام ودورات مياه
والضيوف يكون لهم ملحق خارجي

السبب عشان غرف النوم تكون لها خصوصية كاملة في حال استقبال الضيوف لأن احنا ضيوفنا كثييير وعلى مدار العام

وطبعا لو الضيوف راح يقيمون فترة عندنا فالافضل يكون لهم ملحق خارجي يتكون من صالون جانبي غرفتين نوم + حمام + بوفيه صغيرون يحتوي على ثلاجة وهيتر

بكذا الضيوف ياخذون راحتهم تماما ويستقلون عننا واحنا بعد نستمتع بالخصوصية حتى في حالة اقامة الضيوف معنا لفترة طويلة ( طبعا هنا المقصود بالضيوف هم اهلنا يعني اهلي او اهل زوجي هم اللي لهم الحق بالاقامة معنا فترات بالاجازات او بالمناسبات )

الفكرة الثانية أن الشغالة تكون غرفتها تحت في الدور الارضي عكس طريقة الناس اللي يحطونهم بالسطح ( غرفة وحمام)

طبعا السبب انه الشغالة اولا تعب عليها تطلع وتنزل ثلاث ادوار يوميا

وثانيا عشان تنحصر تحركاتها بالدور الارضي فقط ولو احتجناها فوق عند غرف النوم ممكن تطلع مرة او مرتين باليوم كفاية وبكذا يبقى لغرف النوم هيبتها وخصوصيتها

الفكرة الثالثة ان غرفة الغسيل تكون بجانب غرفة الشغالة لنفس السبب السابق عشان تكون حركتها محصورة في مكان عملها يعني اقصد ان كل عملها يكون تحت بالدور الارضي من المطبخ على غرفتها على غرفة الغسيل وهكذا...

الفكرة الرابعة اللي افكر فيها ان البانتري يكون كبير وشامل يعني اشوف ناس حاطين بانتري صغيرون بس بهالحالة راح يضطرون يحطون مستودع ,,,
يعني افضل يكون البانتري كبير مثلا مايقل عن 3× 2 متر
السبب ان البانتري يكون مخصوص للاغذية فقط فلو كان صغير راح نضطر نحط مستودع وبكذا يكون جوا المطبخ فتحتين وحدة للمستودع و وحدة للبانتري
وهذي صور بانتري صغير فقط للاغذية:::



والفكرة الرابعة ان غرفة النوم الرئيسية تكون مفتوحة على غرفة الاطفال ( مع وجود باب)
والسبب انه لما يكون عندك طفل صغير سنة او اكثر ممكن تحطيه بغرفته وتقدرين تطلين عليه متى ما حبيتي وبنفس الوقت الباب يعطيك خصوصية وبالك مرتاح على الطفل

والفكرة الخامسة ان دورات المياة التابعة لغرف نوم الاولاد والبنات ماتكون جوا الغرفة يعني قبل الغرفة بشوية


والسبب عشان لو الشغالة تنظف دورة المياه ماتضطر تدخل الغرفة خصوصا غرف الشباب

وبعد في حركة الديكور اللي يجي خلف السرير بغرفة النوم الرئيسية زي هذي.....



عندي سؤال عن الصورة هذي من تقولي ايش اسم الكرسي اللي قدام السرير؟؟

وبعد صورة ثانية...



وبعد لو احد يقولي ايش اسم الستارة اللي تجي فوق السرير لو كان لها اسم خاص...



عندي افكار كثيرة كثييييييرة مرة بس اكتفي بهذي عشان اعطي فرصة لغيري
يالله انا انتظركم على الاقل انقدوا افكاري بس عطوني السبب يعني اللي تقولي كذا خطأ تقولي ليييييش عشان نستفيد

ولي عودة بافكار ثانية وصوووور ثانية

ماشاء الله عليك عيني عليكي باردة من جد افكار خطيرررررررررة بس تصدقين انا مقهورة حبتين لاني ماراح اطبق اغلبها في بيت العمر لان انا زوجي خلاص نوى نشتري بيت جاهز وان شاء الله خلال هالشهر دعواتكم بنات تكفوووووووووون
والبيوت اللي معمرة خلاص ما تقدري تتحكمي بكل هالافكار في بيت واحد يعني نا دراا تحصليهم مهتمين بهالاشياء
تحياتي لك وانا بصراحة ماعندي افكار بس هذا ماراح يمنع اني ارجع لموضووعك علشان استفيد من بعض الاشياء في بيتنا الجاي ان شاء الله

احب زوجي و اولادي

قولــــي امين ... الله يخلي لك زوجك و اولادك

ولاتزعلين ياعمري ترى حتى البيت الجاهز ممكن تغيرين فيه من هنا ومن هناك لحد ما يقرب للي في راسك وعلى فكرة ترى زوجي يفكر يشتري جاهز بس انا حاليا أعمل على قتل الفكرة في راسه عشان ما يقرر وارووووح فيها عاد هذا بيت العمر .........

وهذي وردة لك لأنك أول وحدة رديتي:26:

وانا بانتظار رجعتك للموضوع....

مرحبا أختي
الله يرزقك ببيت العمر الذي تحلمين به

طبعا البيت دائما لازم يلبي أحتياجات الأسرة يعني اللي يناسبني ممكن ما يناسب غيري فكل ناس ولهم خصوصيتهم في البيت

بما انني الحين ابني البيت بقولك اشياء ام سعد ممكن تفيدك

بصفة عامة اشوف افكارك حلوة وخاصة أنه حمام الأطفال خارج الغرفة وبجانبه
بالنسبة للشغالة وغرفة الغسيل أنا أفضله فوق عن تحت واسبابه عندي اول شيء المساحة عادة للأراضي الان صغيرة نوعا ما والواحد يحب تكون الصوالين والمطبخ عنده كبيرة فلما اعمل غرفة الخادمة وغرفة الغسيل بتكون على حساب مساحة الصوالين والمطبخ

ثانيا : الخوف من الشغالات لما يكونوا تحت بصراحة ممكن يعملوا اشياء وانتي مش دارية عنهم بس فوق تكون محصورة ما تقدر تنزل ولا تطلع ألا تحت عينك تصدقي أنا حتى نافذة غرفتها ما خليتها على بره من كثر بلاويهم خليتها على سطح المنشر

في موضوع حلو عبارة عن ديوانية اللي يعمرون بيت العمر ممكن تزوره أي واحدة ناوية تبني بيساعدها كثير

omamoory

الله يعطيك العافية على افكارك الحلوة

وكلامك صحيح 100% بالنسبة لتصميم البيت اكيد ان اللي يناسبك ويناسب مجتمعك ما يناسب غيرك

عشان كذا قلت اللي تشاركنا فكرتها تكتب لنا السبب عشان تعم الفائدة

وديوانية البنات اللي يعمرون شفتها وامر عليهم بس احس انهم داخلين بالعميق يعني يتكلمون بتفاصيل البناء

وانا حبيت اننا نتبادل الافكار وكل وحدة تعدل وتبدل بالفكرة حتى تناسبها...

شكرا لك على مشاركتك المبدعة وانتظر عودتك للموضوع مرة ثانية بافكار جديدة

تحياتي لك