تضحياتك يا حواء لا تخلينها حساب مفتوح ~

55
سقف التضحية بين الزوجين 




بسم الله الرحمن الرحيم 
السلام عليكم ورحمة الله وبركاته 




استمرار الحياة الزوجية السعيده
شيء كلنا ودنا فيه




واي انسان سواء ذكر او انثى يريد استمرار علاقة ما زواج او صداقه او عمل
 لابد ان يقدم بعض التضحيات عشان تستمر هالعلاقه 




هذا شيء ما فيه جدال
لابد من بعض التنازلات عشان تستمر الحياة 
وان العناد يهدم كثير من البيوت 
لكن حتى التضحيات اللامتناهيه ممكن تهدم بيوت 
او تهدم اشخاص وتسبب الضرر لهم سواء الزوجة او الزوج او اي شخص يضحي بكل شيء 
لابد يجي يوم ويندم 
وعشان تكون التضحيات محدده ومقيده ما  تسبب ضرر لاحد لابد من نقاط منها :-




1- ان التضحيه تكون من الطرفين 
فما يكون فيه طرف يعطي وطرف فقط يأخذ 








مثلل لتوضيح الكلام المنمق اعلاه :-
خطبني شاب على قد حاله وكان طيب و ذو اخلاق لكن ما يقدر على زواج كبير 
ف عادي اني اضحي بالزواج الكبير واخليه مختصر عشان تمشي امورنا 
هنا مافيه ضرر علي لانها ليله وبتعدي 
لكن يجيني خطيب و يقولي انا بتزوجك في السر لان ظروفي الماديه  ضعيفه واهلي رافضين اني اتزوج لحد ما القى وظيفه 
هنا طبعا لا ما راح اضحي 
لاني انا المتضرره الوحيده 




الخطيب الاول قدم مقومات لاستمرار الزواج اخذ قروض او استدان مبلغ من المال 
او توظف حارس امن او اي شيء يخليه يعلن الزواج حتى او كان على قد حاله لكن ضحى وتعب عشان يعزني و يقدرني  




لكن الثاني لا يبي تضحيات مني انا وهو قاعد بس ياخذ يبي زوجة و اشباع رغبات و وحده تقوم فيه بدون ما يقدم شيء 








 
2-النقطة الثانية يكون فيه سقف للتضحيه من بعده 
لا تقدم اي تنازلات لانه مع الاسف اذا ارتفع سقف التنازلات خسر الانسان كرامته و خسر حقوقه و قبل كل هذا وهذا خسر ثقته في الطرف الثاني 








مثال ثاني :- 
وحده زوجها طيب وابن حلال  حياتهم مثل العسل 
لكن تزوج عليها وطلب بدل الاسبوع اللي للعروس طلب اسبوعين 
طبعا الزوجة الاولى وافقت 
نقول لانها زعلانه وتبي الفكة منه ههههههه 
لكن بعدها رضت ومشت حياتهم عسسل
جاء الزوج يا ام فلان انا ابي يومين عندها لان فيه مناسبه لاهلها 
وبعد شهر يا ام فلان انتي كريمة وانا استاهل 
ابي 
اجلس عندها خمسة ايام 
ام فلان ابي اجلس عندها يومين وعندك يوم هي لوحدها لا ولد ولا تلد يونسها 
الى متى بتضحي ام فلان 
راحت حقوقها و راحت ثقتها في نفسها ليش يسوي فيني كذا وراحت ثقتها فيه 
لانها ضحت اكثر من مره 
كل مالها وسقف التضحية يروح فوووق الى حد ما تعبت 
تبون تضحون بيوم او يومين ما احد بيلومك انتي ادرى بحياتك لكن لا تكررينه مو كل شوي نفس الموال مو كل دقيقه ضحي وضحي وتنازلي عن حقوقك 
و الافضل بعد تقفلين باب التضحيات اللي كذا من بدري لا يتوسع عليك 








3:- الاشياء المهمه ابعديها عن التنازلات 




لا تتنازلون عن اي شيء مهم 
معروف ان الزواج فيه حاجات لابد تكون متوفره 
سكن مستقل 
نفقه و مبيت الزوج عند زوجته والى اخر الحقوق 
لو جاء زوج وطلب من خطيبته انا والله اذا تزوجنا بجلس عندك النهار مع كم ساعة من الليل لكن ابات عند امي امي انسانه وحيده 
وتخاف تنام في الليل 
بتضحون في هذي بعد؟
المبيت شيء مهم قيسوا عليه اي شيء 
لا تتنازلون عن اركان الزواج والاشياء المهمه عشان لا ينهار البيت 
اذا عجزتي تتحملين بعد سنه سنتين ثلاث 
،،،، فيه حلول كثيره فكروا فيها انتي وزوجك 
مثلا امه تعيش جنبكم مثلا تروح مره بيت زوجك مره بيت اخوانه فيه الف حل بس ابحثوا عن اللي يناسبكم و بدون تضحيات بليز 
بدون هضم حقوقك 
وقيسي عليه اي مشكلة 
تقدرين تبحثين عن الف حل لها لكن ابتعدي عن الحلول اللي تاخذ من حقوقك 
عشان ما يجي يوم وتندمين وتقولين يا ليتني سويت كذا و لا ضحيت بشبابي وعمري وصحتي ومالي و و و 
 




وحطي حلقة في اذنك :-
ادم ما يعتبر تضحيات حواء تضحيات بمعناها الصريح 
يعتبرها تنازل عن حقوقها بكامل قواها العقليه 
لان ادم يفكر بعقله 1+1=2
تنازلتي بارادتك=انتي عاجبتك العيشه كذا 
هذا اللي ادم يشوفه 
ما يشوف انك ضغطتي على نفسك وتحملتي لاجله 
ولا يشوف انه مقصر لانك راضيه 
كيف يدري انه مقصر وانتي اللي يقولك عليه حتى لو تسبب لك في ضرر قلتي موافقه 
بيقول هذي الوضع معجبها و تأقلمت عليه 
وبعد فتره يبدا يدور راحته 




4-
لا تقارنين نفسك بغيرك 
لان كل واحد حياته تختلف عن مسار حياة الاخرين 
لا تقولين فلانه ضحت و هذي هي عايشه مرتاحه عوضها زوجها او اهله
يمكن تضحيتها ماهي تضحيه هي شافت الموضوع ما يضرها فوافقت
لكن انتي تختلفين عنها اذا يسبب لك تعب او مفسده ليش تضحين
مثلا 
فيه ناس تضحي بالمهر وتاخذ مهر ممكن عشرة الالاف لكن هي عندها رصيد واصل للمليون و راح تعيش مبسوطه و ماهمتها الكم الالف اللي تنازلت عنها
لكن انتي زوجك قادر يعطيك سبعين الف و انتي في حاجتها ليش تضحين وتاخذين عشرة مثل الاولى وانتي رصيدك صففففر
فهمتوا قصدي الضرر يختلف من انسان الى انسان ومن ظروف الى ظروف
و كل التوفيق 
الموضوع رأي شخصي لاني احكم عليه من وجهة نظري و الاشياء اللي اشوفها ما تضرني ممكن تضر غيري
واختلاف الرأي لا يفسد للود قضية 
اعتذر عن اي لخبطة كتبته على عجاله