تطبيقي للدجاج الصيني (توليفة من عدة وصفات) + الموكا المثلجة مع تعديلات

السلام عليكم و رحمة الله و بركاته

هذا أول موضوع لي في المنتدى

طبعاً أنا معروف عني إني مو راعية طبخ و لا نفخ

بس بصراحة بعد ما دخلت عالم حواء و شفت ذرابة العضوات

دبت في نفسي الغبطة و قلت

لازم استحي ع نفسي و اتلحلح شوي

و طلعت بدجاج صيني اخذت المقادير الأساسية من كذا موضوع (من داخل و خارج المنتدى) و حطيت اللي ابيه و حذفت اللي ابيه
بس في الأخير طلع حلو و لذيذ

و الرز الصيني سويته بطريقة خادمة أختي

و الموكا أخذت طريقته من هنا بس عدلت عليه في الكميات


سامحوني ع هذرتي الواجدة بس تدرون أول موضوع و لازم أعبّر عن نفسي شوي و دارية لو أخذت راحتي حبتين
بتوسعون صدوركم و تقولون هذي مستجدة ما يشره عليها :27:

طيب ندخل في الموضوع

الدجاج الصيني بالخضار

4 صدور دجاج منظفة بالدقيق و قشر الليمون و الخل و منزوعة الجلد و الدهن (عشان تروح نكهة الدجاج)

مقطعة مكعبات صغيرة ( و لا حظت إن لو كبرت المكعبات شوي كان أفضل )

تبلتها بملعقة طعام كمون و ملعقة شاي ممسوحة فلفل أسود و ملعقة طعام ممسوحة كركم و ملعقة طعام كزبرة ناشفة و رشة ملح و ملعقة طعام صويا صوص و ملعقة طعام خل
ملاحظة: هذه المقادير تقريبية و إنتوا بالنظر تقدرون تحكمون وش اللي يناسب رغبتكم

خليت الدجاج في التتبيلة ساعتين ع الأقل

بعدين ضربت 4 بيضات بالمضرب مع شوي قرفة و فلقل أسود و هيل (عشان تروح نكهة البيض)
وغطست صدور الدجاج في البيض
و بعدين غطسته في خليط الدقيق ( عبارة عن دقيق مخلوط مع نشا )
و قليته لين صار لونه ذهبي
ملاحظة: أنا استخدمت نصف كمية الدجاج تقريباً
و الباقي شلته في الثلاجة لأني حسيته طلع كثير ( تعرفون مبتدئة :04: ما أعرف أوزن الكميات زين من البداية )

و الحمدلله إن الوالدة إنسانة متفهمة .. و مطولة بالها علي :27:



نجي الآن للخضار

قطعت 3 بصلات صغيرة ( احب البصل ) لشرائح طولية
فص ثوم كبير مبشور
جزرتين كبيرة مقطعة شرائح طولية
حبة فلفل رومي كبيرة مقطعة شرائح طولية
كرمب (ملفوف) مقطع شرائح طولية ( الكمية حسب الرغبة ) أنا وضعت كمية مساوية لكمية الفلفل الرومي
عودين بصل أخضر مقطعة شرائح صغيرة ( بس في المطعم الصيني يقطعونه) يخلونه طويل يعني نفس طول الجزر و الفلفل الرومي



تجيبين طاوة و تحطين فيها شوي زيت على نار متوسطة إلى عالية
و تحطين البصل تقلبينه شوي ( أنا أضفت له كاجو ) و إذا تغير لونهم شوي تضيفين الثوم تقلبين شوي و تضيفين الجزر تقلبين شوي و تضيفين الفلفل الرومي تقلبين شوي و تضيفين الكرمب تقلبين شوي و تضيفين البصل الأخضر تقلبين شوي و تضيفين الدجاج تقلبين شوي و تضيفين الصوص

بتقولون وشهو الصوص ؟
الصوص يالحبيبات عبارة عن
ملعقتين طعام صويا صوص (و لو زودتيهم ملعقة أزين و أزين)
و ملعقتين طعام خل (و لو زودتيهم ملعقة أزين و أزين)
و ملعقتين طعام سكر (بس ها انتبهي تزودينهم :icon30:)


بعد إضافة الصوص قلبيه شوي

و في نفس الوعاء اللي خلطتي فيه الصوص حطي حبتين ماجي و ذوبيهم في
نصف كوب ماء حار
و ضيفيه لخليط الدجاج و الخضار

و بعدين ضيفي خليط النشا حسب الرغبة
( خليط النشا عبارة عن ملعقتين طعام نشا مذوبة في نصف كوب ماء من الحنفية أو الصنبور :cook: )

أنا أضفت نصف الكمية و حسيت إنها ضبطت لي المسائل


و قلبتهم شوي لين حسيت إن الطعم و تجانس الخليط صار أوكيه

طفيت النار



***

جا دور الرز الصيني بطريقة خادمة أختي

كاستين رز ( انا استخدمت الرز الأمريكي لأني أحبببه و ما يوهق المبتدئات اللي زيي- يطلع طعمه زين في كل الأحوال)
غسلتهم و سلقتهم في موية مغلية و زيت و ملح و آجي (ملح صيني مدري ياباني )
و بعد ما استوى
جبت طاوة أو أي صينية أهم شي تكون واسعة تقدرين تفردين فيها الرز
و الصينيين يستخدمون الصاج اللي نسوي عليه القرص

تحطين عليه كمية حلوة من الزين ( نصف فنجان شاهي زيت )
و تقلقلين فيه الخضار اللي تحبينها

أنا استخدمت
راسين بصل صغار مقطعة مكعبات صغيرة
نصف فص ثوم مبشور
خضار مشكلة مسلوقة في موية و ملح
كرمب ( ملفوف )

أضفت البصل أول شي و بعده الثوم و قلبتهم لين صفر البصل
أضفت الكرمب لين صار لين و تغير لونه
أضفت الخضار المشكلة
قلبتهم شوي و أضفت
ملعقتين طعام صويا صوص أو ملعقة ( حسب الرغبة )
و قلبتهم شوي
و بعدين أضفت الرز
و جلست أقلبه مع الخضار لين حسيت إنه
أخذ طعم الخضار و بيّن في التشويح في الزيت
و بعدين أضفت له شوي بصل أخضر مقطع شرائح رفيعة
و قلبته فيه شوي ..

و توتة توتة
خلصت الحتوتة

و هذا صحن للحبايب





أتمنى تكون الوصفة نالت ع إعجابكم
و تشكروني عليها خصوصاً لأني :04: و محتاجة تحفيز








يتبع .. تطبيق الموكا المثلجة << يمي يمي