عبارة عن طبق حلو يتكون من طبقة قشطة وفوقها طبقة فستق مخلوطة مع ماء الزهر ، طبق خفيف ولذيذ ويصلح حق اللي يحبون الحلويات بالقشطة
هم 3 مكونات رئيسية للمفروكة
القشطة / الشيرة / طبقة الفستق
نسوي أول شي الشيرة نحتاج :
1/2 جلاص ماي
1/2 كوب شكر /1 قفشة صغيرة عصير ليمون
نخلطهم بجدر صغير ونحطهم على نار متوسطة ونخليها تغلي لين يثقل قوامها وتصير لزجة تحتاج تقريبا 7 دقايق
نطفي النار ونخلي الشيرة تبرد ، وممكن تستغنين عن هالخطوة وتشترين شيرة جاهزة من محلات الحلويات , الشيرة الخفيفة الشفافة
صديقتي تستخدم شيرة محل البحصلي
الخطوة الثانية القشطة نحتاج :
2 كوب حليب بارد
1 كوب كريمة سائلة
3 قفشة كبيرة شكر
3 قفشة كبيرة طحين
3 قفشة كبيرة نشا
3 قفشة كبيرة ماي زهر
نخلطهم مكونات القشطة كلها بجدر ما عدا ماي الزهر نضيفة بالآخر
وانتأكد أنه النشا والشكر ذاب قبل ما نحطهم على النار
نحط الجدر على نار متوسطة ونحركها لين يثقل قوام القشطة ، نطفي النار ونضيف ماي الزهر ونحرك
نحط القشطة بماعون ونغطيها بنايلون ونخليها تبرد
نبدي الحين بالمفروكة نحتاج : 1 كوب سميد ناعم
3 كوب فستق + 1/2 كوب للزينه
3/4 كوب ماء زهر
1 1/2 قفشة كبيرة شكر
آنا استخدم هالنوع من الفستق وأطحنه بالبيت لأنه الفستق المطحون الجاهز يكون لونه باهت وغالباً يكون ناعم جدا نفس البودرة
طحنت الفستق مع القفشة ونص شكر وخليته على جنب
بعدين تاخذين السميد وتحطينه بمقلى غير قابله للالتصاق وتحركينة لين يتغير لونه ويصير اصفر وحطي بالج لأنه السميد بسرعة يحترق لازم تكون النار هادية
بعد ما يتحمص السميد أضيفه على الفستق المطحون
وأضيف عليهم الشيرة وماي الزهر شوي شوي ما أضيفهم مرة وحدة
وافركهم بيدي لين تصير نفس العجينة تقريبة
أجهز جلاصات التقديم أو أي ماعون تحبين تقدمين فيه
انا أفضل الجلاصات الصغيرة بس اذا عندك عزيمة كبيرة ممكن تقدمينها بماعون كبير
نحط طبقة القشطة
لازم تكون طبقة القشطة ضعف كيمة الفستق
بعدها أحط طبقة الفستق وامسح عليها شوي شوي لين يتساوي سطحها
بعدين أحط قفشة فستق للزينه وهالخطوة مهمة لأنه لون المفروكة يكون باهت بسبب اضافة السميد
واحنا نبي لون المفروكة من فوق أخضر زاهي
بعد ما أضيف قفشة الفستق امسح عليه وأوزعة على وجه الطبق
نخليها بالثلاجة لين اتماسك
ساعة الي ساعتين بالثلاجة كافي
ولو سويتيها قبل بيوم يفضل انج تطلعينها قبل التقديم بوقت عشان تلين شوي وما تكون باردة وايد
نزينها بالورد المجفف وقت التقديم
لذيذة جدا وخفيفة وريحة ماء الزهر منعشة
طبعا هذه طريقتها
و هذه صورة تطبيقي لها
