تطلقت...

بعد ٦ شهور ملكة طلبت من زوجي انه يطلقني و سويت له بلوك من كل مكان.بكيت كثير و حسيت كأن احد يدعس على قلبي بقووة لدرجة اني مقدر اتنفس. تعرفوا شعور لما تتركون شي تحبونه مرة لأنكم تعرفون انه يضركم؟ ب ٦ شهور بس شعري كله طاح في الارض و صار حبتين من الهم، كنت اصحى الصباح استفرغ الله يكرمكم و بس اصيح ولا لي نفس ادبش للزواج ولا لي نفس افصل فستان و كل من شافني يقول كأنك وردة ذبلانة.. تواصلت مع دكاترة نفسية و اخصائية اسرية و كلهم قالوا لي ننصحك بالانفصال لكن صلي استخارة و ادعي ربك و اختاري قرارك بعناية. فيه حريم يرضوا يعيشون العيشة ذي لكن شوفي انتي هل تناسبك او لا.و هو فعلًا سرق الراحة مني بقلة اهتمامه و حركاته الغير مريحة و صرت خايفة من مستقبلي معاه و من المجتمع الي حروح له لحالي. كنت كل ليلة برمضان ادعي " يارب اذا فلان فيه خير ليا يارب انه تقربنا من بعض و تريييح قلبي و تريحنيي واذا فيه شر تصرفه عني عاجل غير اجل و ترضيني بقضاءك و قدرك يارب". و فعلًا... ثالث يوم العيد من شي يمكن يعتبره البعض تافه انفجرت و رسلتله رسالة بكل الس بقلبي و طلبت منه الانفصال. ردة فعله باردة. ما حاول يتواصل مع اهلي، امي كلمت امه الي قالت ان ولدي عنده كرامة ولا رح يجري ورا بنتك.. عدا على موضوعي شهرين و ولا احد تكلم و لا خبر و لا طلقني، ابوي كلم ابوه الي قال ترا ولدي حزين و انا الي قلتله يسيبها هي تروق و تجي تكلمه بس ما رح يصير الا كل خير. ابوي قله البنت ما تبغاه نهائيا و هو لو فعلا يحبها كان اقل شي كلمني. انتهى الكلام و لا صار شي... يمكن دعوى الطلاق تاخذ وقت؟
الحمدلله كل ما الوقت يمر كل ما اعرف خيرة ربي و قراري الصح... بس فيه شي واحد...احيانا كثيرة ازعل و اتضايق لما اشوف صحباتي الي ملكو معايا متزوجين و فرحانين مو حسد ولله ربي يهنيهم، اكن اقول لو انه كان كويس معايا كان انا نفسهم الحين.. بس يارب ليش اضطريت امر بذي التجربة.... ليش اتذكر الاشياء الحلوة و ابكي للحين؟ هل رح اتعوض؟ احس اني صرت خايفة من الزواج خلاص.
قصتي لها تفاصيل كثيرة مؤلمة ولحظات قليلة حلوة. لكن الحمدلله على كل حال اللهم لا اعتراض على قدرك.اذكروني بدعوة او علقوا اي شي بخاطركم.