تطلقت وعضت اصابع الندم

السلام عليكم

بدخل في الموضوع على طول .. والمشكله تخص قريبتي
بقولكم السالفه من الاول
كان عمرها 22 من حوالي 5 سنوات خطبها واحد ووافقت عليه وملكو
وبعدين بدت المشاكل تتوقعون من مين؟؟ من امها وخالتها .. كل يوم يسألونها
خليه يجيب لك هدايا واذا جاب لها يقولون لها ايش هذي الهديه اي كلام .. ايش هذا البخيل..
يعني بالختصر مو عاجبهم العجب .. تخيلو لدرجه انه امها الله يصلحها دقت علي الرجال وقالت له انا ماراح اخليك تتزوج الا لمن تاثث شقة كامله من المحل الفلاني (هذا المحل معروف اسعاره نار) صحيح انه يشتغل شغله محترمه وهو انسان طموح ماشاءالله عليه وذيك الفتره كان يكمل ماستر لكنه على قد حاله يعني مو غني وكذلك اهل البنت يعني
و خلت اعمام البنت مره يهاوشونه على ايش؟؟ على المكان الي بيصير فيه الزواج يبغونه مكان فايف ستار الولد خاف منهم لانهم قامو يهددونه يايسوي العرس في هذا المكان ولا يترك البنت طبعا الولد ماله الا يوافق لانه المسكين يقول انه حب البنت وشاريها ويبغاها .. حتى لدرجه انه ماقال لاهله ولا كان صارت مشاكل بين اهل البنت واهل الولد بس هو كسر الشر
يعني بالمختصر تحكمو فيه وهانوه ولا بعد مو عاجبهم يقولون بخيل
شقولكم بس.. ام البنت وخالتها دايم يقولون لها مايحبك لو يحبك كان يجيب لك هدايا بالسعر الفلاني مع انه يجيب لها بس مو عاجبهم شي .. واستغفر الله مع انه هذي العائله (عائله البنت معروفه انهم ابخل ناس)

تخيلو حتى الشبكه بعد الحفله ام البنت دقت على ام الولد وهزأتها تقول ابغاكم تجيبون لبنتي شبكه محترمه ثانيه وتسوون لها حفله ثانيه .. والله وام الولد سكتت بس طبعا ماطاوعتها على انه تسوي حفله ثانيه ..
وبعدفتره بسيطه نزلت الام وبنتها وخالتها وباعو الشبكه وهي طقمين كبار وغيروهم ( اول مره اشوف ناس كذا!!)

مرت الايام واهل البنت بس يذمون بالرجال واهله مع انهم ناس طيبين ويكفي انهم ساكتين عنهم
وطبعا البنت تاثرت من كل هالكلام تقول ماطيق اشوفه قامت تكرهه كره العمى وتقول انه يلوع الكبدمو حلو ( مع انه الولد احلى منها وسيم وطويل بشهادة الكل ويكفي اخلاقه) وهو يحاول يقرب منها وهي تبعد اكثر واكثر وتسوي تصرفات عشان تقهره بس هو مطول باله عليها

تخيلو يابنات لمن تصير عزايم ويجتمعون فيها حريم العايله تقعد هالام ماغير حش بزوج بنتها ماخلت احد ماتكلمت جنبه عنه مع انه كلامها مو مقنع تجيب خرابيط من عندها وتقول انه اهله مو كفو وكانه مقطوع من شجره ومن هالكلام مع كل الي سووه

واكثر من مره يحاولو يفركشو ويخلو البنت تطفشه ويعملو مشاكل بس هو يبغاها ويقول انه يحبها ويترجاهم يعطونه فرصه

ويوم بقى على الزواج اسبوع والناس استعدو ووزعو البطايق حقت الزواج زادت المشاكل بسبب التشرط الزايد لاهل البنت
ابو الولد عرف بالسالفه لمن المشاكل قامت تكبر وتبان و انقهر على كرامة ولده وراح لاهل البنت و وقال انتو شتبون بالضبط طلعت ام البنت ماتستحي تقول خل ولدك يطلق بنتي(اول مره اشوف ام تخرب على بنتهاّ)

وفعلا الولد طلق البنت و لاطلب منها ولا ريال لانها المفروض تدفع له لانه هي الي تبي الطلاق

ويوم طلقها على طول خطب بنت عمه ووافقت

وبعد ماطاح الفاس بالراس تخيلو ام البنت قامت تقول المفروض عطونا فرصه مو على طول طلقها من اليوم الثاني!! يؤؤؤ شوف قله الحيا

وبعدها بفتره الام صارت عندها حاله نفسيه صارت ضعيفه مره من كثر التفكير والبنت نفس الشي والحين صار لها 5 سنوات او اكثر وصار عمرها 27 وهي تتمني تنخطب حتى لو من فراش على قولتها

والولد ماشالله عليه تزوج وجاب بنت وولد

الي ابغا اوصله يابنات انه الماده مو اهم شي لانه الحين اشوف المشاكل وقصص الطلاق تكثر بسبب هالمظاهر الزائفه والماده!!
وحتى بعض الامهات تبغى تخرب على بنتها بس عشان فلوس !! ليه طيب ايش بتستفيد اذا تطلقت البنت عشان فستان او ذهب ايش هالسخافه والتفكير السطحي..!!

معليش طولت عليكم بس لمن اشوف البنت تكسر خاطري مع انها هي الي جنت على نفسها ولا حاولت حتى .. وظلمت الرجال لكن الله عوضه بزوجه الكل يشهد لها .. مع انها للان تتكلم على زوجته وتقول انها سمينه ووو الخ.. مسكينه صارت عندها عقده نقص للحين على بالها الناس ششكل وبس

يلا مابغى اوجع روسكم اكثر واتمنى تعطوني رايكم بالسالفه وبالبنت:26:

سلام:)