تعالن احكيلكن عن ولادتي الميسره برحمة من الله عز وجل

من يوم حملت وانا متضايقه من حملي لانه كان غصب عني ماكنت مخططه له لان عندي ثلاث اطفال اعمارهم متقاربه وولدي الاخير مابعد كمل السنتين وطول الوقت كنت الوم حالي واقول ليت ماكان هاا لحمل وسودة الدنيا بعيني لكن كل شي بأرادة الرحمن يقول لشي كن فيكون مرت شهور الحمل بسلام ولله الحمد وماكنت اروح للمستشفى ولاراجعت ولا مر الا بأخر يوم من الشهر التاسع الي هو موعد الولاده طبعن حاسبته من النت المهم ع طتني الدكتوره موعدبعداسبوع ,صادف شهري التاسع شهر رمضان الكريم فكنت طول الشهر وانا مداومه على الاستغفار وهذا ياحوامل هو لب الموضوع كله سبحان الله الاستغفار ثم الاستغفار ثم الاستغفار هو سبب ولادتي السهله في اخر يوم من المهله الي عطتني اياها الدكتوره عشان الطلق الصناعي وكنت ادعي ربي انه تجيني طلوق طبيعيه لان كل ولاداتي كانت بطلوق صناعيه وكان جسمي تعبان بسببها المهم اتصلت علي امي تطمن علي وقلتلها موعدي بكرى عند الدكتوره و وصيته تدعيلي قفلت الخط ياعمري وهي تدعيلي وخانقتها العبره . بعدماسكرت المكالمه مع امي رحت لدورة المياه واخذت دش وانا اتسبح شفت لون احمر نزل مع الماء بس ماعطيته اهتمام لاتي مستبعده الولاده بذاك اليوم مع اني كنت احس بشوية مغص بس متعوده عليه من الشهر السابع المهم توضئة وصليت العصر ونزلت بحضر للفطور فجئه حسيت بشي نزل مني رحت للحمام اتأكد وتاكدت انها الكدره وهي علامة الولاده وانا اقول بنفسي معقوله خلاص حان الوقت جاوقت الولاده ومفارق اعيالي ما أدري انا ارجعلهم ولا لا خرجت من الحمام والدموع ماليه عيوني و عيالي يسئلاوني وراك ياماما تبكين؟ وصارت المويى تنزل معاي بكثره قلت مافيها صبر وكلمت زوجي وقلتله يالله بنروح للمستشفى جاني طيران ويقولي يله يله على باله بولدخلال ساعه المهم كنت مجهزه شنطة المستشفى وشنطت اعيالي لاني بتركهم عند اختي المهم واخرمن طلع من البيت انا قعدت ابكي وانا افكر ياترى ابرجع لهاالبيت مره ثانيه ولا لا . وحنا بالسياره اصر ولدي الصغير انه يجي بحجري ويضمني ويقولي ماما انا احبك بكلامه زاد عذابي عذاب وصارت دموعي تنزل بدون صوت لاني مابي زوجي يحس يوم وصلنا عند باب بيت اختي نزلت الشغاله عيالي الكبار وكانو مبسوطين لانهم بيلعبون مع اعيال اختي اما الصغير لما جات تاخذه الشغاله ايالله فك يدينه مني وقبل لنمشي قالي بيباي ياماما وهو يحرك يده هنا قلت خلاااص اكيد ما رايح اشوفه ابد حاولت اكتم بكاي عشان زوجي مايحس ويضيق صدره يكفيه لي فيه بس انفجرة وقعدة ابكي وهوايهدي فيني, المهم وصلنا المستشفى وعلى الطواري جات الدكتوره وكشفت علي قالتلي مفتوح 3 سانتي لالزم تنويم اخذوني قسم الولاده وجهزوني وحطو علي التخطيط من الساعه 6 ال9 وانا ماحس بأي شي وكل مادخلت عليالدكتوره قلتله حطولي طلوق صناعيه رغم اني مابيهن بس ودي اخلص مليت مرت الساعه 10 و11 وانا ماحس بشي وانا اقول بنفسي معقوله بولد اليوم جاتني الدكتوره وفحصتني قالت مفتوح 4 سانتي قلتلها دكتوره ارجوك نزلي عني الجهاز ودي اتمشى بالاسياب صرت اروح واجي واسمع صراخ الي فيهن طلوق وقول بنفسي ليتني مثلكن احس بشي عشان اخلص بسرعه المهم جات الساعه 12ونصف وحس بشويت مغص وينزل معاي مويه كثيره مخلوطه بدم لدرجة انه صارينزل على ارضية الاسياب الي كنت امشي فيها شافتني وحده من الممرضات قالت ااوه ما ما تعالي يشوف انتي كشف لقت الرحم مفتوح 4 ونص دخلوني على كشك الولاده وجلست الى الساعه1 ونص والممرضه تدخل علي كل شويه وتقولي ما ما مافيه طلوق سبحان الله انتي مافيه يصرخ ولايبكي قلت كيف يبكي وانا مافيه طلوق ولا وجع بعدين جاء الدكتور المناوب وقالي بكشف عليك لانه مافيه غيري متابع حالتك وافقت غصبن عني مع انه جاني اكثر من مره وكنت رافضه انه يكشف علي المهم شكله كان معصب فسوالي تحريض وقالي لسى 5سانتي باقيلك ساعتين بع د ماطلع انهلت علي الطلوق وراى بعض بقوه ااااااااااه وبدى الزحير والممرضه الي عندي مستغربه ااااو ولاده لبست قفازاتها وكشفت قالت ولاده قريب قريب كيف دكتور يقول لسى وانا ههههه اقول اححححححح احححححح وهي تقول اووووه استني مافيه يجهزي شي وتستدعي خوياتها وانا ماعندي وقت وادي اخلص اححححححح ويتجمعن الي ترفع رجليني والي تفك السرير وبثواني تطلع بنوتي على وجه الحياه وترجع الروح لمها بعد طول عناااا والممرضات يهنوني ويقولن ماشاء الله ولاده سرعه وانا قاعده احمد ربي على السلامه فجئه دق جوالي تدرون من كانت أمي تقول كنت حاسه انك بتولدين الليله اول من كلمني وهناني وانا لسى على سرير الولاده الله يحفضها ويطول بعمرها ااااااامين .