تعالن بعلمكم بهالسلافة و اللي عندها مثلها تجي تفرحنا

بنات بعلمكم اليوم بقصة صارت لي بمطار الرياض و القصة هذه عمرها 16سنة طبعا الهدف من هالهرجة ابي اوريكم وشلون الخير موجود بأهل هالبلد و إنه في بعد نخوة بأمتنا
هذا يا طويلات العمر كنت مسافرة من الشرقية ورايحة على عرعر أبغى أزور جماعة هناك و نزلت بمطار الرياض بانتظار الرحلةاللي تبي تطلع للشمال ،، و أنا جالسة بالمطار بالصالة جت حرمة عباتها فوق راسها وتسحب على اﻷرض وحملة ولد عمره يمكن سنتين جت وقعدت يمي وشكلها بس شفتها قلت هب يالبدوية من وين طلعت ذي! المهم أنا فكرت كذا بشكل عادي لأني مقيمة بالخارج ومتعودة على السفر و الرحلات ،، المهم قامت هالبدوية تسولف علي قالت لي بتروحين عرعر ؟ قلت لها إيه بزور جماعة هناك قالت لي لحالك قلت لها إي قالت ما معك أحد قلت لها لا هزت راسها وسكتت بعدين قالت تغديتي ؟ قلت لها لا ما تغديت وأنا ما كان بي جوع ما أشوفها غير قامت صوب رجال واقف شوي بعيد عننا وهي عباتها تسحب على اﻷرض وبيدها الولد لصغير راحت كلمته كلمتين وردت قعدت يمي قالت لي هذه أول مرة أطلع براة عرعر جيت للرياض مع زوجي أدور العلاج لولدي وقامت تسولف علي طبعا هي ما سألتني من أنا وﻻ وش له سفري ،، وما في خمس دقايق إﻻ و يرد زوجها وهو حامل سندويشات وعصاير وماء وقال لزوجته خلي الحرمة يمك وبس نطلع الطيارة خلها تقعد يمنا أنا يا بنات أنصدمت من نخوة وكرم هالبدوية هي و زوجها والله ما تركوني إﻻ على باب الطيارة لمن قال لهم المضيف لا اﻷخت ما نقدر نقعدها يمكم ﻷنها درجة أولى طبعا أنا قعدت بس أفكر بهم شلون هالناس البدو المساكين عندهم هالنخوة و الكرم ذا و الله يا بنات لو الوحدة منكم تشوف منظرها ومنظر زوجها تقولون توهم جايين من الصحرا بس العبرة باﻷفعال ومثل ما يقولون الرجال مخبار ماهم بمناظر قصتي هذه صار لها فوق 16سنة وللحين ما نسيتها وقلت أكتبها لكم و اﻵن أنا في بيتي بأوروبا بس والله ما نسيتهم ربي يعمر دارهم ويوسع رزقهم ويبارك لهم بذريتهم وصحتهم قولوا آمين واللي عندهم قصة مثل هالقصة تجي تسدحها هنا ترى الدنيا بعد فيها خير و ديرتنا بها نخوة و رجال وحريم يطولون الرقبة و سلامتكم