تعالن شفن وش صار لي

السلام عليكم
اللهم صل علئ محمد
صارت لي مصيبه وموقف لا احسد عليه امس صلحت غدانا وكثرته وقلت بغرف لامي ولاخواني وبروح اشوف امي للعلم امي كانت منومه اسبوع في ديره غير ديرتنا ومازرناه لبعد المسافه المهم ماجات الا اخر الليل قلت بالمره اشوفه وانزلهن الغداء والقهوه والشاي المهم جهزتهن و دقيت علئ السايق ورحت وشوي وتدق علي بنتي تقول عمي جاء من الدوام وسألن عنك قلت طيب شوي واجي المسافه بيني وبين اهلي خمس دقايق سلمت علئ امي ونزلت الاغراض ورجعت وقلت وينه قالت طلع وراك علئ طول قلت الله يستر عاد هو مايواطن طاري السايق ابد المهم شوي وجا وبعيونه الشر قال وينك قلت رحت اودي الجيران غدا قال البسي عباتك و اطلعي الا هو جايب السواق ولاعن خير الي جابوه وحايسوه حوس الا المسكين شوي ويبكي قال انا اخذت جوالوه ومفاتيحوه وركبته معاي وقلت وين وديت ماما والسايق وداه لبيت امي وقال نزلته هنا وشوي وطلعت ورجعته


وراح السايق وجانن قال يالله يالله مالتس قعده هنا قلت رحت لامي تعبانه حيل امي معه مرض خطير والله يعلم كم باقي له من ايام
قال الله يشفيه بس مالتس قعده عندي روحي الله يوفقتس انا طاب خاطري منتس
انا سكتت ماقلت شئ ورحت اجهز ملابسنا كلهن وملابس عيالي
وهو دق علئ اخواني واحد واحد وعلمهم بكل السالفه
وجو اخواني وعطوني محاضرات طويله عريضه وانا بس ساكته واقول ان شاء الله
وانتن خابرات دايم الرجل يفزع مع الرجل مو مثلنا الي الحرمه عدوه الحرمه
وكلمهم وقال لهم تسان هي عارفه خطاه بأمشيه هالمره ومن امس بلي دوامه ومشاكل ماخلصنا الا اخر الليل
قسم عارفه اني غلطانه وغلطي مايستدعي ان الناس تقب مره وحده الي يهاوش والي يصرخ والي يهين كلهم علي والله مافيهم واحد الي كلهم بحنيه الا اخوي الوسطي ماهاوشن بس قال هدي نفسك ويصير خير
وزوجي قطع اخر حبل موده بيني وبينه الحين كأننا اخوان بس يامر وانا انفذ البارح اشوفه وهو نايم تمنيت لو يحضني لو مره وحده احتجته كثير مافيه احد حن علي قسم كأني سويت كارثه او مصيبه كأني احرقت الدنيا بكبره كلهم علي مارحموني ولا فهموني اني رايحه اشوف امي
هو متغير كثير من جو اهلوه هنا بديرتي تغير علي صار جاف صار عصبي مايهتم بي مطنشني مدري وش اسوي معاه انا كتبت موضوع قبل كم يوم بس للاسف راح للاحتاجات الخاصه وكم مره اطلب ينقلونه بس مانقلوه شوفوه هناك