تعالن شورن علي...

السلام عليكم:

تعرفون بدت الاجازة وبدت معها الطلعات والروحات بالمنتزهات والشاليهات والاستراحات
وحنا من بداية الاجازة وحنا طلعات وماقعدنا

وطبعا كل طلعه نطلعها للملاهي او الاستراحات او الشاليهات أو اي شيء
نتفق حنا ياالحريم اننا نتدافع على العشاء وعلى قيمة الاستراحه او الشاليه


وانا معلمه .. واطلع معهم دايما انا وبناتي(14سنه - 4 سنوات) أما عيالي الاثنين مايطلعون معنا لأنهم مشتركين بنادي صيفي

كل الحريم غير موظفات .. ربات بيوت وبس
المهم:إذا جاء الدفع وجمع الفلوس أخذوا من كل حرمه مثلا 50ريال ..واذا جاء دوري قالوا: انتي موظفه تدفعين دبل يعني (100ريال)

المره الاولى جاملت وسكتت وقلت ماراح اتكلم علشان 50ريال بس
لكنهم خلاص اخذوها عادة.. اني ادفع دبل ماتدفع كل حرمه


مع العلم انه مامعي الا بنتين
ووحده من الحريم معها ثلاث شابات وشابين كبار غير العيال الصغيرين
ووحده معها بنتين شابات و3 بنات صغار

ووحده مع حريم عيالها ثنتين مامعهن عيال( طبعا مايدفعن تبع خالتهن)
وغيره من الحريم

لاتظنون اني بخيلة واهتم بالفلوس
بس انا متضايقة ليش لأني ( معلمة) يبغوني ادفع اكثر منهم؟؟؟
ليش مانتساوى بالدفع ويتغاضون عن كوني( معلمه)

وش رايكم هل انا مكبره الموضوع وهو مايستاهل؟؟ والا اتكلم واعترض واقول مثلي مثلكن ابدفع مثل ماتدفعن؟؟؟