تعالن شوفن برنامج نفاسي السهل وطبقنه راح يرجع كل شي لـ أحسن مما كان👍😉

السلام عليكم
كيفكم بنات .. انا متابعتكم من زمان واستفدت منكم .. واليوم حبيت افيدكم
اليوم بانزل لكم برنامج نفاسي .. مابغى غير دعواتكم
وان ربي يسهل حملي ويسهل ولادتي ..
هو برنامج سهل ومايتعب .وبنفس الوقت راح تحصلين على جسم صحي .. والاهم واللي شاغل بالنا ان ((المنطقه)) ترجع زي البكر .. والكرش تختفي ..
بعض الوصفات من عند امي الله يحفظها وبعضهن من منتديات،المهم اني جمعته واستفدت. و ان شاءالله تستفيدون..
طبعاً كل شي احضره قبل الولاده بشهر او نص شهر اللي ينطحن واللي يدق خفيف .. واللي يظبط بالثلاجه.
** اللي راح تتبع نظامي اول بأول وتستمر عليه الاربعين كلها ان شاءالله. وباذن الله راح تشوف تغير جذري .. اهم شي الانتظام ..
على بركة الله ..
اذا حسيتي بولاده اشربي ماء زمزم وكولي رطب .. وكثري الادعيه .. وتسبحي بماء دافي اقرب للساخن،، وذوبي شوية حلتيت ومره وصبيهم على فوطه والبسيها،، عادي تسبحي بماء حار على جسمك، طول مانتي فيك طلق لانه يسااعد في فتح الرحم ،، وادهني بطنك والمنطقه الحساسه بزيت زيتون دافي ..واذا خلاص ماعاد تتحملي روحي المستشفى
اولاً تجهزين ادويه بسيطه عشن تاخذينها معك بشنطة المستشفى..تطحنين مقدار ملعقتين مره + ملعقتين عنزروت تحطين منها قبضة اصبعينك مع القهوه 3 مرات يومياً .. الخلطه هذي تستخدمينها مدة عشر ايام من لحظة الولاده .. فقط .. لان العنزروت فائدته للنفاس الايام الاولى بس << اكثر منه مو زين ..اما المره استمري عليها مرتين باليوم طوال ايام الاربعين ..
ثانياً:تخلطين بعلبه فنجان فلفل اسود+ فنجان حبة سودا مطحونات~هذا تشربينه مع حليب اول ماتوصلين سرير التنويم اللي بعد سرير الولاده.. لاتقولين مالي نفس لاااازم تدفين ارحامكم بعدها ارتاحي وكولي اي وجبه تشتهينها..
ثالثاً:تخلطين بعلبه فنجان حلبه + فنجان ماش((العدس الاخضر)) مطحونات~ تاخذين منه ملعقه كبيره على كوب حليب ساخن ،اشربيه ثلاث مرات باليوم
رابعاً خذي شوية بعلبة من مقادير شاي الاعشاب اللي كاتبينها بالداخل وحطيه بعلبه وسويه كشاهي اي وقت تشتهينه اشربيه
واركز على اول يوم بالمستشفى لازم تشربين هالادويه لانها ضروووريه وتنفعك بالمره.واذا طلعتي للبيت بالسلامه تواصلين طبعا عليهن>> وسنذكر التفاصيل لاحقاً

الحين نبدا البرنامج بالتفصيل،راح اكتب لكم طريقة يوم كامل وهذا اليوم راح تمشون عليه مدة العشرين الايام الاولى كلها.
الفجر بعد قرآءة اذكارك تسلقين بيضتين وتفتينهن بصحن وتحطين عليهن ملعقه كمون مطحون وتاكلينهم بخبز عادي يفضل انه اسمر وتشربين معاه كوب حليب ساخن مع ملعقه
من هذا الدواء..~> الدواء تكونين مجهزته ببرطمان وهو(( كوب حلبه + كوب ماش مطحونات))
وتنامين او تجلسين براحتك
الساعه 7 ونص او 8 الصبح تصحين وتروحي الحمام وتبدلي واذا حاطه زيوت او كريمات بوجهك او جسمك تصنفري وتغسلي..
ومباشره تفطرين خبز بر مفتوت ويحط معاه ملعقتين من هذا الدواء ~~> الدواء تكونين مجهزته ببرطمان وهو(( نص كوب حلبه+ نص كوب ماش+ نص كوب كمون+ربع كوب حبة سودا+ربع كوب حلوه+ فنجان فلفل اسود )) وتشربين معاه حليب بزنجبيل
روقتي الحين-- بدلي للبيبي ورضعيه (( صدرك ))وبعدها اذا حابه تنامين او تصحين اهم شي ريحي ظهرك
بعد ساعتين تغلين مويا وتصبينه في الترمس على ملعقتين من هذا الدواء~> مدقوق بدون طحن انتبهي! الدواء تكونين مجهزته ببرطمان وهو ((نص كوب حلوه+ نص كوب كمون+ نص كوب قرفه>>( اعواد صغير)+ نص كوب حزا+ نص كوب قيصوم+ فنجان يانسون+ )) الترمس هذا خليه جنبك طوال اليوم واشربي منه اي وقت ..الشاي هذا طواااال الاربعين تسوينه.
جاء وقت الغداء .. الغداء تغدي .. (( نظام الاكل راح اخصص له موضوع ثاني بالتفصيل ))
تغدي رز مسلوق مع مرقة لحم وخضار .. او عصيدة لحم .. او جريش بدجاج .. او مرقوق .. او سمك مع رز .. اهم شي مع وجبة الغداء يومياً مدة الـ40 (( شوربة الماش)) وطريقتها كالتالي : يقطع بصل ويقلى مع زيت زيتون ويحط معه ربع ملعقة كركم+ ذرة فلفل اسود+ ذرة فلفل ابيض + ذرة ملح+ذرة بهار +فصة ثوم مبشوره+ويوضع عليها 3 ملاعق كبيره ماش مطحون ويصب عليها كوب وربع الكوب ماء وتحرك دقيقه ثم تصبينها في الخلاط ليما تتجانس وترجعينها على النار( خليها مو سايله مره ولا ثقيله مره تعرفينها بالنظر اذا احتاجت ماء زيدي شوي) تطبخ ع نار هادئه مدة 10 دقايق اذا تحبيها بالبقدونس افرمي معها .. وتقدم بالهناء..
وقت العصر.. قهوة القشر وهي :(( ملعقتين من قشر القهوه وتبهرينها بملعقه صغيره زنجبيل ناعم او تبهرينها بملعقة قرفه ناعمه ،، توضع في ترمس ويصب عليها ماء حار)) الترمس هذا سويه مرتين باليوم وخليه معاك ليما النوم كل شوي اشربي منه.. سر قشر القهوه ينظف ارحامك وتشيل الغازات اللي ببطنك والاهم انها تمسح الكرش وتضيق المنطقه..
وقت العصر مع القهوه سوي نوع من احد هذه الانواع من التمريات ~~> والتمريات باليوم تاكلينها مرتين.. العصر واي وقت ثاني تحبينه
-1 النوع الاول>>تمره معبوطه بملعقة دخن ناعم+ ذرات فلفل اسود+ذرات شمر وزيت زيتون اوسمن بري -2-النوع الثاني>> تمره معبوطه بملعقتين قمح محمص ناعم + شوية حبه سودا وزيت زيتون اوسمن بري -3- النوع الثالث>>تمره معبوطه مع سمن وملعقه ونص من نفس هذاالدواء>> الذي ذكرناه سابقا ((نص كوب حلبه+ نص كوب ماش+ نص كوب كمون+ربع كوب حبة سودا+ربع كوب حلوه+ فنجان فلفل اسود)) لاحظتو اني ماجبت سيرة الرشاد بالتمريات لان الرشاد بالايام الاولى مايصلح اول شي انه يسبب امساك ويفكك الخياطه وماتلتئم بدري . ثانياً انه يوقف الدم بدري! واحنا محتاجين ان الدم ينزل كله ولا يتبقى شي .. الرشاد دايم مع فترة النفاس العشرين الاخيره.
المغرب كولي اي شي تحبيه عدا (( ممنوعات النفاس))
بعد المغرب اشربي كوب حليب ساخن مع ملعقه من نفس هذا الدواء الذي ذكرناه سابقاً(( كوب حلبه+كوب ماش))مطحونات.
وقت العشاء .. تعشي مرقوق-او جريش او مطازيز او مكرونه او صياني .. او مشوي او سمك اي شي تحبينه ومفيد وخلي فيها لحم او دجاج وخضار مررره مفيده. مع سلطات وشوربات >>شوربة عاديه او شوربة العدس الاصفر او شربة الخضار
. اهم شي ابتعدي عن الاكلات السريعه و المقليات
مع العشاء اشربي من ترمس شاي الاعشاب اللي ذكرناه
*ليلياً مدة الاربعين كلها مع العشاء تسلقين حبتين بطاطس وتهرسينهم وتحطين معها ملعقة فلفل اسود او مقدار الفلفل اللي تتحملين حرارته..
طبعاً تنامين بوقت مناسب وابتعدي عن السهر . لان تحطين ببالك يمكن يصحي عليك البيبي ويسهرك فنامي بدري اريح لك . قبل النوم تاخذين مقدار كوب حليب ساخن مع ملعقه حلبه مطحونه (( تكونين مجهزه حلبه مطحونه لحالها بدون اي اضافة دواء اخر ))
وتسمين باسم الله وتبدلي (( وتحطين من خلطات الجسم للنفاس .. ساخصص لها موضوع خاص قريب ان شاءالله. ))وتناااامين


* هنا راح اذكر مأكولات ومشروبات مهمه تاكلينها وتشربينها بأي وقت من نفس اليوم يعني الظهر العصر اي وقت تحبيه مافي وقت مقيد>>
*تناولي الرطب بأي وقت تحبينه
*عصيدة التمر مهممه سويها دايم
* اطحني مقدار من المره واشربي منها ملعقه صغيره مع قهوه او ماء دافي مره او مرتين باليوم فقط.
*تنقعين نص كوب لبان ذكر مطحون في علبة مويا ام ريالين (( وتشربين منها يومياً كوب مدة الاربعين .. وكل ماخلصت الكميه سوي جديد>> مهم يشد الجسم ويمنع الترهل
*قبل الولاده بفتره >>تسوين اقراص من هذه الوصفه وتاكلين منهن حبتين باليوم متفرقه مثلاً حبة الصباح وحبه المساء .. تبدين تاكلين هذه الاقراص من بعد 10 ايام من الولاده الى اخر الاربعين~>طريقتها(( ملعقتين زعتر جاف مطحون.
ملعقتين قرفه مطحون.
ملعقتين قشر الرمان مطحون.
ملعقتين كمون مطحون.
ملعقتين بدرة الكتان مطحون.
ملعقتين زنجبيل مطحون.
تعجنيهن بشوية ماء لحد مايتماسكن وسوي على شكل اقراص وحطيهم بصحن بالفريزر واذا جمدن حطيهن بعلبة قزاز واحفظيهن بالثلاجه ))<~ حبذا لو استمريتي شهرين على هالخلطه راح تمسح كرشك مسح هالخلطه.. والاهم انها راح تضيق المنطقه الحساسه بقوووه..
*الكركم حطي ملعقه مع كل وجبة اكل.
*الاكل دايما حطي معه ادويه مثلاً حطي مع المرقوق شوية حلبه حب وشوية حبة سودا وشوية فلفل اسود مطحون وكذا .. اي اكل حطي معاه . واذا ماتبغي عادي
*احرصي على شرب السوائل وخاصتاً الماء(( لاتقولين يضر هذه خربطة حريم .. عمر الماء ماضر احد بالعكس يطهر جسمك ويدرر حليبك ويحرك الدوره الدمويه .. اشربي يوميا لترين. ولايهمك اهم شي يكون عادي مو بارد ولاتشربينه على جوع انتبهوا
واشربي حليب طازج دافي او عادي واي حليب بتشربينه مع دواء يفضل يكون طازج يعني مو بودره والافضل يحلى بعسل اصلي .. واشربي عصير جزر دايم . واكلي حبة تفاحه يومياً ..
كثري فواكه. واشربي سوااائل كثير
كولي سلطه وركزي على الورقيات مثل بقدونس وجرجير وكراث<< الكراث والجرجير يومياً تاكلين مقدار صحن وسط مع شاي الاعشاب .>> لانها عجيبه في تنظيف الرحم وتضييق المنطقه.
سوي رياضة حركيه، ورياضة كيجل ، ورياضة مشي كل يوم ،بحيث العشر الايام الاولى تمشين 10 دقايق والعشر الايام الثانيه تمشين ربع ساعه . والعشر ايام الثالثه تمشين نص ساعه والاخيره 45 دقيقه.. الرياضه لها دور كبييييير على صحة النفاس .
*الفيتامينات مهمات جداً .. تاخذينهم ضروري مدة شهرين من بداية النفاس او اكثر على حسب وصف الدكتوره.

*تحذيرات:
_بخور النفاس احذرييه وابتعدي عنه لانه يضرررك.
التحاميل المهبليه المكونه من اعشاب احذريييها. تضرك ماتنفعك .
_الغسولات المهبليه المكونه من اعشاب تجنبيها قدر ماتستطيعين .. لان اثبت الطب انها مسببه خراااب كبير للحريم . اكتفي بالمره والملح فقط ولاتكثرين منها
كل حاجه من تحت ابتعدي عنها .. ركزي على الاكل والشرب بالادويه هي اللي راح تنفعك وتشد المنطقه .
_القهوه العاديه ابتعدي عنها بتاتا وطبعا بدالها قهوة القشر اللي يوميا راح تشربين منها ترمس من الصباح للظهر وترمس من العصر للنوم (( ترمسك راح يكون حجم الصغير )) مو الكبير ذكرنا طريقتها سابقاً

المنطقه الحساسه:
يومياً من اول يوم من الولاده الئ ان تسقط الخيوط تاخذين شوي من كريم فوسوداين وشوي من كريم ميبو تخلطينهن وتضعينهن على الجروح..
غسلي بمطهر بيتادين ~> زين للجروح
يومياً تتنقعين بشوية مره وماء داافي مدة عشر دقايق لغاية ماتسقط الخيوط
الملح لاتتشطفي فيه الا بالعشرين الاخيره عشن ماييبس الخيوط وتسقط قبل وقتها .
للمنطقه الحساسه افضل شي انك تتنقعي بس باللي ذكرناه .. واذا حابه تتشطفي بملح ومره، فقط بالعشرين الاخيره..
بدلي الفوط كل ثلاث ساعات .. وافضل شي تسوي قطن بشاش طبي مريح جداً وماتلتهب الخياطه معاها. افضل فوط من تجربتي فوط برايفت وفوط كوتكس
اذا حسيتي بالتهاب حاد علامة انه شمم خذي كسره حلتيته وذوبيها بمويا مع مره وحطي بالقطن على الجرح وكمان نقطي نقاط بسيطه على الفوطه من موية الحلتيت..
* امسحي الخياطه بزيت زيتون يهدي الحكه ..



*خلطة الظهر تستخدم 10 ايام فقط بالعشرين الاولى : هذي الخلطة فقط للي تعاني من تمزق بالظهر والوروك ،، اللي ظهرها مايعورها وماتفكك من الحمل لاتستخدمها، تاخذين ملعقتين من هذه الخلطه وتصبي عليها حليب ساخن مقدار كوب تكونين مجهزتها ببرطمان صباحااً ومساءً(( فنجان حلبه ناعمه +فنجان ماش ناعم+ فنجان رشاد حب + فنجان شبه سوداء)) << في فرق بين الشبه السودا والحبه السودا .. الشبه كثرتها تضر اما اللي تستخدمها ايام قليله باذن الله تجبر ظهرها وماعاد يرجع لها الالام بعد الاربعين.

* العشرين الاخيره: غالبه نفس نظام العشرين الاولى باستثناء بعض الادويه
خلطة الفجر راح نشيل منها الحلبه ونكتفي بالماش مع فلفل اسود .ملعقه ( نص كوب ماش + فنجان فلفل اسود)
اي خلطة فيها الحلبه نسوي منها ثانيه بدون حلبة ونكمل النظام نفسه ..
الرشاد يومياً تستخدمينه مرتين باليوم حدود ملعقه مع احدى التمريات اللي تحبين .. الفلفل الابيض راح يكون مع كل وجبه ناكلها .. جريش مرقوق رز مرق اي شي ناكله لابد معاه فلفل ابيض ناعم
قبل النوم بدال كوب الحليب مع الحلبه نستخدم ملعقه كبيره مع كوب حليب ساخن من هذه الخلطه اللي نجهزها ببرطمان (( نص كوب ماش+ نص كوب فلفل ابيض + نص كوب زنجبيل)) مطحونات
الكراث والجرجير توقفي عنها قبل نهاية الاربعين بخمس ايام
الغسولات اذا تحبين سوي غسول ملح + مره فقط وتشطفي مرتين باليوم

طوال ايام النفاس تدفي بسروال قطني طويل . ولفي راسك عن الهواء.. البسي شرابات ..ليلياً دلكي جسمك وخاصتاً البطن والظهر وباطن الرجول بزيت زيتون دافي، وتلحفي زين ~>> يريح الارحام ويطلع هواء الارحام
* المشد مهم عشن يساعد في رجوع البطن.


* تلاحظون الادويه كلها مافيها لهوم دواء لان لهم الدواء مباشره يضر المعده والكلى . الافضل والصحي ينقع او يوضع مع اكل~~
* تنبيه : كل الادويه ماعدا الرشاد حاولي تغسلينها وتجففينها بمنخل وعرضيها للشمس قبل الطحن .. لان غسلها ضمان لك لان الادويه احيان تتعرض لايدي وسخه وغبار بالمخازن وبالمحلات.
*تنبيه ~~ اذا كنتي ترضعين طبيعي قللي نسبة الفلفل في اكلك ، وقللي الثوم ، والبهارات الحاره ، والبصل الاخضر تجنبيه، لانها تتعب معدة طفلك ويمكن تخليه يبتعد عن صدرك .
جزا الله خير لكل من رفعت الموضوع وعلقت ونشرت .. نتمنى ان تعم الفااااائده.. واللي تنقل الموضوع ياليت تذكر مصدره..
وترقبوني في موضوع خاص لتجهيز اكل النفاس.. خاصتاً للي راح تتنفس ببيتها وماعندها احد او ماعندها الا شغالتها .. اللي انا راح اتبعه بعد شهور قليله
وموضوع اخر عن خلطات النفاس للجسم والبشره .. اللي يحولك الى انثى فاااتنه