السلام عليكم و رحمة الله و بركاته ............
مساكم الله بالخير ....
البارحة يا طويلات العمر نشيت من الصبح الحمد لله فيه هبة على الشغل و في بالي كذا شغلة ....
بعد ما خلصت الأساسيات قلت خليني أرتب منظفاتي العزيزات و أشيكهم و استتهم كل على كرسيه ههههه أقصد في مكانه من زمان ما طليت عليهم يا دوب آخذ اللي أباها و الباجي يا قلبي عليهم يتكافخون من يشوفون الباب تبطل يا ويلي عليهم كلن يتقدم يبا يطلع ... ينفرج عنه
ما علينا بالطويلة .... شو رايكم نفتح الباب و أطل وياكم عليهم ...
أوووووووووووووووص بلييييز بلا صوت و شوفوهم يا حليلهم حبايبي .....باسم الله عليهم ... ما شاء الله لا حول و لا قوة إلا بالله .... (( عرايس نخاف عليهم ))
و هاي لقطة ثانية ...
طبعا هاي كل المنظفات ... للمطبخ .. الحمام و إنتوا بكرامة .. و للملابس ... و الأكياس و غيره ... جايين فالكلام ..
هاي السلة واايد نافعتني و مب ماخذة حيز كبير و شالة أغراض كثيرة ..
أول رف فيه المنظفات الصغيرة لإزالة البقع من الملابس عدد 2 ، و بالإضافة لقلم الكلوركس المبيض .. و رول أكياس الزبالة السودا و إنتوا بكرامة ... و في الرف التحتاني أكياس الليف و الاسفنجة العجيبة و أكياس الإسفنج ...
و السلة الثانية ::
(( هاي الصورة بعد الترتيب ،، يا ربي حتى الصورة مستعجلة تبا تطلع ... إلا أنا شو مسوية فيهم ؟؟؟ هههه )))
المهم ::
مثل ما تشوفون .. في الرف الأول كرتون القفازات سهلة في التناول .. و كرتون أقراص ملين الملابس أحطه فالغسالة أثناء الغسيل تلطف و تلين و تنعم الملابس .. و قطعة فوطة عجييبة تمتص الماء من أي سطح و تحتفظ به داخلها ما تنقط أبد و بعد العصر تقدرين تستخدمينها مرة ثانية .. صدق عجييبة شايفتها افي الدعاية في قناة هي (( قناة المرأة العربية !! )) المهم ... و في الرف الثاني كرتونة فحم جديدة و لافتنها في كيس عشان ما تخرس بالماي .. و دواسة نايلون بين و بين أفرشها أمام المجلى .... و شو بعد ؟؟؟
أوووووه لا ماذا أرى ؟؟؟؟؟
شوفوا شو سووا ...
هههههههههههه يا حبايبي صفوا طابور عشان الصورة ... يا قلبي إنتوا و لا يهمكم خلاااااااص :42:
بالدور بالدور
يلا ببدأ أعرفكم ... فانيش .. قود ميد ( مزيل البقع المعتمد عندي و النادر ألقاه ) .. بخاخ للحمام بدل الصابون و هو مصنوع من مواد عضوية و ريحته رووعة ..جف .. ديتول البخاخ للحمام .. ملمع الزجاج أخو البخاخ .. و هاربك .. و صابون غسيل اليد ....
للخلف دور ..:16:
يلا الصورة الثانية ..
ملمع الخشب من إيكيا .. ملمع الزجاج .. و صابون العبي و الغتر ( الشماغات ) بريحتين رووعة .. المزيونة و مخمل .. فيري المذيب العجيب .. فلاش .. داوني .. و ديتول مركز ..
صبر صبر ... شو قلنا بالدوووووووووووور ....
يلا صفوا ..
أومينوو ( صابون و ملين للعبي ) .. بف باف البخاخ و البودرة .. فورس منظف للأفران .. و دراي كلين مزيل للبقع بعدني ما جربته ... و علبة يطلع منها الفوم لتغطية الفتحات الصغيرة في الجدران .. و علبة صابون الوزير المبشور .....
يلا بريييييييييك و راجعة ......
(( في الكواليس :::::::: آآآخ منكم حبايبي ما قلنا بالدور زين جذيه فضحتونا ... و لا مب واقفين بالطول بعد ... الله يستر بس شو بيقولون الناس عنا ؟؟؟؟؟؟؟؟؟؟؟؟؟ )))))
تم تحميل الصور من موقع اخر لحفظها
سمن وعسل
يعطيك الف عافيه شغل متعوب عليه