الحياه حلوه .. @alhyah_hloh_2

عضوة

تعالوا اقرأو قصة حياتي ..

السلام عليكم ورحمة الله وبركاته ..

طبعاً هذه القصه قصة اختي التي تجلس بجواري الآن ..

وقد طرحتها في أحد المنتديات الأخرى ولأنها لم تجد الحل المناسب لكل مشاكلها ..

قررت ان تطرحها هنا عل وعسى ان يجعل الله من بينكن من تفيدها ..

بسم الله نبدأ :

(( يمكن بطول شوي اعذروني بس اباكم تفهمون كل جوانب القصه ..

عشان تحكمون صح وتشوفون الحل المناسب ..

لاني مابخليكم الا لما تدورون لي حل ..

انا سيده متزوجه من 13 سنه وعمري 30 سنه .. ولي من الأطفال سته والحمدلله ..

تزوجت زواج تقليدي .. ولكن كان زوجي معجب بي من قبل الزواج ..

وطبعاً لما تزوجت كان عمري وعمره 18 سنه ..

ومن بداية زواجنا ومن ليلة الدخله تحديداً قال لي زوجي مقتدياً بالمثل القائل : اذبح لها القطه من ليلة عرسها ..

فقال لي : ترى ان صار وزعلتي ورحتي بيت اهلج ماني برادنج ..

كأنه عطاني بوووكس .. لكن طوفت كالعاده .. لانكم بعدين بتعرفون اشكثر اطووووووووف ..

المهم كان زوجي يعمل بنظام الشهرين لشهر .. يعني في الشغل شهرين وفي البيت شهر ..

وبصراحه شهرين للشغل والشهر الباقي للربع .. لانه من يوم يرد لين يروح واهو مجابلهم ..

يمكن يتغدا يوم بالغلط في البيت ويبيت كم يوم والباقي للوناسه والسهر والسفر والصياعه ..

استمر هالحال تسع سنين ..

الى ان استقر شغله في نفس المدينه وصار دوام عادي يسير الصبح ويرد الظهر ..

والحقيقه اظلم جهة عمله لو قلت انه كل يوم يروح ..

الصراحه يمكن هم بعد مثلي مايجيهم الا كل كم يوم .. والباقي الله اعلم وين يقضيه ..

وطبعاً طبع الإهمال في زوجي من يوم خذيته .. لايهتم بالبيت ولا بالشغل ولا بالعيال ولا بأمهم ..

وكل ماكلمته او نصحته او هاوشته ماشي فايده ..

يقول : انا كذا ومابتغير عاجبج حياج وان ماتبين تعرفين طريق بيتكم .
ولدرجة اني دخلت ابوه في الموضوع .. وكان رده للاسف سلبي جداُ ..

يعني خليه يعيش حياته مدام مو مقصر عليكم بشي .. مع العلم ان التقصير موجود ..

يعني مانتشرا اغراض الا من العيد للعيد ..

وهالشي في هالوقت وايد صعب وخصوصاً إنّا نشوف غيرنا كيف عايشين ..
وانا طبعاً اصبر حسب تعليمات الوالده .. والسبب الاهم عيالي مااباهم يتشتتون بينا ..

عشان مايعيشون نفس طفولة ابوهم .. لانه كان متشتت بين ابوه وامه المنفصلين ..

المهم ياخواتي اني الين يومكم هذا وانا اعيش نفس الحاله هذي ..

بالاضافه الى اني لقيت ارقام بنات في تلفونه وكل مااواجهه ينكر ويقول يمكن حد من الربع استخدم التلفون ..

الين صار يسوي له رقم سري ..

وبالاضافه بعد انه دوم يطالع الصور الخليعه والافلام الجنسيه في الانترنت الموجود في بيت ابوه ..

واللي طبعاً ممنوع علي الاقتراب منه ..

ولا يسمح لي بالاختلاط كثير بالناس الا المقربون جداً جداً .. ويباني بس ربة منزل ..

و حتى دراستي ممنوع اكملها علماً اني عندي ثانويه عامه بس وبعد طلعة روح دخلت دورة i c d l ..

يمكن هو متعقد لانه مادرس الا الى الأول إعدادي ..

وبالرغم من اني جميله وجسمي متناسق بشهادة من حولي ومن ضمنهم زوجي ..

لكن يسوي هالأشياء مااعرف ..؟!

وطبعاً طيبه ومتساااااااااااااااامحه جداً ومااقصر في بيتي وعيالي ونفسي ..

واهتم فيه من كل النواحي العاطفيه والجنسيه وبعد كل ولاده اسوي خياطه عشان يكون مرتاح وياي ..

واكله دايم متنوع وبيته نظيف واهله مااقصر وياهم ..

ولو تصدقون اني انتظرررره كل يوم من 13 سنه ماانام لين مايرد الساعه 1 2 3 وممكن 4 او 5 ومرات لل 6 و 7 ..

وانوع في شكلي ولبسي وحتى اسلوبي ..

وماادري إنتظاري له كل يوم صح او خطأ ..

صاحباتي يقولون لاتنتظرينه وبيرد بدري لكن مااقدر ..

لاني اجرب ثلاث ايام او اربع بالكثييييييير اسبوع واشوف انه يمصخها ويزيد في السهر اكثر ..

فأضطر اني ارجع وانتظره لاني اكون قلقه جداً عليه والوساوس تلعب بي .

وماقصرت بعد معاه في النواحي الماديه ..

لانه مبذر ويصرف على نفسه وعلى ربعه ببذخ .. وعلى سفراته ووناسته ..

وكل ماجاني متأزم بعت قطعه من ذهبي لعيونه ..

عشان يستانس ويحس اني احبه واقول يمكن يقدر لي هالشي ..

ولكن للأسف مايبين بعينه شي ..

ولكني مااتوب كل ماجاني حزين ومكسور الخاطر جبرت خاطره باللي عندي ..

والحين اواجه اكبر مشكله .. وهي انه طلعت لنا من الحكومه ارض باسمي وباسمه ..

وطلب مني اسوي له توكيل عام عشان يقدر يسوي اجرائات البناء بسرعه والتوكيل معاه الى هذي اللحظه ..

وقال انه بيبيع نص الارض لاخوه عشان يقدر يبني فلتين .. وحده للإيجار والثانيه نسكن فيها ..

وفعلاً صار هالشي ..

وبنينا الفلتين وهي على وشك انها تتشطب ..

ومثل كل الشباب دخل من فتره الأسهم وخسر فيها وايد .. وعليه ديون كثيره شي للبنك وشي للناس ..

والآآآن طلبه الجديد ..

إني اتم في بيتي هذا المكون من غرفتين ومطبخ وحمام انا وعيالي السته وشغالتي ..

وهو بيأجر الفلتين عشان يسدد بها ديونه ..

وحط لي خيارات من ضمنها انه يسكني بشقه لو ابا .. او يزود لنا غرفه في بيت ابوه ..

والحقيقه انا محتاره

أولاً : لأني مش مطمنه من ناحيته ..

يعني اخاف الفلوس هذي يرد يلعب فيها ويسافر او يعرس او يصرفها على بنات الحرام ..

ثانياً : اني مرتاحه في المنطقه اللي انا ساكنه فيها حالياً ..

والفيلا في منطقه مقطوعه محد ساكن فيها لي الحين ..

وبعد مش مأمنه في البنا يعني المطبخ برا في الحوش والدرايش بدون حدايد ..

ولا في منطقتنا دكاكين ولا مدارس ولا حتى مسجد .

وهو الحين مصر اننا نتم في بيتنا او نروح الشقه وانا رافضه ..

وزوجي بطبعه قاسي وجاف وعنيد وأناني ومغرور ويموت في الخقه والمظاهر ..

وهاللي مخلي ربعه يقصون عليه ..

كل مايمدحونه اكثر يزيد يصرف عليهم اكثر ..

وللعلم التفاهم والاحترام هذا شي مش موجود بحياته ولكن الحين اكثر ..

وإذا صار بينا خلاف كبير يمد ايده ويضرب وهالشي مب جديد عليه ..

وحتى لو بعد المشكله تصالحنا يكون الصلح مجرد نقاش في المشكله وبس ..

ويرجع يسولف ويتكلم عادي ولا كأنه سوا شي ..

وماادري شو اسوي ..

انتظر منكم الحل للآتي وكيف اتعامل مع شخصيه مثل هذا :

1: السهر اليومي الى وجه الفجر والسفر للخارج عالأقل مرتين في السنه .

2: الانتقال او لا .

3: إدمانه على الصور والافلام الخليعه .

4: تبذيره على نفسه وعلى الناس وبخله معاي انا وعيالي .

5: عدم احترامه وتقديره لي .

6: تسكير تلفونه برقم سري .. لاني واثقه انه يكلم بنات .

7: الكذب والجفاف معانا في التعامل حتى مع عياله اللي مايشوفونه احيانا بالأيام .

لاتبخلون علي يابنات بالرد لكل النقاط اللي ذكرتها لاني حقيقة واصله حدي ..

وانتظر ردووودكم بفااارغ الصبر لكل النقاط لاتنسووووون كلها .

وجزاكم الله خير ))

إنتهى الى هنا كلام اختي والحين دوركم انتم ..

يلزم عليك تسجيل الدخول أولًا لكتابة تعليق.

تسجيل دخول

دمعه ورديه • 18 سنة

السلام عليكم......:26:
اختي الحبيبه الله يوفقك ويسعدك دنيا واخره...............ما فيه بالدنيا اهم من الزوج والبيت الملك فلا تفرطين فيهم.واذا كان زوجك وصل لهذي المرحله فأسمحيلي انتي السبب؟؟؟؟؟؟؟؟؟؟؟
اذا كان كل هذا تسوينه وما جاب نتيجه ليه ما تطنشيييييينه........طنشيه فتره طويله لين يحس فيك بس بدون خناقات اومشاكل.
يعني اذا قال: غريبه نايمه بدري ؟قولي: تعباااااانه ولا عندي صداع وبعدين حبيبتي ليش دايما تعطينه وانتي عارفه على ايش يصرفهم,يعني انتي (اسمحيلي على هذي الكلمه)تساعدينه على الحرام.
المقصود من كلامي انك تسوين كل واجباتك الزوجيه والأسريه كأدا واجب فقط واذا طلب مال تعذري بأي عذر ومستقبلا ما فيه داعي يعرف ايش اللي عندك.
بالنسبه للبيت اذا كان زي ماتقولين ممكن تقنعينه انكم تسكنون وبعدين الحي راح يزدهر ويصير فيه مدارس ومسجد وغيره الا اذا كنتي غير مرتاحه فيه !.........الله يوفقك وعليك بالدعاء لزوجك:arb:
تأخرت..........راجعتلك ان شاء الله

ام الخمائل • 18 سنة

انا عندي لك كلام قاسي جدا...
إذا بتتحملي وتبغي غيرك يستفيد قولي لي انزله هنا....... والا بارسله لك عالخاص...

وإذا بتزعلين قولي لي من الحين ارتاح...

ياويلكم مني • 18 سنة

وحدة الارشاد الاجتماعي في السعودية
استشارات تربوية ونفسية واجتماعية ودينية مجانيه على الهاتف
8001245005
يوميا من 6-9 مساً
اتصل بالمشروع على الرقم 2297777واعرض مشكلتك واطلب المساعدة واستمر في تلقي التوجيه حتى يتحسن وضعك .
والله يحفظك .
------------
هل يصلي , اذا كان نعم فاستمري معه مع محاولة النصح,
عندما يضيق صدري بادري بقول إن لله وإن اليه راجعون و لاحول ولاقوة الا بالله, اللهم اجرني في مصيبتي هذه واخلف لي خيرا منها.
ولا تنسي الاكثار من الاستغفار والصدقه والصلاة على الرسول صلى الله عليه وسلم.

واذا كان لايصلي فلا يجوزجلوسك عنده والفتاوى كثيره في ذلك وارسلي او اوصي من ينصحه ويخوفه بالله.
اسأل الله ان يجمع بينهما بخير.

فاتنة الورد • 18 سنة

لا حول ولا قوة الا بالله ....الله يكون في عونك ويصبرك
انصحك تكلمين الاستاذة ناعمة الهاشمي وفي لها موقع اسمه مملكة بلقيس لتاهيل الاسري وان شاء الله بتفيدك

ريف الرياض • 18 سنة

الله يكون في عونك...اكثري من الدعاء

قريت قصه هنا ...وكانت منقوله...
نسيت القصه ونسيت الناقله...
المهم انها تشبهك في بعض التفاصيل... ياليت اذا احد يتذكرها يعطينا لو اسمها ونبحث عنها..

المهم انها زي ما قالت فاتنة الورد...زارت الدكتورة ناعمه الهاشمي
(نفسي ازور الامارات عشان اسلم على هالدكتوره:D ) ...الله يوفقها دنيا وآخره...