تعالوا اقولكم قصة ولادتي وكيف الوحده بسرعه تنسى وتفكر بالثاني بسرعه ..

واليوم انا بقولكم قصة ولادتي ..

الله يسلمكم في آخر يوم في رمضان قعدت من النوم الساعه 9 الصبح على العاده ابي اروح الحمام (وانتوا بكرامه) .. وانا اتغسل شفت شي زي الجل مخلوط بشوية دم .. وبدا الخوف .. واتصل في زوجي كان رايح يتحلق عشان العيد واقوله لا تروح بعيد فيني ولاده بس لسه ما جا الالم وهو يقوللي كلمي امك وانا اقوله توه الناس .. وبعدين دقيت على امي وتجيني ركض يحليلها .. المهم قالت مدام مافي الم ولا ماي خليج في البيت وهي راحت تجهز البيت عشان العيد وتجهز الفطور .. وانا جهزت الشنط وسكرت كل شي وتسبحت وجاهزه اروح المستشفى بأي وقت .. الساعه 12 قلت خلني انام شوي ونمت لغاية 3 ونص الظهر واقوم من النوم على نزلة الماي وركض للحمام .. واتصل في زوجي واقولله ياللا تعال وامي بعد ورحنا المستشفى وسوولي الكشف (والله انه الكشف التحتي يألم اكثر من الولاده) طلع الرحم فاتح بس 1 سم .. وقالولي مافي طلعه خلاص .. ونمت عندهم لغاية ثاني يوم وهو يوم العيد وانا ولا الم ولا شي وجتني الدكتوره الصبح وعطتني تحميله تحمي الطلق وكانت الساعه 11 الصبح وبدا الطلق عندي الساعه 2 الظهر وقالولي لو ما زاد الالم تروحين الولاده وهناك طلق صناعي وفعلا الساعه 7 ونص المغرب دخلت الولاده ومعاي امي وزوجة خالي .. في البداية كنت بطل ومتحمله الالم ولا اخذت اكسجين حتى لكن على الساعه 2 بالليل راحت قوتي وتعبت واخذت ابرة المسكن ونمت انا والبيبي والالم شغال .. وطبعا مع الاكسجين والابره اشتغل الهذيان .. وظليت ابكي من الالم واقولهم انتوا عطيتوني ابره اي كلام انا بعدني اتألم واقول لامي الحريم يدخلون بعدي ويطلعون قبلي وانا قاعده ومسكينه امي تهون علي وانا اقولها سكتي الله يسامحني والله ..
واخيرا جه وقت الدفع وتقوللي القابله لازم نقص وعطتني ابرة مخدر وتقوللي اول ما يجيكي الالم ادفعي وادفع وادفع والحمدلله طلع عبادي حبيبي واول ما سمعت صرخته وانا اضحك وابكي وامي يحليلها تبكي معاي وحطوه على صدري ولفيت على امي اقولها شوفيه ما لقيتها كانت تحت تسجد شكر لله يحليلها .. وبعدين كانوا يبون ياخذونه وانا اقولهم لا خلوه (على كيفي) .. وكانت الولاده الساعه 5 ونص الفجر في ثاني ايام العيد ..
وبعد ما خلصت حسيت عمري ابغي ارجع وصار استنفار وما اقدر ارجع واحط صبعي عشان اغصب نفسي ورجعت وارتحت الحمدلله .. وجه وقت الخياطه وعطتني ابره وتخيط الدكتوره .. وقالولي بعدها لازم ترضعين البيبي قبل لا تروحين العنبر ورضعته حبيبي ورحنا العنبر وبعدها ما حسيت في الدنيا .. واحس يوم الولاده كان حلم بالنسبه لي .. سبحان الله عشان ربنا ينسينا الالم ونحمل ونجيب ..
والحمدلله عدت على خير وان شاء الله عقبال الولاده الثانيه .. وربنا يسهلها ان شاء الله ..