تعالوا اقول لكم قصتي عن حملي والاجهاض الكاذب وبعدها موت الجنين

السلاام عليكم..
شخباركم ...!!

طبعا تتذكرون موضوع فرحتي بحملي و بعدين نزلت موضوع اجهاضي..بقول لكم نهاية قصتي..وقصة الدكاترة اللي ما منهم فايدة...

في البداية فرحتي بالحمل.. وفي اليوم الثاني نزل علي دم... رحت مستشفى الامريكي و قالوا لي انه يمكن اجهاض..و ارتاحي و لاتتحركين و و و و.. وخذو مني دم و قالو لي هرمون الحمل عندي 31 و انا كنت 4 اسابيع تقريبا ..يعني وايد نازل....المهم، وقالوا لي اذا زاد الدم رجعي
وبعدها مدحوا لي دكتورة اسمها فكرية.. المهم عقب ما زاد علي الدم رحت حق الدكتورة فكرية قلت انها اكيد احسن..
فحصتني و قالت لي ان الجنين نزل و مافي كيس حمل و خلاص... وقالت لي ان الدم بينزل عليج ثلاثة ايام تقريبا وخلاص حتى مايبي لج تنظيف...

وانا صدقتها و رحت البيت..ثاني يوم وقف الدم خير شر... استغربت!! وقلت اكيد هذي ماتفهم شي...رحت حق دكتورة ثالثة شاطرة في الالترا ساوند و اهي مو طبيبة متابعة.. المهم ، وفحصتني و قالت ان الجنين موجود..ماصدقتتتتت و راوتني الكيس وراس الجنين وجسمه وكل شي...وقلت لها على كلام الدكاترة اللي قبلها و قالت لا تستعجلين.. و انشاء الله كل شي طبيعي..
المهم رحت البيت دورت لي طبيبة شاطرة للمتابعة.. وبعض الاخوات في المنتدى الله يجزيهم الخير امدحو لي الدكتورة فرح.. بس للاسف انها كانت وااااااايد مشغولة وماعندها مواعيد.. بعدين رحت عند دكتورة اسمها منى الشرقي
وشافت صورة الجنين اللي صورتها عند الدكتورة اللي قبلها و قالت انه كل شي طبيعي و الجنين في هالصورة 5 اسابيع و انتي الحين عمر حملج نهاية 5 اسابيع.. يعني كل شي تمام

وانا ارتحت و فرحت و قالت لي تعالي عقب اسبوعين و شوي عشان تسمعين نبض قلب الجنين وتفرحين.. وعطتني فوليك اسيد

وفي نص الاسبوع الاول نزلت علي قطرات الدم نص الليل..ورحت مستشفى الامريكي مرة ثانية خذو مني دم و انا كنت في بداية الاسبوع السابع و قالو لي ان هرمون الحمل عندك 431 يعني من اخر مرة يييتي فيها ما ارتفع واايد على عمر حملك والمفروض يكون اكثر من جذي بوااااايد و انه يمكن حمل متأخر.. وعطوني مثبت
ورحت البيت وبعد يومين تقريبا وقف الدم والافرازات البنية وفرحت و قلت ان طفلي بخير الحمدلله..

وللاسف ، قرب موعدي مع منى الشرقي وكان امس.. ورحت لها و فحصتني و قالت مافي نبض ، والجنين اصغر بكثير من 8 اسابيع و الطفل بينزل ومابيكبر اكثر من جذي.. واحمدي ربك لانه اذا كان بيكبر في هذا النمو البطيء بيكون مشوه او شي لاسمح الله و الف الحمدلله.. وقالت لي لاتوقفين الفوليك اسيد لي ما تحملين مرة ثانية و لي شهرج الثالث ، وحتى قالت لي مايبي لج تنظيف

بس انا خايفة,, و قلت اذا نزل الجنين بسوي تنظيف و ماعلي منها..

المهم .. ورجعت البيت وحالتي ماتسر لااعدو ولا حبيب
كل واحد فيهم قال لي شي..تعبوني والله..
بس عقب مافكرت قلت الحمدلله والف من شكره ان الجنين مات اوبيموت وبينزل .. افضل من انه يكبر ويكون مريض او شي لا سمح الله

وانشاء الله بروح اخر مرة عند دكتورة اخصائية و بجوف شنو اخر كلامها عن الجنين عشان اتاكد انه مات خلاص.. وبس انتظر نزوله,, لاني بصراحة ما اتحمل مفاجات اكثر من الللي سووها فيني..

المغزى من قصتي انكم تنتبهون من الدكاترة..بس يبون الفكة و يقولون اي شي للمريضة عشان اللي بعدها تدخل.. الله يسامحهم على كل اللي سووه فيني
الحمدلله على كل حال والله يعوضني في غيره