بسم الله الرحمن الرحيم
من منطلق لاحياة مع اليأس حبيت اقدم لكن تجربتي في عالم الزراعه قبل قرابة شهر تقريبآ طلبت من جارتي غصن من الريحان اللي عندها وبحكم خبرتها بالزراعه قالت مو وقته خليه لماتبرد الشمس شوي يعني قبل الغروب بشوي >الأخت مرسله بنتها من جت من المدرسه
وبحكم انه يوم أربعاء فلازم جمعةالأهل
المهم يوم السبت بعد مارجعت من السوق لقيت بالمطبخ غصنين من جذورهن وباديات يذبلن سألت عيالي وش هذا ومن وين قالوا جارتنا ارسلته قمت حطيتهن بعلبة مي كبيره وتحطمت لما كنت اشوفهن يموتن يوم بعد يوم واوراقهن كل يوم تطيح اكثر من اليوم اللي قبله
خليتهن وأخذت غصن منهن وأخذت شوية تربه وحطيته بدلو صغير كان عندي وخرمته من تحت عشان يصرف الزايد من المي وغرسته به وأخذت من حبوبه وزرعته بنفس الدلو ونفس الشي كل يوم اشوف اوراقه تذبل لحد ماطاحت كلها
قلت خليني اظل اسقيها لعل بيوم يطلع شي وقبل كم يوم وأنا اسقيها شفت الأغصان رجعت تخضر من جديد الا اوراق جديده طلعت
وظليت اسقيها وأهتم فيها وامس وانا اسقيها تفاجأة بظهور اول ورقتين الحمد لله الله عوض صبري خير
بقولكم وش صار بالغصن الاساسي لماجيت ارميه لأنه صار مجرد اغصان يابسه تفاجأة>>>ياكثر ماتفاجأ
الا وجذور جديده طالعه قلت معناته اكيد يطلع اوراق وترجع النبته من جديد
وفعلا هذا اللي صار لقيت براعم جديده ورجعت فيها الحياه من جديد والفضل يرجع بعد الله لبعض الأخوات هنا وبمواقع ثانيه وأكبر درس تعلمته ان النبته خاصه اذا كانت غصن والا عرق تزعل اذا راحت مكان ثاني ويبيلها ايام على ماتتعود على مقرها الجديدوالكلام هذا اثبتوه مختصين بالزراعه ومهندسين زراعيين
وتعلمت ان الري مو باي وقت له وقت مخصص حتى الجو له اثر على الزراعه
تعبت من الكتابة خاصه اني كتبت الموضوع بالجوال
وآخرا اتمنى موضوعي يفيدكن شاكره لكن تواجدكن وحسن قرائتكن
