تعالوا حلو مشكلتي خلاااص مليت بيطق فيني عررق

أخواتي بدخل بالموضوع على طووول .. والله ادري مشكلتي مالها حل أبد بس وش اسوي قلت تهونون علي مصيبتي

مشكلتي الوحيدة ومن الطفولة أمي

أمي إنسانة ما تحبني تخيلوا انا الان عمري 24 سنة يعني كبيرة وفاهمة كل شي حولي وجامعية بعد امي كل اهتماماتها اهلها واخواني الاولاد بس

ما تحب البنات حتى مرة قالت لي اذا جاك اولاد بتخلينهم عيونك :44: انا من زود حبها للاولاد كرهتهم واتمنى ما يجيني الا بنات

انا الان مملكة وباقي شهر واطلع من بيتنا وارتاح من هذا العذاب لكن تخيلو يا بنات امي تتدخل حتى في حياتي في المستقبل دايم تدعي علي وتقول الله يبلاك ببلوى ما تطلعين منها ودايم تقول ان شاء الله تكون حياتك مو زينه

مع العلم امي متعلمة وهي الي تحثنا ع العلم لكن للاسف ما تطبق علمها الا ع الناس وعند الناس وخوالي وعمامي تكون احسن وحدة في العالموكل الناس حاسديني عليها لكن في بيتنا لا جلسنا لحالنا تعالو شوفو

بنات انا ما ابالغ ابد تخيلو انا اصحى من لساعة 10 اسوي غدا الوالد و بعده على طول غدا اخواني لانهم ما يشتهون ياكلون نفس اكل ابوي يعني على 2 يكون غداهم جاهز وافطر اخوي الصغير واسوي لابوي قهوة اذا صحى من النوم هذي كلها اشغال روتينية يومية تجيب الملل والزهق والاكئاب غير اني اسمع من اخواني كلام والله ما ينقال لعدو

(يا كلبة يا حقيرة يا واطية .... وما الى ذلك ) والله يا اخوات انه شي يبكي ماحد في البيت يرحمني وبس تدخل امي تبدا مسلسل الشتم وانت حياتك فاشلة وانت ما تسوين شي عدل وانت عمرك ما نفعتيني والله يبلاك

تخيلوا اليوم بجد زهق وتعبت قالت لي سوي شاي الحين توه طلع ابوي من البيت وتوي جلست وانا اصلا بروح الحمام (فيني الدورة) وانتم بكرامة وزهقانة حدي
قمت قلت زهقت وانتم ما عندكم الا انا ؟ وتبدا انت كلبة انت ان شاء الله تجيك بلوى انت وانت وانت
تخيلو باقي شهر على زواجي بس وتدعي على حياتي المستقبليه

انا خلاااص فيني الصيحة وصرت اعاند لا قالت شي اسكت وما اتكلم لا اقولها طيب ولا لا بس اتم ساكتة ولا اناظر فيها من الاساس

هي عصبيييييييييييييييييييييييييه مررررررررررررررررة ومن تصرفاتها تبين انها ما تحب البنات مع العلم ما يخدمها الا انا ولا يعلمها على اللاب توب الا انا وما يسوي لها اغراض المدرسة كل شي الا انا

وانا ما تعبتها في صغري على الصلاة والدين الحمد لله من المتوسط اصلي بعكس اخواني ومع هذا ماااا تذكر ولا شي من محاسني وما تشوف الا عيوبي

تخيلوا يا بنات ابوي والله ما اسمع منه كلمة حلوة تخيلوا اني بهذا العمر لا طلعت من غرفتي الساعة 11 يجلس يهاوشني ويقول نامي وجع وجع قلبك >> هذا كلام ينقال لبنت على وجه زواج

والله اتذكر في المتوسط مرة فشلني في المكرفون حق الفراش قام ينادي اسمي الكامل ويسبني بنات ابوي مو مريض نفسي ولا يحشش ولا شي بس غليظ مرررررة لدرجة اول ما يدخل كل واحد يروح غرفته واخواني مرة ما يحبونه اصلا هو مرة جلف معنا

امي كانت تهاوشنا وتقول بالغصب احترموه هذا ابوكم والحين يوم كبرنا خلااااص طفح الكيل لا ام ولا اب كل واحد لاهي بشغله وحياته امي مع اهلها واخواتها وابوي مع اهله وحنا الي ضايعين بالطوشة

يجي كل واحد معصب من الثاني ويطلعون حرتهم فينا الظاهر :(

بنات انا ما يهمني وش بتقولون عني ادري بعضكم بيقول بريها وهذي امك مهما كان بس هي علمتنا الجلافة والقسوة حتى لما اجلس مع نفسي احيان واشوف اني مقصرة معها ودي اعاملها زي البنات ما يعاملون امهاتهم بس القاها تخاصمني وتقولي كلام كبير ما اقدر اتحمله

لا تقولون لي اجلسي معها انا ماااا اتكلم معها في ولا شي من صغري علمتني انه كلامي كله غلط ولا جيت احكي لها شي اما تسرح وتتركني اهذي لحالي او تقاطعني وتتهاوش مع واحد من اخواني او تهاوشني وتقول انت غلطانة

الصراحة انا فاقدة شي في حياتي ودي يكون لي ام مثل باقي البنات ارجع لها واشتكي لها واسولف معها لما اشوف بنات عماتي والله تخنقني العبرة ليه انا ما صرت وحدة منهم ؟

احيان احزن على نفسي وابكي طول الليل وادعي ان الله يعوضني ببنات اعوض فيهم كل الي انحرمت منه

امي ما تتقبل كلامي ولا ترضا اني اشتكي لغيرها يعني لما تشوفني اشتكي من اخواني لبنات عماتي وهم اقرب الناس لي تزعل مرة
طيب لمين اشتكي اموت بقهري ؟!!

الصراحة انا وحدة من عماتي اعتبرها امي لانها دايم تسمعني وتفهمني واحب بنتها حب جنوني لانها اختي من جد

طولت عليكم ادري بس والله من الهم الي فيني

بنات تكفون الي تقرا كلامي تدعي لي بحياة سعيدة مع زوجي زواجي بعد شهر .. ادعو لي انه حياتي معاه تكون هادية ومو مثل عيشتي في بيت اهلي

المشكلة انه امي بدت تفرض اراءها على حياتي معه من الحين تقولي توظفي ولا تجلسين في البيت وتهاوشني يعني مو توظفي براحتك لا توظفي بالغصب وحدة من خالاتي هي الي تكلمها وتقولها فتحت وظايف وخلي بنتك تقدم لا تجلس بالبيت ومدري شنو

بنات انا جربت التدريس اولا ما ناسبني وما شفت نفسي فيه ولا حبيته غير اني جربت حياة بنت الموظفة كل همها وظيفتها وبنات المدرسة وكيف تحل مشاكلهم وتصحيح وتحضير واحنا مالنا مكان بحياتها ابد

غير انها صيري مثل بنت صديقتي وبنت صديقتي فعلت وانت ما تسوي زيها وانا ما احب هالطبع

هذا كله كوووم وانه زوجي يبيني في البيت كوم .. زوجي قالي انه يبيني اجلس في البيت وانه يبيني انظره واضبط البيت لما يجي وما يبي انشغل بشي عنه يعني انا واياه متفقين وامي من اليوم وهي توظفي توظفي

انا مو فرحانة لاني عروس اصلا ما حسيت بفرحة العرس يعني هي تخطط مع خالاتي للعرس و جهازي واحيان تبدل منه بكيفها مررررة ماني مبسوطة احيان اقول يمكن يجيني مرض يلازمني طول حياتي والله دايم افكر بالسرطان من كثر ما تدعي علي

آسفة والله طولت عليكم بس حالتي حالة وكنت منقهرة مرة ولو سمحتم الي عندها كلمة حلوة تقولها الي ما عندها لاااا ترد على موضوعي الي بتسب ومدري شنو تحفظ بكلامها لنفسها

ادعوو لي يا بنات:26: