السلام عليكم و رحمة الله و بركاته
كيف الحال ياأحلى خوااااااااااات؟؟
اليوم جايبه لكم شي جديد تقدمينه مع الشاهي خفيف و حلو..
اللي هو سويسرول مالح ولو بغيتي خليتيه حالي إذا غيرتي الحشوه طبعاً<<قولي قسم
المهم نبدأ بالمقادير:
ثلاث حبات توست
ثلاث حبات جبن
ثلاث حبات بيض
علبة قشطه
ملعقة باكينغ بودر
شوي فانيلا
وهذي صورة المقادير:
نخلط كل اللي فوق بالخلاط وان تسان خلاطكم صغير مثل محاتسيتكم اخلطوا على شوي شوي مثلاً حطي بيضة بعدين شريحة توست مقطعه بعدين بيضه وهكذا بعدين شغلي الخلاط ثم طفيه وحركي بالملعقه وارجعي شغلي
مهوب بكره تدعون علي لا خرب خلاطكم<<ترى أمي ماتهاوشني الا مني خربت الخلاط
ترى كل هالشرح اللي فوق للي خلاطهم صغير بس اللي كبير تتوكل على الله ولا تناظر اللي مكتوب فوق
وهنا بعد الخلط الجيد
ونصبها بصينية تيفال المقاس الوسط
وندخلها الفرن من تحت بعدين من فوق
انتبهوا لا تتحمر كثير بس تشقير بسيط
وبعدين نطلعها ونخليها شوي تبرد
وفي هالوقت نجهز الحشوه
اللي تبين.ومثل ماقلت هالخليط يصلح تسوين به سويسرول مالح وسويسرول حالي بس في الحالي تزيدين عليه ظرف كريم كرامل و تخلين حشوته مربى ولا شكولاته بيتي كروكر او اي شي تحبينه
انا سويت حشوته تونه مع بصل وجزر و كروم وفلفل رومي وآخر شي لازم تخلطين له صوص عشان يمسك ولا يتفكك معك وانتي تقطعينه
والصوص حسب الرغبه جبن سايل ولا مايونيز اللي تحبينه..
وترفيعينه على صينيه بلاستيك وتفرشينها بالقصدير وتواسين الحشوه عليها بس لا تكثرينها عشان ماتطلع على الجوانب
وابدي لفيها بالعرض مو بالطول وبعدين لفيها مثل الحلاوه بالقصدير و دخليها الثلاجه شوي عشان تتماسك
وآخر شي طلعيها وقصصيها حلقات وقدميها
وعليكم بألف عااااافيه
