مرحبا اخواتي ..كيفكم ان شالله الجميع بخير ..
بصرااااحه اللي صارلي موقف لاأحسد عليه :06: وان شالله ماتمرون فيه ياااااارب
اللي صار ياحلوات ان وحده من صديقاتي اتصلت فيني الصباح وقالتلي (انا طفشانه ومشتهيه روحت البحر خلينا نروح ساعه او ساعتين ونرجع ) طبعآ انا انبسطت واستانست >>> تحب الفله والوناسه
قلتلها خلاص خليني اكلم زوجي واردلك خبر .. طبعآ الكلام هذا الساعه تسعه الصباح ..
كلمت زوجي وقالي خلاص بس اذا كان فيه اي مضايقات على طول تعطيني خبر وترجعين ..
قلتله اوكي خلاص وبعدين مين بيضايقنا على هالصبح (خفافيش الليل ) الحين نايمين .. وللي بالدوام .. مافيه احد فاضي هالوقت .. المهم اتصلت على صديقتي وقلتلها خلاص تعالي مريني وانا بجهز القهوه والشاي على بال ماتوصلين وتجهزت وطلعنا مع بعض (مع السواق ) >>> الله يعيني على تعليقات الحريم عشان السواق ..
الله الله المكان هادئ ولافيه احد الا انا وصديقتي ياحظنا >> حست ان البحر لها ولصديقتها ياويل احد يجي ..
نزلنا من السياره وقلت للسواق رح كبر مخدتك ونم .. والله يابنات قسم بالله بأقل من دقيقتين واحنا نقطع الرصيف عشان نوصل للمكان اللي نبي الا اكثر من اربع سيارات يدوروا علينا .. اللي رافع الاغاني .. وللي يقول تعالوا اوصلكم للي تبون بلاش .. وللي يقول تكفون خوذوا الرقم .. طبعآ انا خلاص حامت تسبدي وتنكدت وعرفت انه مستحيل اقدر اقعد او انبسط وهلاشكال موجوده .. وللأسف مش بس مراهقين والله حتى كبار فوق الخمسه والعشرين ..
المهم اثناء مااحنا نمشي وصديقتي اقطعت الرصيف وانا قاعده امشي الا تجي سياره قدامي يعني صارت بيني وبين صديقتي جيت بمشي من ورى ورجع ورى وجيت بطلع قدام صار يمشي قدام .. فهمتوا الوضع يعني صار يرجع ورى ومره يرجع قدام كأنه بيدعسني .. والمشكله الولد قسم بالله عمره مازاد عن العشرين مراهق وصغير وذكرني بشكل واحد من اخواني .. قلتله والله عيب اللي تسويه والله انك كبر واحد من اخواني وذكرتني فيه والمفروض ماترضى هالشي انت اكيد عندك خوات .. قال تكفين دامني اذكرك بأخوك خذي رقمي ..
طبعآ انا ماأشره عليه لكن اشره على اللي معطيه السياره وعلى اللي مكبره المخده ولاتدري وين ولدها فيه يأذي خلق الله وهي تحسب عيالها ملاك وياكثر هالنوعيه من الحريم ..
اللي صار اثناء ماهو مسوي حاجز بيني وبين صديقتي كان وراه مالايقل عن عشر سيارات شباب ومبسوطين على هالمنظر اللي يضحك وللي ينتظره يفتحله المجال عشان يعطي الرقم او يقط كلمه .. المهم ماادري وشلون عديت على خير وكانت صديقتي تنتظرني بالجهه الثانيه وكانت تضحك ( لاتلومونها شر البليه مايضحك )
وصلت عندها وقلتلها عز الله ماجلست دقيقه هنا بدق عالسواق اخليه يجي بسرعه ..
ودقيت عالسواق وقال اوكي انا جاي ..
طبعآ انا وصديقتي وقفنا عند باب مطعم لأنه صعبه نكمل خفنا احد يلحقنا والمطعم يقول ممنوع تدخلوا الا تطلبوا ..
شي غررررريب يابنات والله العظيم اكثر من ثلاثين سياره يدورون اللي يقط الرقم وللي يطلع الرقم بلوحه مجهزها بالسياره .. وللي رافع الاغاني .. وللي يترجى وللي يعرض خدماته .. انا بصراحه ماقدرت اتحمل هالمنظر فكرت اكلم زوجي بس قلت الحين يجي يشوف هالمنظر ينجن .. وماألومه شي مو طبيعي ..المهم جانا واحد باين من لهجته سوري محترم قال ليش ماتدقوا على الشرطه .. كنت مررره معصبه و قلت حتى الشرطه صار ينخاف منهم الحين .. بس خلاص سيارتنا بتجي .. المهم اشوف الرجال قعد يدق بجواله.. رجعت دقيت عالسواق وقال الشارع زحمه ويبيله ربع ساعه عشان يوصل .. لا لا مو معقوله مستحيل اجلس دقيقه هنا وشلون ربع ساعه .. المهم قلت على قولة الأخ السوري مالي الا الشرطه ودقيت عالشرطه وطبعآ تعرفوا الشرطه اول مايردوا يقولوا اسمائهم واسماء عايلتهم الا اللي رد علي لما قال اسم عايلته انصدمت طلع نفس عايلة زوجي ومن نفس المدينه وعايلة زوجي بنفس هالمدينه كلهم يعرفوا بعض يعني فضيحه .. وقفلت الخط ورجعت ادق مره ثانيه لعل وعسى يرد واحد ثاني وهذا اللي صار وقلتله موقعنا قال ايوه هذا جاي عليه بلاغ والشرطه قريبه عندكم (يعني الأخ السوري جزاه الله خير مبلغ )
وصلوا الشرطه وطبعآ كل السيارات هربوا ماعدا وحده اللي كان صاحبها مشغل الأغاني هم ثلاثه شباب .. وقال الشرطي هذولي عليهم بلاغات عن غزل مش اول مره .. يعني كنت متأكده ان دوريه وحده ماراح تسوي شي وبلاغي للشرطه كله عشان اقدر ارجع بسلام بدون ماأحد يطرد ورانا .. ولاتقولوا لبسكم مو ساتر او متبرجات لا والله الشاهد .. بس بعضهم لو يشوف خيمه سوداء منصوبه بالبر قعد يغازلها يحسبها حرمه .. المهم جاء السواق وركبنا بسرعه ولما جاء السواق بيحرك بيمشي جاء الشرطي من عند شباكي وايش تتوقعون قال : قال خذي رقم الجوال اذا احتجتي اي شي دقي علي !!!!!!!!!!!!!!!!! (حاميها حراميها ).. ولاتعليق على هالنقطه..
مشينا ووصلنا بيتنا بسلام وأمان .. لكن انحرمنا من الطلعات الحلوه والوناسه والسبب اخوانا وعيالنا ومحارمنا اللي نغفل عنهم ..
هذا الموضوع مغلق.
ام الحلوةمعين
•
ولا بعد يبونا نسوق سيارات
الصفحة الأخيرة