تعالوا شوفوا ايش صار لبنتي في اول يوم دراسي.........

بصراحة ماقدرت اكتب الموضوع من حالتي النفسية :( امس ولما اصبحت قلت خليني اكتبه واشوف راي البنات...:)
سلمكم الله بنتي في رياض اطفال تمهيدي مثل باقي الأطفال فرحانة باول يوم دراسي ولابسة البنت وكاشخة وديتها الروضة واحتفلوا فيهم وماطولت طلعت عشان ولدي الصغيربس قبل ما أطلع نبهت على الادارة ومعلماتها ان عنوان البيت تغير وعطيتهم كلهم العنوان الجديد ...لا وزوجي من خوفه على بنته طابع اوراق باسمها وعنوانها وارقامنا ومعطيها وحدة ومعلق على شنطتها وحدة ....
ولما جت الساعة 10,30 قلبي نغزني وقلت خليني ادق على الروضة لكن الله يسامحهم ماحد رد علي وجلست روزميري تحاتي والافكار تروح وتجي بالأخير لبست عباتي ورحت للروضة بهالحر وهي ماهي قريبة حيل منا..ولما وصلت ومالقيت الباصات رجولي ما عاد تقدرتشيلني.. وقعت اصيح واقولهم وين بنتي ...وبعد نقاشات كثيرة عرفت انهم ودوا بنتي العنوان القديم..وقعدت اكلم جاراتي وما احد ردعلي..وقالوالي لاتخافين المرافقة ما تتركها لين ماتسلمها لكوقعدوا يدقون على المرافقة ومافي احد يرد...ورجعت البيت عشان الصغير وانا دموعي اربع اربع...وبعدين جت الساعة 1 والبنت لا حس ولا خبر والساعة 1,15 دقيت على ابوها وعطيته خبر وانا ما علمته من اول لاني متأكدة ماراح يرسي الموضوع على خير وخفت من سواقته للسيارة الله يصلحه لعصب ما يعرف ام وابو...وخصوصا شئ يخص بنته الغالية يموت فيها موت والله كل يحبها اسم الله عليها...المهم علمته وانا منهارة ..صكر السماة بوجهي وطار شخط لمدرستها وتهاوش مع الحارس والمسؤول ...وهم يحاولون يطمنونه وهو ماهو مقصر هات ياسب وهواش وبالأخير الساعة 1,30 دق الجرس ودخلت بنتي حضنتها وضميتها وانا ابكي وهي بكت من بكاي ..المشرفة نزلت معاها وطمنتني ان اللخبطة لازم في اول يوم ولازم ماتخافون هي بيد امينه ..بس غصبن عني بنتي طالعة من الروضة 10,30 أوحتى 11 وانا ماأدري عنها شئ,,,,,كله كوم ودموع ابوها وهي في حضنه كوم ثاني ..الله يخليه لها وقبال ما شوف دموعه في يوم عرسها..من فرحته طبعا..
الزين في الموضوع ان بنتي جتني مبسوطة من الروضة الحمد لله ولاهي حاسة بشئ من اللي صار...
رحت الروضة اليوم وكلهم يتعذرون ويتحمدون لي بسلامة البنت وقالت لي الميرة وريني كل اللي علمتيهم عن عنوانكم الجديد وانا اتفاهم معهم..وقالت انا اول ما وصلت سألت عن البنت ,كنت حابة اشوفهاواشوف اخبارها..
بالله يابنات لو كنتم مكاني ايش كنتم بتسوون كنتم بتحاتون والا بتطمنون انهم ما ينزلون البنت..ولا يسلمونها الا يد بيد؟؟؟؟ :26:
ردوا علي لا تتركوني ادخل وما شوف ردود..