تعالوا شوفوا سالفة كوافيرتي الفلبينية...... الله يسعد اللي تفيدني دنيا واخرة

السلام عليكم وكل سنة وانتوا طيبين

موضوعي باختصار

ان الله من علي وفتحت مشغل
ومعي شريكة

ادعو لي بالتوفيق

وظفت كوافيرة شعر واستأجرت فلبينية من صديقة لي عندها مشغل من 3 سنوات
والسبب اللي خلاها تتنازل عنها رغم انها محتاجتها هو ان الفلبينية تغار من الفلبينية الثانية الي في المشغل بسبب كثرة طلب الزبائن لها، رغم انهم صديقات من ايام الدراسة

الزبدة ان صديقتي عرضت علي انها تتنازل عنها
خفت في البداية والحمد لله أني ما تورطت
وعرضت علي انها تاجرها علي واذا صلحت تنقل لي كفالتها

وافقت

كانت اول مشكلة واجهتني هي مكان أقامتها
لحسن الحظ شريكتي من سافرت شغالتها حاجاتها شغالة الى الحين
فصارت تبات عندها في غرفة الشغالة
لها على هذا الوضع 10 ايام تقريبا

المشكلة الثانية
تبي تروح مع زوجها يوم او يومين في الاسبوع خارج اوقات العمل
ما قصرنا فيها
وصارت شريكتي توصلها لحد قرب غرفة زوجها ويوصلها زوجها اليوم الثاني للمشغل

بعدين صارت تقول ان زوجها يغار عليها من زوج شريكتي اللي تنام في بيتها
ويبي يستاجر لها غرفة برا وسالتني اذا ممكن هي تدفع نص الإيجار وانا ادفع النص
وانا على نيتي قلت لها أوكي بس أشوف راي شريكتي
(هي تحب تتفاهم معي اكثر لان شريكتي ما معها لغة)
لما كلمت شريكتي رفضت الفكرة
وقالت مادام غرفة الشغالة موجودة ليش كثرة المصاريف وإيجار المشغل بيحل قريب

قلت لها ان الظروف الحين ما تساعد
وكل يوم والثاني ترجع تفتح نفس الموضوع
وتقول ان زوجي ما يبيني أنام في بيت فيه رجال ومن هالقرقه

المهم أني كنت متفقة مع شريكتي أني العيد هذا أسافر وهي تمسك المشغل
وبعد ما بدت الإجازة قالت لي انها لازم تسافر ديرتها بعد ما لزمت عليها أمها
لمدة 3 ايام
احترنا وين نحط الفلبينية

قلنا لها على السالفة
وقلنا لها تروح تنام في غرفة زوجها 3 ايام وتجي بتكسي ونعطيها بدل
اجرة التكسي
قالت أنا ما اقدر اقعد عند زوجي 3 ايام
لان فيه هندي يشارك زوجها في الغرفة رح يرجع يوم السبت
وما تقدر تنام معهم في نفس الغرفة طبعاً
وتقول لي يا مدام لو تثقون فيني عطيني مفتاح المشغل

وطبعاً لو تنط وتجيب لي القمر ما عطيتها المفتاح دقيقة وحده
بزعمها ما رح تنام فيه بس بتجلس عند زوجها لين يرجع الاخ الهندي واذا رجع جابها زوجها المشغل
ما ادري هو يرجع الصباح مثلاً
وتقولي شريكتي بعدها بفترة انها تقول انتي منتي طيبة مثل مدام ثاني ( تقصدني ) لأني وعدتها ادفع لها سكن ورفضت شريكتي

بعد ما سافرت في نفس اليوم اللي وصلت فيه تدق علي شريكتي تقول انها تصيح وتبي تكلمك
كلمتها تقول خلاص مدام أنا ماني مبسوطة عندك بارجع لكفيلتي
الظاهر متوقعة أني أقولها لا تكفين اقعدي واعطيك دبل
ولا باعطيك شقة

رغم ان شريكتي مدلعتها دلع ما دلعته عيالها
كل ما راحت تقضى تجيب لها اللي تبي
وفاتحة لها المطبخ تطبخ وتأكل من اي شي تشتهي
والغرفة والحمام مجهزة من كل شي
هذا كله بدوووووووون اي مقابل
ولا تطلب منها تساعدها في شغل البيت ولا حتى في اي شي بسيط
يعني فندق 10 نجوم

قلت لها بسلامتك تبين ترجعين الله يرزقك
بس ترا كفيلتك تبي تبيعك اذا مو لي لغيري
(وهذا اللي ناوية عليه صديقتي فعلاً بسب مشاكلها من العاملة الثانية)
ما صدقتنيً
وقلت لها ترا ما اكذب عليك وتاكدي بنفسك

وبعدها كلمت شريكتي تقول انها فتحت جوالها قبل يوم وشافت صور بيتها كلها في جوال الفلبينية
ومصورة الطريق من بيتها الى المشغل
وكل ما شريكتي سألتها عن صور عيالها (قائلة لنا عندها 4 عيال) يتقلب وجهها وتقول في جوالي الثاني ومره تقول في اللابتوب
وحنا لا شفنا معها جوال ثاني ولا لابتوب

وحركات وأسئلة كثيرة كانت تسألني عنها وانا على نيتي اجاوب
وعرفت الحين التفسير

وبعدها ارسلت لي مسج
تقول فيه انها عرفت كل التفاصيل من كفيلتها وخلاص تبي تقعد عندي
وبتقعد في غرفة شريكتي حقت الشغالة
وكل مهايطها خلاص نسته
بعد ما درت انها بتنباع بتنباع لي ولا لوحدة قشرى
واكتشفنا انها خطة من زوجها ( هذا اذا كان زوجها ) علشان يجبرونا ندفع لها بدل سكن او نزيد راتبها

زوج شريكتي بعد ما عرف سوالفها حلف ما تدخل بيته
وكذا ولا كذا رح تجيها شغالة والغرفة خلاص بح

وانا بعد سوالفها هذي حامت كبدي منها
ولاا اقدر أرجعها لصديقتي لان ما عندي غيرها لشغلات البدكير والمنكسر والحلاوة والسوالف هذي غير انها هي اللي تنظف المشغل وتمسح الارض
وشريكتي من رأيها نصبر عليها لحد ما ندبر غيرها
وتقولي انتي دبري وين نسكنها

وانا الحين محتارة
بالذات أني اروح للمشغل وارجع مع سواق
ولا اقدر أوصلها معي ما ودي تسوي علاقة معه ولا تتفق معه على شي

والله أني ودي أرجعها لصديقتي واللي فيها فيها لو ما نحصل بدلها الا بعد شهور

ودي بشوركم

واللي بتستخدم اسلوب نقد جارح او رجعي رجاء تحتفظ فيه لنفسها لان اللي فيني مكفيني


وسلامتكم