تسلم يدك وانا بعد نفس الطلب الدجاج والسلطة
الله يخليك بسرعة

ماشاء الله


سفره دايمه

اخواتي اعروني جميعا على التاخير بالردود لظروف خارجة عن ارادتي

الوصفات
وصفة السلطة
تجدونها على هذا الرابط
http://forum.hawaaworld.com/showthread.php?t=1007338#Scene_1

وصفة صينية الدجاج بالبصل
الطريقة سهلة كتير
بتسلقوا الدجاج وبتضيفوله البهارات المفضلة عندكم انا بضيف هال مطحون وبهارات مشكلة وشوية ملح واحيانا بحط ورقتين غار مع ماء السلق

بتجيبوا البصل وبتقشروه وبتقطعوه جوانح<<انا بكتر بصل لانه بدوب مع الطبخ

بعد ما تقطعوا البصل بصينية بتملحوه وبتحطوا عليه فلفل اسود واي بهارات بتحبوها
وفيكم كمان ترشوا عليه سماق<<<<وما ترشوا على الدجاج لانه بصير اسود

هلا بتضيفوا فوق البصل شوية زيت <<انا بخلط زيت زيتون وزيت قلي
وبحطوا على الغاز ليدبل البصل وبضل احركه بين فترة واخرى
بعدين بضيف الدجاج وبقلبه شوي مع البصل والزيت

وهيك بكون البصل اتدبل بس بكون لسا ما استوى منيح فبضيف شوية من ماء الدجاج وبتركه يغلى على النار
ممكن اغطي الصينية ازا حسيت البصل لسا بده وقت
اما ازا كان ما بده وقت كتير فما بغطي الصينية
وبعدين بحطه بالفرن ليتحمر وجهه

وصحتين وعافية


وصفة الملوخية للاخت الي طلبتها

عادة الملوخية بتكون مفرزنة بالفريزر وهيك بكون طبخها سهل

بس تطلعيها من الفريزر وتضيفيها فوق ماء سلق الدجاج(انا بضيف لماء سلق الدجاج بصل وورق غار فقط لانه اي شي باثر على طعم الملوخية) وتتركيها لتدوب وبتملحيها وبتحطي عليها ثوم ويتضيفي الدجاج المسلوق
وبس بتتركيها غلوتين على النار وبتنزليها ما بتحمل طبخ كتير

الملوخية الناشفة
انا بقلي اول شي التوم مع شوية كزبرة وبعدين بقلي الدجاج مع التوم والكزبرة وبعدين بضيف ماء سلق الدجاج مع الملوخية الناشفة
وبترك شوية كزبرة وبضيفهم مع الملوخية بدون تقلية واكيد الملح
بس ما تكتري كزبرة لانه كترتها بتعطي طعم مو حلووو

الملوخية الخضرا بدها اول شي تقطيف وتنضيف من العروق
وتغسيل منيح بعدين فرم<<<انا بفرمها على الخلاط food proccesor
وبعدها بطنجرة وبتركها شي دقيقتين على النار مع التحريك بعدين بضيف ماء سلق الدجاج
وبتركها تغلي غلوتين وكل ما تطلع شوية رغوة بشيلها
بعدين بضيف التوم والملح والدجاج وبتركها تغلى غلوتين وبطفي النار


ملاحظة: احسن شي لعمل التوم بكافة انواع الملوخية
اول شي الملوخية بدها توم فكل ما كان اكتر بكون ازكى<<<وهاد بيرجع كمان لزوئكم بالاكل
ازا ما بتحبوا التوم انتم حرين ما تكتروا

التوم بعد ما نقشره وندقه او نفرمه بنقسمه قسمين
قسم بنضيفه على الملوخية متل ماهو
وقسم بنقليه بزيت ليصير لونه دهبي وبنضيفه فوق الملوخية

الملوخية ازا بتحبوها تقيلة ما تكتروا الماء فوقها وازا خفيفة بنزيد الماء
انا بشوف الملوخية التقيلة ازكى
بكون قوامها جامد وما بتكون الملوخية ساقطة في قعر الطبق

وصحتين

جميع الاخوات مشكورات لمروركم بالموضوع
وان شالله اكون قدرت اجاوب على جميع استفساراتكم

واهلا وسهلا فيكم دائما

ماشاء الله على الاطباق الحلوة ..

الله يعطيك الصحة والعافية وتطبخي لزوجك أن شاء الله ..