تعالوا شوفوا فيلم ولادتي القيصرية

الحمدلله وأخيرا ولدت بتاريخ 14 /12 / 2009 ورزقني الله ببنت الله يحميها سميتها لمى
قصتي هي كالتالي: من أول ما حملت وأنا ببالي اني بولد طبيعي وولا خطرلي اني ممكن اولد قيصري
كنت داءما ادعي ان الله يهون ولادتي وما حس بألم الولادة، طبعا هذا حملي الثاني... المهم من دخلت في شهري الخامس وما ادري ليه كل ما اعمل تصوير أسأل عن وضعية البيبي هل نزل راسه لتحت ولا لسا فوق.. مع انه لسا بدري مرررررررررة
لما وصلت السابع قالتلي الدكتورة انو لسا ما قلبت لكن معها وقت ومجال تقلب... انا في قلبي قلت من سابع المستحيلات اني اولد قيصري ما ابغى ولا ممكن اتخيل... والسبب الكبير - بالنسبة لكم اكيد صغير وبايخ - اللي خلاني اكره القيصرية اني سمعت انو الوحدة ما لازم تستحم الا بعد اسبوع!!! وانا ما اقدر الا استحم كل يوم كل يوم كل يوم وانا شعري دهني ولازم كل يوم اتحمم احس بانتعاش ونشاط... واذا مر عليي يوم وما تحممت ... يا ساتر... اكره حياتي!!
المهم..وصلت بنص الثامن والبيبي ما قلبت... وطبعا بدأت رحلتي في قراءة المواضيع بعالم حواء وما خليت موضوع ما قرأته... وشوي شوي صرت اتقبل فكرة ان اولد قيصري خاصة بعد ما قرأت وحدة ان الدكتورة سمحتلها تتحمم من ثاني يوم!!!
وبدأ عندي الرعب... وصرت ادخل على يوتيوب واشوف عمليات القيصرية.. واقرأ مواضيع البنات عنها وكم هي مؤلمة بعد العملية وكم مؤلمة الغازات والوقفة اول مرة و و و و و .....
رحت لعند الدكتورة ( منال خرباش ) يوم الاثنين قبل اسبوع من ولادتي وكان البيبي لسا فوق وكنت بنص التاسع.. قالتلي الدكتورة خلاص قيصرية ووضعية البيبي لا يمكن تسمح بولادة طبيعية .. متى نحدد العملية؟
مسكت التلفون ...
يا فلانة.. شوفيلي أقرب موعد لعملية سيزيريان ( قيصرية ) بكرة ينفع؟
هي قالت بكرة.. وانا رجولي تنافض...
سألتني تسويها بكرة؟
أنا صار وجهي ألوان وأرجف ودمعت عيوني وعلى لحظة وابكي.. وهزيت براسي من دون ما افتح فمي لا لا لا
قالت طيب بعد بكرة وانا برضه لا لا لا لا لا
قلتلها ما نقدر بعد عشر ايام او اسبوعين
اطلعت فيني الدكتورة بنظرة :blink::blink:
ما ينفعش عايزة يجي الطلق قبل وقت الولادة؟
وبعد مفاوضات ومشاهدة المواعيد قررنا انا وزوجي والدكتورة الاثنين القادم يعني بعد اسبوع ..
ارتحت شوي
طلعت من المستشفى وركبت السيارة وبدأت ابكي من صدمة اني بولد قيصرية وزوجي يهديني...
هالاسبوع صارت نفسيتي متل الزفت... كل يوم مرة على الأقل ابكي.. واحيانا يكون زوجي ويشوفني ويهديني واحيانا لوحدي
صرت اعمل استخارة تقريبا كل يوم وادعي ان اذا فيها الخير ربي ييسرلي ياها واذا مافيها الخير يبعدها عني.. وعملت استخارة على نوع التخدير اللي حآخذه لأني كنت مرة محتارة وقررت باذن الله اني آخذ التخدير النصفي
وكنت على طول اعصب بسرعة.. ومرة زوجي كلمني ورفعت صوتي وزعل مني ... وصرت ابكي وقلتله أمانة لا تزعل مني.. ارضى عليي ما اقدر على زعلك.. يمكن اموت .. ما بغى اموت وانت مو راضي عني ارضى عني
ومتت من البكا وصار يهديني ويقول شو هالحكي استهدي بالرحمن وتوكلي على الله وما اقدر ازعل منك حتى رتحت شوي
مرت الايام وجا يوم الاثنين
رحنا عالمستشفى ( مستشفى المركز التخصصي الطبي ) وسجلنا للدخول وجلست انتظر في غرفتي وجو ركبولي تخطيط الطلق وما ادري ايش وبعدين ابرة المغذي...
بعدين جلست على السرير وبدأوا ينقلوني من مكان لمكان وانا ابغى زوجي يدخل معي لكن سألت الدكتورة وقالتلي ممنوع وامسك يده.. وزوجي كان ماسك الكاميرة بيصورني
وشافته الدكتورة وشافتني ودخلنا على الغرفة وقالتلي الدكتورة ايه مالك؟ قلتلها ابغى زوجييي :06:
قالت ما تخافي انا معاكي وربنا معاكي
وجلست على السرير وبدأت أرجف من الخوف واسأل فين دكتور التخدير
قالت الدكتورة: يعني هو حيروح فين حييجي حييجي
ولما جا الدكتور سألته دكتور ايش تنصحني؟ كلهم قالولي لو انتي خوافة اختاري التخدير الكامل ولو قلبك جريء وشجاعة نصفي
اخترت التخدير النصفي واتكلت على الله
وصاروا يحضروا الابرة وانا وقتها ميتة من الرعب حسيت حالي بمجزرة وشوي وكنت رح قول ابغى تخدير كامل بس قويت نفسي وقلت لا خليني نصفي انا قوية :22:
وجا وقت ابرة الظهر
ثنيت ظهري وحطلي الدكتور ابرة التخدير ولا اراديا نفضت شوي ( شكة دبوس عادي )
قاللي الدكتور لا ما اتفقنا على كدة مش قلنا انك شجاعة
وجو ومسكوني ثلاث دكاترة وغير دكتور التخدير واحد من اليمين وواحد من اليسار وواحد من راسي ونزلوا راسي لتحت وثنيت ظهري وفجأة قالولي خلاص
أنا :32: خلاص؟؟؟ ( ما حسيت بشي )
قال الدكتور ايوة خلاص ... تبغي ابرة ثانية؟؟ :30:
انا لا لا لا
ونمت على السرير وبدأت احس بتنميل في رجولي.. وركبولي القسطرة، وكنت ميتة رعب انهم يبدأوا العملية قبل ما يعطي البنج مفعوله .. كل ما احد لمسني اقول لسا حاسة.. يقولولي ايوة قلنالك حتحسي باللمس ومش حتحسي بألم وبدأت دوخ و سألني الدكتور دايخة؟ قلتله ايوة
اعطاني شي اتنفسه وصحيت وبدأوا العملية واحساسي كان كأن البيبي يتحرك ببطني بقوة لكن الحمدلله ما في ألم
دكتور التخدير كان ممتاز وتعامله مرة حلو وصار كل شوي يكلمني.. والدكتورة كل شوي تكلمني ويضحكوا معي حتى ما خاف وطلعت البيبي... احلى لحظة بالدنيا... لكن أخذوها ينظفوها على طول قبل ما اشوف شكلها وانا شايفتهم وشايفة رجليها والمنطقة.. يعني اتأكدت 100% انها بنت خخخخخخخخ
وانا كل شوي انده جيبوها ابغى اشوفها وجابوها وطبعا ما قدرت المسها لأن الايدين بتكون مربطة على السرير
خلصت الدكتورة وبقيوا الممرضات ينظفولي وفكولي ايديي قمت انا رفعت الستارة اللي بيني وبينهم ابغى اشوف ورفعت راسي وفجأة شافوني وكلهم صرخوا نو نووووووووووو نو وسكروا الستارة ههههه
وطلعت والدكتورة شافت زوجي وقالتله معاك كاميرة؟ كنا صورنا العملية لو قلتلي... زوجي :eek: انقهر مرة كنا نبغى نصور
وبدأ يروح مفعول البنج الصراحة مؤلم لكن ألم يقدر الانسان يتحمله..
وصار يجيني وجع الطلق القوي خاصة وقت ارضع بنتي
وكان اكثر شي صعب القومة من السرير
كانت الممرضة وزوجي معي وللأسف كنت محشورة وما قمت على طول بعد ما قاموا القسطرة لأن يزيد الألم اذا كنتي محشورة
وحسيت لما وقفت اني ما احقدر امشي ومستحيل... وفكرت وقتها ببنات عالم حواء وقلت معقولة هم اقوى واشجع مني؟!
لا وانا كمان لازم لازم امشي ورفعت رجلي ويادوب تحركت نص سانتي! حسيت وقتها من شدة الألم ما اقدر ابكي ولا اتكلم ( كنت اشوف بالأفلام لما واحد ينضرب رصاصة اقول ليه ما يبكي او ليه ما يتكلم ) وقتها حسيت بهالشي
بقية الايام كانت ميسرة بفضل من الله تعالى
الخلاصة اعتقد ان القيصرية أصعب بعد الولادة فقط باليوم الاول وبقية الايام سهلة خاصة اذا كان عندك احد في البيت يساعدك او شغالة تشتغل شغل البيت
نجي للحمام... بعد يوم من العملية خليت زوجي يحمملي شعري ومسحت جسمي
وثاني يوم انا حممت شعري
وثالث يوم استحميت بالكامل
وكانت اسهل من ما كثير بيوصفوها... واوقول للي بيولدوا قيصري لا تخافوا واتكلوا على الله وباذن الله تكون سهلة وميسرة