تعالوا شوفوا قصة جارتي وقولوا الحمد لله الذي عافانا مما ابتلاها به

بسم الله الرحمن الرحيم
اخواتي الحبيباتي
ابيكم في موضوع مهم بالنسبة لي كثير
وهو قصة وحدة من جاراتي وقريبة مني كثير
لكني عجزت القاء لها حل الا اني ابكي معاها واذكرها بالفرج القريب من رب العالمين
هذي القصة وانتم شوفوا لها حل او رأي تمشي عليه وادعوا لها كثير

تزوجت قبل 24 سنة من رجال يحبها ويموت فيها وبذل قصاري جهده حتى يتزوجها مع العلم ان ابوها كان رافضه واستمر الرفض فوق خمس سنين وبالاخير رضخ الاب لطلبه لان البنت تحبه وتبيه واصرت عليه
وتزوجوا وطار فيها وشافت معه حياة ولا تحصل حتى بالخيال
وجابت منه بنات
لكن مع هذا كله كان دايم يذكر انه بيتزوج ثانيه وثالثه ورابعة
هي من سكرة حبه والحياه الي معيشها اياها ماكانت ترد عليه
حتى جا يوم وصارحها انه خطب بنت عمها ووافقوا عليه
الحرمة انهبلت وحاولت ترده عن قراره ماقدرت
اتصلت على اهل البنت الي هو خاطب منهم وبنات عمها وكلمتهم انها ماهي موافقة وترجتهم يتركونه
وابدوا موافقتهم لها لكنهم غدروا فيها وكلموه عن الي قالته
جا وسود عيشتها
وتزوج
استمر زواجه ثلاث اشهروحصلت مشاكل بين لازوجة الاولى والثانية وطلق الثانية
جلس فتره مهنيها لكنه يردد انه بيرد كرامته قدام الناس
وزوجته ساكته وانجبت بعد طلاق الثانية بنتين
صاروا بناتها ست الله يحفظهم وماعندها ولد
بعد فتره تزوج وحدة من خارج منطقته ومطلقة
وكانت هذي الزوجة مصيبة ماتخاف الله
ذوقت الزوجة الاولى الويل وظلمتهم كثير عندها تفكير شيطاني تدبر المصايب ونخطط وتضبط معها على كيف ماتبي
والزوج مال لها كثيييييييييييير وظلم زوجته الاولى حتى حقوقها الشرعية حرمها منها
وانجبت الزوجه الثانية بنات وثلاث اولاد
وزاد طلمها وجورها على الاولى تظلمهم عندها ويروح للاولى ويضربها ويعايرها بابوها واهلها
لاتقولون تروح لهلها
اهلها مورينها الويل ومقاطعينها عشان تزوجته
المهم كبروا بناتها
والله يالسوق مايعرفونه
والمنتزهات مايعرفونها
والشارع مايعرفونه الا للمدرسة وبس
ووقت الاجازات يحزنون كثير ويتمنون المدرسة ترجع
حتى مصروف المدرسة بعض الايام مايعطيهم اياه

المهم الزوجه الثانية تركت الاولى وصارت تحط كيدها على البنات
وتحرض ابوهم عليهم
صار يضربهم ليل نهار ويذوقهم الويل وهم صابرات حتىمايناديهم باسماهم
و الزواجات حرمهم منها
واخر زواج كان لبنت عمهم وحاولوا انه يوافق يروحون له ووافق
واستعاروا لبس من صديقاتهم وقبل مايخرجون ناداهم وفتش ملابسهم مع العلم انها ساتره
قام ضرب كل وحدة فيهم كف
قالوا ليش قال عشان ماتأذون زوجتي لانها بتروح الزواج معكم
وياويل وحدة يجيني شكوا منها
والله يابنات على كلام امهم انهم راحوا العرس وهم يبكون
وزوجته الثانية كل ماشافتهم في العرس تضحك عليهم
عارفة انهم مايقدرون يقلون شي
وتحاول تجي لمهم عشان ترمي عليهم كلام

يابنات انا مااعتقد ان فيه اب ظالم لهذي الدرجة الا بعد كلام جارتي وحياتها الي شايفتها تعيشها
تصدقون يابنات ان زوجه ابوهم تقول لهم والله ماتزوجون الا رجال متزوج
وتقول لهم تراني اظلمكم واستغفر

يابنات جارتي قطعت قلبي يتفل عليها وهي بالسيارة ويعايرها باهلها ويمنعها من زيارة احد وفوق هذا شكاك حارم بناته من الجوال والشغاله حقت زوجته الثانية معها جوال
والمصيبة ان عيال الثانية يجون عند اخواتهم من الزوجه الاولى ويتكلمون عليهم ويقهرونهم
يقلون بابا جاب لنا وانتم لا
بابا ودانا وانتم مايوديكم
ويغارون عليه لو وحدة من بنات الاولى جلست جنبه
والبنات الصغيرات من الزوجه الاولى يبكون ويصرون على امهم كلمي بابا يودينا زيهم
وهي ماتقدر تكلمه
ودايم يردد انتي السبب في طلاقي للثانية وماراح اخليك تسوين الي سويته مع الاخيرة يعني المشاكل الي خلته يطلق الثانية
هو شايف في نظره انها تبيه يطلق الثالثه

وباعت ذهبها وجابت لها شغالة عشان البنات يركزون في الدراسة وهو الي قدم في الشغالة
وتعطي راتب الشغالةمن المكافأة حقت البنات الكباروجلست عندهم ثلاث شهور

تدرون وش حصل بعد كذا

اخذ الزوج الشغالة ووداها عند الثانية لانها حامل


قلت لها اطلبي الطلاق قالت والبنات وين يروحون
تقول انا صابرة عشان بناتي
البنات يدعون على ابوهم وتخاف ينحرفون من الظغط الي عليهم


تكفوووون يابنات ادعو لها ولبناتها ينصرهم على زوجها وزوجته ويرد كيد هم في نحرهم ويجعل كيدهم بينهم وتدبيرهم تدميرهم