السلام عليكم ورحمة الله وبركاته
أخواتي الحبيبات..
أنا تابعتكم بالقسم هذا من سنة تقريباً واستفدت منكم كثير
وأقولها بصدق: جزاكم الله ألف خير..
لأني في البدايات كنت مرة جاهلة بكثير من الشغلات المتعلقة بهذا الفن الراقي..
بس بعد متابعة الأخوات هنا بالتحديد من بين كل المنتديات اللي بتتكلم عن الكروشيه
استطعت بفضل الله أكون لي رؤية خاصة..
وخلوني أقولكم على حاجة..
لما تحبي الكروشيه طبيعي راح تنجني على شي أسمه خيوط!!
أتكلم معاكم جد، بشكل غير طبيعي صار عندي هوس بالخيوط..!!
الحمد لله جربت أنواع كثيرة منها..وقبل كذا استفدت كثير من موضوع
استاذتنا سهام مجاهد الله يحفظها..اللي عن الخيوط..
فقلت قبل أبدأ أوريكم شغلي زي باقي الفنانات هنا..
أوريكم خيوطي اللي بشتغل عليها حتى أشوف عندكم نفس الهوس اللي عندي بالخيوط والا لا؟؟ههههههه
يالله حبيباتي كل وحدة تورينا الخيوط اللي تشتغل فيها ولو تعرف معلومات عن خيوطها
تقول بالنهاية كلنا ان شاء الله راح نستفيد..
راح أبدأ بسم الرحمن الرحيم..
بما اني أسكن في مدينة صغيرة مافيها كثير محلات خيوط..
فخيوط القطن نادرة جداً عندنا..
لكن الحمد لله قدرت أحصل نوعين منهم اللي هم هذول:
الأصفر والوردي صناعة مصرية أما الفوشي والسماوي فصناعة صينية!!
المصري حلووووو مرة بالشغل والشغل فيه ممتع جداً..
دي مجموعة تانية من خيوط القطن الصيني على شكل كرات صغيرة..
أتذكر لمن كنا بالمتوسط اول درس نتعلم فيه التفصيل والخياطة يكون انواع الخيوط
وكانوا يقولوا لنا دي اسمها(كوتون برليه) بس مافيه معلمة وحدة كلفت نفسها تقول انها قطنية!!خخخخخخ
ودي مجموعة ثالثة من الخيوط القطنية بس مموجة ..
طبعا فتلتها رفيعة زي ماهو واضح..
انتهت عائلة الـ (كوتون برليه) خخخخخ
***
نجي لخيوط هنا انا ما أعرف هي ايش بالضبط..
لكن الشغل فيها يطلع جنآآآآآآآآن خصوصاً للاكسسوارات والقطع الصغيرة..
ما ينفع للملابس لأنه خشن على البشرة..
طبعاً ألوانه كثيرة وسعره مرة رخيص الكورة بـ5 ريال سعودي..
هذي معلومات عنه مكتوبه عليه....الظاهر انتوا تعرفوا تقروا خخخخخخخخخ..
***
هذي الخيوط واحد منها اللي بيسموه الخيش وواحد ما أعرف ايش اسمه بالضبط
لكنه يشبه خيوط الخيام خخخخخ
لو دمجتيهم مع بعض واشتغلتي فيهم شنطة تطلع النتيجة قاتلة خخخخخ
سويت منهم شنطة بس للأسف فاتني أصورها لكم
وطبعاً كل الخيطين الشغل فيهم متعب لأنهم كلهم ناشفين..
السعر ماني عارفة لو كان واحد والا لا لكن أنا أخذتهم بـ 5 ريال للكورة الوحدة
***
خيوط السمكة زي مايسموها كثير أنا جربت حرقت طرف خيط منها بالنار وذاب زي البلاستيك...معناته انها نايلون 100%
سعرها يختلف فيه منها بريالين و 3 ريال و 5 ريال
***
هذا الخيط هدية من صاحبتي وماني عارفة بايش أستعمله لو عرفتوا علموني خخخخ
(على فكرة لو عندك صاحبة مجنونة كروشيه زيك حتكون أحلى هدية تقدميها لها مجموعة مميزة من الخيوط زي صاحبتي)خخخ
***
حكمل بإذن الله
حتى في الخيوط:
هذي الخيوط اشتريتها من دايسو أشكالها جنآآآآن وسعرها رخيص 7 ريال سعودي
هذي عجبتني ألوانها وخامتها مكتوب انها من الألياف الصناعية الممزوجة(عاد ماني فاهمة الكلام ده خخخ)
وهذي تشوفوها صوف عادي مافيها شي مميز..
لكن تعالوا هنا نتأكد من حاجة:
صوف صناعي مضاد لرائحة العرق!!!!!
كيف جابوها ؟؟ماني عارفة ...خخخ
***
هذي الخيوط ماني عارفة ايش هي لكن ألوانها مرة حلوة وغريبة
والشغل فيها يطلع فعلاً مميز..
والسعر معقول 5 ريال سعودي..
طبعا كل الألوان استعملتها في شنطة حنزلها ان شاء الله قريب تشوفوها..
***
والآن مع أقدم خيط عرفه التاريخ خخخخخخ
الخيط الكشميري أبو ريال!!!
من يوم كنت صغيرة وأنا أشوف الدنيا مليانة منه خخخخ
الغريب فيه انك تلاقي منه ألوان ماتلاقيها في الأنواع التانية!!!
مافي أي معلومات عنه غير انه دافئ 100% خخخخخخخخخخخ
حتى تلاقي منه ألوان بايخةزي كده خخخخخ
***
وهذي الخيوط ماني عارفة ايش هي لكن المعلومة الوحيدة عنها انها مصنوعة من الأكريليكيو 100%
مريحة في الشغل وألوانها كثيرة وسعرها عادي 5-7 ريال سعودي
***
حكمل بإذن الله