تعالوا نتفق منفكرش فى أي أعراض الا لما تتأخر الدورة فعلا

فى البداية باهنيكم أخواتى بالعام الهجري الجديد و ان شاء الله يتحقق فيه كل ما تتمنون....
ما أكثر المواضيع التى قرأتها ووجدت أخواتى قبل موعد الدورة يحسون ببعض الأعراض و يتصورون أنها حمل....
طبعا جميعنا نتمنى الحمل ...لكنى من خوفى عليكم حبيت أنقلكم تجربتى....أنا جربت الأمومة لأنى حملت مباشرة بعد زواجى....و كمان جربت تأخر الحمل دلوقتى وانا باحاول أجيب أخ أو أخت لابنى....

و المهم اللى عايزة أوضحه ليكم هو ان العشم الزيادة بالحمل بيخلينا نفسر أي عرض على انه حمل..و لما نتفاجئ بعدم الحمل تحصلنا حالة من الإحباط و الاكتئاب و ده لوحده ممكن يكون سبب فى تأخير الحمل ، غير أنه بيعكر علينا صفو حياتنا و يخلينا ننظر لنصف الكوب الفارغ، كمان بيزود حالة الضعف الانسانى اللى بنكون فيها، وممكن لا قدر الله يفتح عمل الشيطان و يجعلنا نعيش حالة من السخط و ده ممكن يبعدنا عن ربنا.....

و المفاجأة اللى قالهالى طبيبى هى ان جسمنا ساعات بيتفاعل مع هذا الأمل و ساعات بيدي أعراض تحسسنا اننا حوامل ( يعنى انا اول شهر بعد ما تركت المانع تأخرت دورتى سبعة أبام و كنت فى خلال الأيام ديه باحس بدوخة و غثيان و باقى أعراض الحمل ) و طلع فى الآ خر ان مفيش حمل و ده حصل تانى شهر برضه وده لأنى كنت شبه واثقة انى لازم أكون حامل (طبعا ده من و جهة نظري التى كانت قاصرة فى هذا الوقت لأنى تناسيت اننا مهما هيئنا أسباب ، فالله هو الذي يأذن و قتما يشاء)

يبقى اللى عايزة اتفق معاكو عليه اننا نحاول ننسي الموضوع ده شويه ، و منفكرش فى الأعراض و لا غيره الا لما الدورة تتأخر فعلا...و ممكن نشغل نفسنا بالعبادة و الاستغفار أو العمل أو القراءة أو تعلم أي شئ جديد...

و عايزة أقولكم على حاجة مهمة جدا....وديه عن تجربة و هى ان مش دايما الحمل يكون مصحوب بأعراض...لأن المضحك فى تجربتى انى بعد زواجىانشغلت فى الزواج و السفر و المهنئين، و بعد ما رجعت لشغلى بعد أجازة شهر لقيت شغل متلتل ، طبعا قعدت أسبوعين كمان لحد ما تأقلمت...و كنت ناسية تماما و مبحسبش اي مواعيد لدورتى اللى تأخرت ثلاثة أسابيع عن موعدها...وطبعا كسلنا شوية و على ما رحنا للطبيب كنت حامل فى 7 أسابيع...و على فكرة لم أحس بأي أعراض للحمل سوي بعدها بحوالى 3 أسابيع كمان يعنى كنت فى الشهر الثالث..

المحصلة من كلامى ان مش عايزاكوا تشغلوا دماغكوا و تركزوا أوي مع أي أعراض تلاقوها الا بعد ما تتاخر الدورة....

و ادعولى ربنا يرزقنى بأخ أو أخت لابنى ....ويلم الله انى فى كل ركعة بادعيلكم جميعا زي ما بادعى لنفسى بالذرية الصالحة و صلاح الحال و ان يخر لكم أزواجكم...

اللهم ارضنا بما قضيت و عافنا فيما ابقيت حتى لانحب تأجيل ما عجلت و لا تعجيل ما أخرت...