تعالوا واسمعوا قصتي

السلام عليكم يا حلوين
أنا تزوجت بشهر 7 من عام 2007 وصار عندي حمل بشهر 11 ومن بعدها بدت المعاناة على موعد الدورة نزل دم يومين واختفى رحت للدكتورة قالت اجهاض منذر كتبتلي تنويم بالمستشفى وفحصتني داخل (واه من الفحص الداخل) كانت الساعة تقريبا 4 العصر على الساعة 11 شافتني الدكتورة المناوبة وعملت سونار قالت انها مو شايفه كيس الحمل ففحصتني داخلي مرة ثانية
على الساعة 8 علمو سونار مرة تانية ونفس الشي ما في كيس حمل
اعطوني موعد بعد 10 ايام لأنه ممكن الحمل يكون جديد ومو باين ، طلعت من المستشفى وزاد النزيف ووجع في ظهر في الجهة اليسرى بالاخص .
وفي عيد الأضحى وجع شديد رحت على المستشفى تنويم ومو عارفين شو فيني بيعملوا تحليل دم وتحليل بول في حمل بس ما في كيس حمل ..
فقرر دكتور الأشعة أني حامل خارج الرحم 100% لأنه شايف شي قطره 7 سم على الجهة اليمين عند المبيض .
وصرت اتنوم بالمستشفى ما حدا عارف شو عندي بس هيك سونار وازهق واطلع اتوجع من جديد ارجع لعندهم اوقع على مسئوليتي واطلع
بعد هيك قررت اروح على الأردن اخدت اجازة وسافرت ورحت عند 3 أطباء كانت الأراء كالتالي:
الدكتور الأول : حكى اجهاض وعندك تهيج في منطقة الرحم
الثاني : حكى حمل خارج الرحم ولازم عملية وكتبلي على عملية في نفس اليوم "بس انا طنشت وما رحت "
الثالث : حكى لازم عملية بس مو ضروري هلا.
رجعت على السعودية ووجع ظهري متل ما هو لا فائدة
فقرر دكتور الأشعة انه لازم عملية عشان الحمل خارج الرحم ودخلوني عملية استكشافيه
أنا لما سمعت استكشافية انصدمت بس خلص ملت شو بدي اعمل ، وخلوني أوقع على مسئوليتي أنه ازا في شي متضرر راح يستأصلوه وعلى الأغلب المبيض اليمين
بعد العملية قال الدكتور أنه ما كان في حمل خارج الرحم وانه كان حمل طبيعي بس عندي شوية ألياف على الرحم كلها خارجية بس واحد على جدار الرحم وتم استأصلها .وجع ظهري كان من النزيف اللي استمر شهرين بس .
منعوني من الحمل 5 أشهر واستخدمت المانع الطبيعي
بعد 5 أشهر صاروا يتابعوا التبويض وحكولي عندك ضعف في التبويض البويضة بس9
خدي كلوميد وابر تفجيرية طنشت أول شهر بس الشهر اللي بعده اخدتهم وشوفوا شو صار في من الكلوميد
على موعد الدورة نزيف شديد ولم يحدث حمل حكى الدكتور هاد الشهر لا تخديه الشهر الجاي خديه مرة تانية
طبعا انا طنشت بكفي نزيف دمي صار 7 الشهر اللي بعده اتاخرت الدوة اسبوعين لدرجة أني فكرت حالي حامل بس نزلت في أول رمضان
في 17 رمضان اللي فات نزلت على الاردن اجازة رحت على الدكتور حكى بس تيجي الدورة تعالي اجتني في 5/10 ورحت عملت اشعة بالصبغة وكانت النتيجة :
انسداد في الأنبوب الايسر وعادي ما اعمل شي بس اتابع تبويض واخد ابر تفجيرية
رحت متل عوايدي عند دكتور تاني وحكى انه عندي التهابات شديدة واعطاني أدوية على مدى اربع شهور في اخر شهر كلوميد "انا بصراحة كرهت الكلوميد "
فرحت عند دكتورة عشان تحكيلي مفاجأة جديدة
"عندك كيس على المبيض اليسار حجمه 4.7سم" بس اللي ما بدقق فيه بفكره المبيض" واعطتني حبوب
فرحت عند كمان دكتور واكد كلام الدكتورة بس حكى لا تاخدي هاي الحبوب لانه مو منيحة واعطاني حبوب منع الحمل ياسمين لمدة شهرين
رجعت على السعودية واخدت الحبوب أول شهر ورحت على الدكتورة فحكت انه الحجم هلا 2.4 سم يعني لازم أخد كمان شهر وبعدها باخد تحاميل وبرحلها
وفعلاً اخدت الحبوب كمان شهر والتحاميل بس ما رحتلها
مليت
من الدكاترة والفحص والسونار والسونار المهبلي
وهاد الشهر رحت عمرة على موعد الدورة واخدت حبوب ترفعها وهلا اجتني يوم الاثني بس كتير غزيرة ما بعرف شو السبب علماً بأني في الشهرين الفائتين كنت اخد خلطة عيون وليد واشرب زنجبيل بس هادالشهر ما اخدتها
شو أعمل برأيكم اروح هاد الشهر للدكتورة أو استنى.
علما بأن دورتي طول عمري منتظمة ولا كان عندي أي أوجاع وانا بنت
الله يرزقني واياكم
(ربي لا تذرني فردا وأنت خير الوارثين )