تعالو أعلمكم الاقتصاد على أصوله

تعالو أعلمكم الاقتصاد على أصوله
وكيف توفرون في ميزانية البيت

أولاً بعطيكم سيرتي الذاتية
تراني موظفة وأم لثلاثة أطفال
وساكنة مع أهل زوجي وعندي غرفتين بملاحقهم وستور >>> شو دخله بالسالفة ؟؟
قصدي إن اللي بتوفر تقدر توفر حتى لو ما عندها بيت خاص فيها

وتراني ما أصرف على البيت ولا ريال كله على ظهر هالريل المسكين
خخخخخخخخخخخخخخخخخخخخخخخخخخخ

وأنا ما عندي الميزانية ولا شي كل اللي علي أقوله جيب كذا ونبغي كذا >> اشرايكم صرت سعودية
وزوجي مش من النوع المنظم اللي يحب يتقيد بميزانية
ولا من النوع اللي يقسم الراتب

وأنا من النوع اللي أحب أريح راسي علي إني أدخر وأقلل من المصاريف
لأني أخاف من الاسراف والله ذكر المسرفين والمبذرين وشبههم بأنهم أخوان الشياطين

وتراني من النوع اللي ما أقصر على نفسي وعيالي بس في أشياء
أحس نقدر نستغني عنها وخصوصاً إذا كانت غير صحية

طولت عليكم أدري وودكم تزنطوني

خلونا نخش على المفيد

1- لاحظت انكم تكثرون وايد من مواد التنظيف وكل واحدة تقول ريحة
بيت حلوة وأستعمل الكومفروت وأبخ فيه على الأثاث ...........
وغيره من المنظفات
أولا ً أحب أنبهكم إن المنظفات هاذي كلها مواد كيماوية وعندنا
أطفال بالبيت وكلها تأثر على الصدر شوفو نسبة الربو عندنا كم واصلة !!!
بالنسبة لي أستخدم صابون أريل مع لمسة داوني لغسيل ثيابي وثياب زوجي
وبها الطريقة أكون وفرت وما في داعي أشتري داوني أو كومفرت.

2- بالنسبة لأولادي مستحيل اغسل ثيابهم بغير بصابون الوزير القوالب
لأنه مصنوع من زيت زيتون ومواد طبيعية
عمري ما خذيت صابون الوزير المبشور لأني أحس إنه إسراف
أما الصابون القالب الواحد تغسل فيه الشغالة ثياب عيالي وبشكل يومي ويستمر
عندها لمدة أسبوع
وكيس الصابون فيه 6 قوالب يعني يظل عندي أكثر من شهر

2- معروف عن الشغالات الاسراف في استخدام المنظفات أو أي أغراض عندك
علشان جذي أحاول أعبي الأغراض في علب التنظيف البخاخ الفاضية
يعني لما تخلص أي علبة تنظيف بخاخ عندي ما أرميها وبقول لكم شو الاستعمالات:
مثلا الكلوركس أخليها تعبيه في هالعلب البخاخ ولما تجي تغسل الثياب
علشان ما تبذر في الكلوكس وتخرب الثياب أقولها بخي منه بختين او ثلاث
على الماي الموجود في الغسالة ومرات على الثياب اللي عليها بقع
والحين صار الكلوركس الحجم الكبير يطول عندي أكثر من شهرين.

3- ما أخليها تغسل يومياً لأنها هذا بيكون صرف للكهرب والماي والصابون
وأيضا بيكون ما عندها وقت لأعمال البيت الثانية
فأنا حاط في جدولها إنها تغسل مرتين في الأسبوع الأثنين والخميس

4- بالنسبة لغسيل الحمامات ما أحب أشتري الصابون البودر
النوعية الرخييصة لاني لاحظت انه يخدش الحمامات والسيراميك
وما أحب أكثر من شراء المنظفات أحس تحسس الصدر
فشو أسوي؟؟
أخذ علبة التنظيف البخاخ أعبي نصها صابون غسيل المواعين فيري
لأن رغوته كثيرة وأحط أقل من ربع العلبة ديتول واقل من الربع خل أبيص
علشان اللمعة وباقي العلبة أعبيها ماي وقبل ما أستعمل البخاخ لازم أرج العلبة كويس
ويكون البخاخ هاذا جاهز دايم وموجود بالحمام يعني لما تجي تغسل الحمام
تبلل الأرضية بالماي وتبخ من هالخلطة على كل الأرضية والسيفون والمغاسل
وتبدأ تفرك بفرشاة الحمام
وطبعا هذا الخليط أنظف فيه حتى الموكيت لما أولادي يوسخون أو يكبون
عصاير أو أي شي على طول أجيبه أبخ وأمسح بصراحة طريقة سهلة وسريعة
والأهم إن النظافة والبقع تطير على طول.
نفس البخاخ هذا أخليها تغسل فيه الثلاجة تاخذ طشت صغير فيه ماي
وتبخ عليه من ها البخاخ كم بخة وتحركه بيدها شوي ويصير الماي كلها
فقاقيع وتبدأ تأخذا الأسفنجة وتغمس في الطشت وتمسح الثلاجة
من الداخل والخارج وبالأخير تشطف الثلاجة بفوطة مبلولة زين بالما ي
وتنشف الثلاجة زين .

5- بالنسبة لمسح الأثاث مثل ما قلت لكم أستخدم نفس علب البخاخ الفاضية
أعبيها ماي فقط وكل ما جات الشغالة تنظف تبخ من الماي فقط وما في داعي
لغير الماي أحس حرام صدور اليهال وحتى الكبار تتعب وفي الأخير كلها مواد
كيماوية وعلى المدى الطويل تضر .


تابعووني للموضوع تكملة بإذن الله تعالى