تعالو شوفوا قلت لبنتى ايه لما سالتنى عن الله سبحانه وتعالى ومن اللى خلقه

بنتى 7 سنوات

فى يوم وانا احكيلها قصة سيدنا ادم

واستطرد الكلام عن الموت والقيامة ونهاية الدنيا

طبعا انا حاولت اطلع منها وفهمتها بطريقة بسيطة جدا وحاولت اخليها ما تركز كتير فى مسالة البعث والقيامة

وحاولت احكيها اكتر على الجنة وصحبة سيدنا محمد عليه الصلاة والسلام

ومرة سألتنى سؤال عن وجود الله سبحانه وتعالى
وقالتلى من خلق ربنا وهو شكله ايه وغيره من أسئلة الاطفال الشائعة بهذا الخصوص....وكل ما أجاوبها تقول ..أيوة بس من اللى خلق الله

وكل ما أقولها الله موجود قبل هذة الدنيا وهو اللى عملها

تقولى أيوة طيب كيف ربنا جه فى الدنبا دى

وربنا ألهمنى كلمات بسيطة بس احسها أقتنعت بعدها


قلتلها (وتعالى الله فى السمو والتنزه علوا كبيرا سبحانه وتعالى)

شوفى أحنا لما نعمل كيكة بنعمل أيه ...مش بنحضر حاجاتها كلها وبنعملها
قالت : أيوة
قلتلها : يعنى مين عمل الكيكة
قالت احنا
قلتلها : ولما نأكل الكيكة ونخلصها...أحنا أه اللى بيحصلنا لازم نخلص معاها ؟
قالت لا
قلتلها
طيب وقبل ما نعمل الكيكة احنا كنا فين ؟
قالت هنا
قلتلها طيب أحنا المفروض نكون زى الكيكة علشان احنا اللى عملناها يعنى ؟
قالت لا
قلتلها :طيب أحنا لازم ندخل جو الكيكة مادمنا احنا اللى عملناها يعنى ؟
ماتت من الضحك طبعا وقالت لا

قلتها أهو زى كده
الدنيا دى حاجة ربنا عملها بأيده وهو كان موجود قبلها ...وهيكون موجود بعد ما تخلص
ومش لازم علشان هو اللى عملها انه يكون زى الناس اللى فيها
وان مافيش حد يعرف شكل ربنا ازاى لكن يوم القيامة ربنا هيخلى الناس اللى تدخل الجنة تشوفه علشان تفرح وده طبعا هيكون للناس اللى بتحب ربنا وربنا بيحبهم وبسمعوا كلامه وكلام سيدنا محمد لان ربنا بيحب سيدنا محمد واحنا كمان لازم نحبه ونسمع كلامه

واننا لازم ناخد بالنا ان الشيطان دايما عاوزنا نسمع كلامه وما نسمعش كلام ربنا
وبيقولنا هو ربكم شكله ايه علشان هو مش بيحبنا وعاوزنا نخش معاه النار وفكرتها بقصة سيدنا ادم اللى كنت لسه حكياها لها

ولازم نقول دايما اعوذ بالله من الشيطان الرجيم ونحاول نقول سبحان الله او اى حاجة من الاذكار او القران

طبعا انا والحمد لله محفظاها الكثير من الاذكار وبتحفظ فى جزء عم الى جانب ايه الكرسى طبعا

الله يهديها ويصلحها هى واخواتها واولادكم واولاد المسلمين

المهم مش حبيت ابدا اطلع من الموضوع معاها الا لما اعطيها صورة مبسطة وحقيقة علشان ما تتخلبط الافكار عندها


ايه رايكم فى كلامى واللى عنده اضافة تتفضل جزاها الله خير