تعالو شوفو اش سويت اليوم اخ اخ يظهري بس النتيجه خياليه

مساكم الله بالخير مااحب اكتب مواضيع بس حبيت احمسكم معاي حاليا خلصت وتروشت وقاعده احتسي قهوتي اللي انحرمت منها اليوم كله بسبب اللي صار
كنت مقرره من اسابيع اجرد البيت على قولتهم اعزله
ولاجاء هاليوم ابد
اتهرب كل مره لاني اعرف اش بلاقي من بلاوي حكم اني زمان ماعزلت وكثرت الاوراق والاغراض المخلصه وكراتين فاضيه ولافضيت ارمي واتخلص منهم
اليوم صحيت فطرت الساعه 11 الصباح ومسكت البيت اسكتوا مابي اتذكر لحد قبل ساعه تقريبا 6 ونص خلصت شوفوا كم ساعه :(
مسكته غرفه غرفه واخر شي المطبخ والحمام وبعدهم الثلاجه ودواليب المطبخ
طبعا الغرف بدواليبها :( خزاين كبيره :( فضيت كل شي حطيت 3 اكياس كبيره كيس للجمعيه كيس للرمي كيس للي ابيهم ويله اخرج واعبي الين خلصت وابدا امسح وادعك وانظف خلصت رجعت كل شي مكانه
وانتقل للغرفه الثانيه ثم المطبخ ثم الحمام طبعا هالشغل عميق عميق عميق بمعنى الكلمه وربي ياني طلعت اغراض اكل وشرب عليها الزمن واغراض مخلصه بس كراتينها موجوده واكياس وعلب فاضيه بلاوي بلاوي
بتقولون ليش كله بنفس اليوم بقولكم اعرف نفسي ان وقفت مابكمل والبيت خلاص امتلى طاقه سلبيه قسم بالله معاد لي نفس اسوي شي حتى قهوتي معاد استمتع بها من كثرة القرابيع
مالكم بالطويله خلصت كل البيت من الى ورميت كل اللي يحتاج رمي طلعته من البيت والجمعيه جهزته تمهيدا لنقله في اقرب وقت هذا وانا ماني مبذره ومااحب اشتري كثير ماسكه ايدي كثير مو شوي
ويطلع بيتي فيه كل هالبلاوي اجل المسرفين كيف اغراضهم وقربعتهم اه بس لاتذكروني
بعد ماانتهيت مسحت البيت كامل بديتول وكلوركس وبخرته اه يازين الراحه وحلفت ووعدت نفسي
مااجل عمل اليوم للغد لان هذا طبع فيني احوس ومااشيل حوستي اخليها بعد ايام اشيلها واكون بدون نفس من كثرتها وارميها بدون ترتيب
بس خلاص البيت صار فاضي الخزاين اللي واصله السقف وعرضها امتار ماكانت تتقفل زحممممممه
الحين فاضيه اجزاء كثيره منها فضيت
المطبخ صار فاضي بمعنى الكلمه وضبطلي ركن للقهوه فيه كل اغراضها مااجلس احوس
لاني مدمنة قهوه اشربها طوال اليوم
يله مين الشاطره اللي بتقوم على بيتها :) اترككم واكمل قهوتي ابي ردود ترى والله ماكتبت الا عشان احمسكم وتسوون زيي