حبيباتي بنات حواء... :)
الصراحه هالموضوع صارلي لما كنت ادرس بالكليه قبل 10 سنوات تقريباً.
بدأت القصه في ايام اختبارات النصف الدراسي الأول .. وكانت الاجوااء رائعه هذيك الايام بمعنى الكلمه..
وتخيلو عاد لما ارجع من اختباري بدري على الساعه 9 وانا في البيت وافطر في الجو الجوووونااان هذا ..
واحط راسي واناااام ...
طبعاً كنت اروح وارجع مع نقل يوصل مجموعة بنات مع بعض..
بيتنا عباره عن حوش كبير جداً يركض فيه الخيل ..مو الحمير.
وبيت كبير اهلي اخر طابق وبعدين اخواني المتزوجين والدور الأرضي فيه زوجة ابوي <<<---- تكرهها .
وبوابة الحوش اخواني دايم يخلوها مفتوحه الله يهديهم مافيهم حيل يفتحو ويقفلو ,, فكان هناك حماااار ابن حمار ماادري من فين يجي
يدخل الحوش كل يوم ياخذله فره ويخرج.
يكون وقته الظهر <<--- ركزو الظهر مو الصباح .. يعني متطمنه, ودايم الوالد يقول قفلو البوابه بس ماحد يسمع الكلام.
وقف الباص عند البوابه كانت الساعه 9 الصباح , نزلت و دخلت لما وصلت لباب البيت تفاااااجأت بشي مو طبيعي.
جوه عن الدرج , من هول الصدمه جلست 5 دقايق اتأمل وش هذا ,,,, يابنااات وجهه كبير وطويل مغطي نص الباب
وانا اخمن.. اهلي غيرو الباب !!! وهذا باب جديد ,, والا هذا جني!!! وإلا كائن فضائي!! ... ماني قادره استوعب لأني في
حياتي ماقد شفت حمار عن قرب يعني قدام عيني ... ابد ابد ابد.
وابن الحمار واقف حتى هو يتأمل فيني!! ... ونظرات البرائه,, طبعا دخل عشان الظل.. وكان واقف ووجهه على الباب
فهمتو الشكل؟!! يعني جسمه كله جوه. وكأنه بيت اهله ابن الحمار..<<<--- اجل ابن مين!
لما استوعبت صرت زي المجنونه اصيح و اروح يمين واروح يسار ماادري فين اشرد ولمين ألجأ.. تخيلو وانا افحط في الحوش وهو
يطالع فيني ولا خاف ولا خرج,, كأنه يقول وشفيها الخبله !!
المهم قمت اصارخ يمه يمه انا تحت .. ولا احد يسمع.. رحت لشباك الدور الارضي (زوجة ابوي) وناديتها
وماترد اكيد نايمه,, رميت حجر على شباك الدور الثاني وماحد يرد,
المشكله ماحولنا جيران,, حولنا محلات تجاريه ومقابلنا مدرسة اولاد, بس محل واااحد ممكن ألجأ له وهو مشغل نسائي.
ولحسن حظي ان العاملات كان سكنهم في نفس المشغل.
رحت لهم ودقيت عليهم الشباك وقلت انا فلانه بس ابغا التلفون .. وفتحو ودقيت على امي .. قلت في حمار ابن حمار
انزلي اطرديه عشان ادخل , قالت طيب.. هذا كله وانا جسمي كله يُرج مو بس يرتعش.
ورجعت ولقيته خارج وهوه يتمخطر وعلى اقل من مهله بعد وانا انتظر حضرته.
بس خرج دخلت على طول وقفلت الباب ,,
طلعت غرفتي وانا ارتعش بشكل مو طبيعي كأني عجوز وعندي الزهايمر بعد, امي تكلمي وانا اقول هاه!!
كل ماسألتني سؤال ارد اقول هااااااه..
انسدت نفسي ومافطرت وطار النوم ,, اخواني لما رجعو قلتلهم على السالفه , قلت لو ماتقفلون الباب في الصباح
صدقوني ماعاد اروح اختبر, إلا اذا واحد منكم هو يرجعني البيت .
الله يهدي واحد من اخواني لما علمتهم بالسالفه المخيفه والطريفه... يقول ماجاء على بالك لما شفتيه وجهاً لوجه
انه ممكن يكون مرايه <<------ عصبت مررره :mad:
وهذي معاناتي وخرعتي مع الأفندي الحمار ابن الحمار
شفتو ان مصدر الجود مسكينه وتكسر الخاطر :44:
عدت على خير .. والحمد لله إنه حمار من البهايم مو من الحمير الأوادم " الحرامية " ..