تعالو شوفو وش سوت المعلمه مع بنت جارتنا

قبل يومين جت عندنا جارتنا وحكت لامي قصه صارت لبنتها في المدرسه مع احد المعلمات وهي تدرس في ثالث متوسط

تقول كانو جامعين بنات الصف الثالث في احد القاعات اجتماع مع المعلمات المهم وكل وحده تاخذ مكانها والمعلمات يرتبون اماكن الطالبات فجأه الا تصرخ وحده من المعلمات على بنتي : انتي يابنت قومي يله
بنتي جالسه بمكانها وفي وراها كم بنات واجد فماتحسبها تقصدها
ماتسمعين وش اقولك قومي يابن الكلب وتشر على بنتي ... بنتي قامت قالت انا ؟؟ قالت ايه انتي تعالي هنا يله قالت بنتي انا ماني بنت الكلب ياابله انا بنت ابوي ... قالت المعلمه لاتردين علي اطلعي برا يله يابنت الكلب ( كررتها ) قالت بنتي ياابله حسني الفاظك انا ماني بنت الكلب انا بنت ابوي .. وقالت المعلمه اطلعي برا لااجيك اجرك من راسك اطلعك ويجون المعلمات ويقولون لبنتي اطلعي برا وبعدين تفاهمي معها واخذو بنتي وطلعوها برا القاعه
وبدو الاجتماع وبنتي برا بالبرد والله تقول تجمدت من البرد وانا مدري
وش السالفه مدري يمكن احد من البنات سوت شي وتحسبها انا
تقول الام بنتي جلست برا لحالها ساعه كامله ميته من البرد وتبكي

المهم يوم طلعو من الاجتماع راحت بنتي للمعلمه تبي تشوف وش القصه وتبي تقولها انها ماتدري عن اي شي اذا صار شي
المعلمه اخذتها عند الوكيله وقالت للوكيله هذي قليلة ادب وسوت حركة وسخه قدام البنات لازم نكلم اهلها ونقولهم عن حركات البنت
بنتي قالت والله ماسويت شي ولاادري عن شي واذا انا سويت شي تقدرون تسالون البنات اللي جالسين جنبي
راحت المعلمه وقامت الوكيله تحقق مع بنتي وتطلب منها انها تعترف عشان يسامحونها بس بنتي انكرت وقالت اعترف بشي ماسويته ؟؟ بعدين بنتي قالت للوكيله تلفظ المعلمه عليها وعلى ابوها
الوكيله قالت مالك شغل بالمعلمه الحين خلينا بالحركه اللي سويتيها
وقعدت تتكلم على بنتي وتنصحها
المهم راح اليوم كله وبنتي عند الوكيله
ويوم جت للبيت جاتني تبكي وتقولي الي صار معها

للمعلوميه بنتي متفوقه دراسيا ومن الابتدائي وهي من الثلاثه الاول بفصلها وكل معلماتها يعرفونها بس المعلمه هذي ماتعرفها
والغريب ان المعلمات ماتدخلو ماقالو ان البنت هذي اخلاقها زينه ماتسوي كذا وانها متفوقه كل وحده سوت نفسها مالها دخل
مدري خايفين من الوكيله ولا من المعلمه
والله شي يقهر من جد
نفسية بنتي تعباااانه مررره بسبب هالمشكله وممكن تأثر على مستواها
ليش بعض المعلمات يسوون كذا المفروض يكونو قدوه وحكيمات
ولازم يكونو قدوه بالفاظهم شلون يبون البنات يتعلمون والمعلمات الفاظهم بنت الكلب ومدري ايش والله شي يقهر جد

ابوها تدخل بالموضوع وكتب شكوى على المعلمه وطلب تحقيق
مع المعلمات والطالبات وتبرئة بنته اذا طلع الحق معها