تعالى اقولك ازاى حملت فى ولدين توأم

اللهم لك الحمد كما ينبغى لجلال وجهك وعظيم سلطانك على رزقه ومنه عليا بولدين توأم بعد 4 سنين زواج..
انا اول سنتين كانت اى واحدة تقولى الدكتور الفلانى ولا الدكتورة الفلانية اجرى عليهم وصرفت فلوس بالالاف..ومش عايزة احكيلكم على زياراتى اللى كلها كانت محبطة للغاية وكلهم قالولى سلمى امرك لله لان موانع الحمل عندى كانت لا حصر لها وبدأت ايأس فعلا وبعدين وقفت مع نفسى فى يوم وقلت هى الدكتورة ولا الدكتور اللى حايخلونى اخلف ولاربنا؟؟ لو ربنا اراد مافيش اى حاجة فى الدنيا حاتمنع ولو ربنا مش رايد لو روحت لدكاترة العالم مش حاخلف (طبعا انا مش بقولك ماتروحيش للطبيب بالعكس تداوى وخدى بالاسباب ولكن خليكي على يقين ان الدكتور اللى كشفه بـ 10ج زى الدكتور اللى كشفه بـ 200ج انما هم اسباب فقط وربنا اللى حايرزقك الحمل مش الدكتور)
يبقى اولا لازم تبقى على يقين حقيقي ان قدرة الله وارادته فوق كل شئ وربنا هو اللى حايخليكي تخلفى مش الدكتور ولا الأدوية والوصفات كل ده أسباب فقط..


ثانيا لزمت قيام الليل ومافيش سجدة اسجدها الا كنت ادعى واقول يارب ارزقنى بولدين توأم يتعجب الخلق من جمال خَلْقِهِم وَخُلُقِهم يارب ان كانا خيرا لى ارزقنى اياهما وان كانا شرا لى فاصرفه عنى واصرفنى عنه وقدر لى الخير حيث كان وكنت ادعى بأدعية القرآن ربِ لا تذرني فرداً وأنت خير الوارثين - رب هب لي من لدنك ذرية طيبة إنك سميع الدعاء
ثالثا من لــزم الاستغفار جــعل الله لـه من كل هم فـرجا، ومن كل ضيق مخرجا، ورزقه من حيث لا يحتسب - وقل أستغفروا ربكم إنه كان غفارا يرسل السماء عليكم مدرارا ويمددكم بأموال وبنين ويجعل لكم جناتٍ ويجعل لكم أنهارا وفعلا لزمت الإستغفار ليل نهار استغفر الله بكذا صيغة لكن المهم تستغفري بنيه الله يفرج همك ويرزقك بالولد الصالح



رابعا إعرفى ان التبويض بيحصل فى تانى اسبوع من نزول البيريود..يعنى لو البيريود نزلت يوم السبت مثلا يبقى التوبيض بيبدأ من يوم السبت اللى بعده لحد الاربع او الخميس اللى بعده ولو عدتيهم من أول يوم لنزول البيريود أفضل أيام التلقيح بتكون فى اليوم الـ 11 لحد اليوم الـ 18 تقريبا



خامسا فى الاسبوع التانى بعد اسبوع البيريود كنت بتم الجماع يوم ويوم وكنت بعمل غسولبالبيكاربونات الصوديوم قبل الجماع بثلث ساعة او نص ساعة علشان تخلى وسيط الرحم قلوى وده بيجذب الحيوانات المنوية الذكوريه ومتكتريش هى معلقه واحده صغيرة على ليتر ميه دافيه



سادسا شرب فنجان قهوة للرجل يخلي قدرته على انجاب ولد اكبر وفعلا جوزى كان متجوز قبل منى وخلفته كلها صبيان وفعلا بيشرب فنجان قهوة يوميا



سابعا الخلطة دى رهيبة بجد حتى حاتحسى بالفرق فى الأداء
وهى كيلو عسل على 10 جرام من كل الحاجات دى
قرفه مطحونة - زنجبيل مطحون - حبوب اللقاح مطحونة - بذور الفجل مطحون - بذور الجرير مطحون ودى وصفه دكتور عادل عبد العال لزيادة المنى والخصوبة للرجال
بياخد منها معلقة كبيرة كل يوم


ثامنا حاقولك على حاجة بس مخجلة شوية سورى معلش..المهم ضرورى جدا لحظة القذف تكونى انتى اللى تحت أو تكونى فى وضع السجود لأن الحيوانات المنوية بتنجذب مع الجاذبية الارضيه وبعد القذف تنامى على ضهرك وتحاولى ترفعى مستوى رجلك ووسطك بمخدة مثلا وخليكي كده شوية ثلث ساعة مثلا
تاسعا انا علشان كنت بتمنى من ربنا توأم كنت باخد منشطات من نفسى مش بأمر الدكاترة بس طبعا منصحكيش تعملى كده علشان ممكن ماتكونيش محتاجة منشطات ولو اخدتيها حاتكبر البويضة اوى وماتبقاش صالحة للتلقيح فلازم تسألى الدكتور فى الموضوع ده
وأخيرا الصبر الصبر الصبر وعدم الترقب اعملى اللى عليكي وسيبى الامور تمشى على طبيعتها واستمتعى بحياتك انتى وجوزك وخليكي على يقين انتى وجوزك ان لما يحين معاد الحمل حاتحملى بدون اى تدخل من حد انا فضلت اتعالج سنتين وحملت بعد 4 سنين ويوم ماحملت كنت مسافرة وعندى فرح ولابسة كعب 9 سم وعملت مجهود خرافى وكان الاسانسير بيتعمله صيانة وانا ساكنة فى الـ 11..!!
فامعلش اصبرى وخليكي على يقين تماما ان كل شئ بأمر الله بس تحرى أوقات الدعاء انا كنت بستنى رمضان من السنة للسنة وكنت بنام وارجع اصحى الساعة 2 بليل وافضل اصلى وادعى للفجر وكنت من بعد صلاة الجمعة افضل ادعى للعصر وكان فى دعاء مش فاكراه حاليا اللى بيقوله لما يتقلب بليل وهو نايم ويطلب من الله شئ لا يرد ابدا والله كنت بطلب ولدين توأم حتى لما كنت اتقلب وانا نايمة بس نصيحة لوجه الله بلاش تدعى على نفسك بتوأم اصلهم ورطة ومعاناه والله العظيم ههههههههه بس لله الحمد استجاب لى كما طلبت تماما انا حتى لما حملت قلت لجزى أنا حامل فى توأم ومش شبه بعض قالى هو انتى شيخة قلتله حاتشوف للدرجة دى كنت على ثقه ان الله استجاب لدعائي كما دعيت تماما وربنا يرزقكم جميعا ياحبايبى ولا يحرم مشتاق ابدا اللهم امين


منقوول للفايده