السلام عليكم و رحمة الله وبركاته
حبيباتي جبتلكم نصايح من تجاربي طبعآ فديتني والله هههه..
المهم كلكم سنعات وماتقصرون بس حبيت نتبادل الخبرات..
إذا دقت عليكي وحده العصر وقالت والله أمي أو أختي عندي وحابين نجي نسلم عليك بعد المغرب أو بعد ساعتين ماتقدرين تدورين عذر! وإن تعذرتي قالوا من الرباده والكسل يمكن بيتها حالته حاله أكيد بتقولين حياكم الله وبتقفلين وتفكرين من وين تبدءين مافي وقت!!؟
(بعد هالسالفه بقولك عن بعض أفكار)
#صالة الضيوف ودورة المياه والمجلس:
بعد ماتخلصين تنظيف أكيد آخر شي مسح أو غسل السيراميك عندي فكره لنظافة السيراميك بعد ماتغسلينه وهو لسى مبلول خذي منشفه نظيفه مبلله شي بسيط وخذي ملطف الملابس داوني الوردي عبي ربع الغطاء هالكميه تكفي ورشي شويه في الصاله والمدخل وغرفة الحريم وحطي المنشفه بالمساحه وأمسحي كل السيراميك تعالي شمي أحلى ريحه وشوفي لمعة السيراميك جنان..
شغلي الفواحه وياليت تكون بريحة الورد أو الفواكه علشانها مناسبه لريحة الملطف خلصتي من مكان اﻷستقبال روحي المطبخ..
#المطبخ تجهيز الضيافه:
إذا عندك أحد يجيبلك ضيافه من السوق أريح إذا مافي عندي أفكار لبعض التقديمات وماتاخذ وقت ¶سخني مويه في برادي كبير علشان يكفي للقهوه والشاهي حطيه على النار خذي صينيه كبيره حطي فناجين القهوه والشاهي بعد ماتنظفيها حطي قهوتك على النار تطبخ وسوي الشاهي وعلى الترمس، القهوه تاخذ وقت بنفس الوقت خلي عندك دايم خليط الكيك من كوير أو العلالي لانه ماياخذ وقت أخلطيه وعلى ورق في صينية الكب كيك وعلى الفرن خذي حبة قشطه ودريم ويب أخلطيها وحطيها بالثلاجه خذي صحون صغار حطي فيها التمر وإذا عندك كيك أو بسكوت كمان حطيه بصحون خذي خبز صامولي أو توست قطعه دوائر وحطيه في صينيه وحطي عليه صلصة بيتزا أو سوي كشنه سريعه وحطي عليها ورشيه بجبن وعلى الفرن شوي يتحمص وتذوب الجبنه طلعيها صبي قهوتك خذي الصينيه الفناجين والقهوه والشاهي وعلى المجلس خذي البيتزا السريعه حطيها بصحن التقديم وغطيه بنايلون إذا عندك مكسرات حطيها بصحون وكذا تقديمات الموالح جاهزه وإذا جهز الكيك طلعيه يبرد وروحي جهزي نفسك وأرجعي على الكب كيك بالملعقه أدهنيها بدريم ويب وبعدين شكليها شي رشيها كاكاو وشي بالحلاوه الملونه وشي بهرشي فراوله او شوكلاته وعلى صحن التقديم بكون شكلها روعه..
وبتكون تقديماتك محضره على طاولة المطبخ بجهد بسيط..
#أفكار لتقديمات وقت الزنقه:
*خلي عندك توست بالثلاجه وصلصه البيتزا ووجبن البيتزا علشان إذا أحد بيجيك فجأه تطلعينه وتقصين التوست دوائر أو مثلثات وتجهزين أطعم بيتزا..
*إذا بتسوي ورق عنب كثري الكميه ﻷنها راح تنفعك بعد مايجهز ورق العنب ويبرد خذي علبتين أو ثلاث البلاستيك لحفظ الطعام وحطي فيها عشرين حبه أو اكثر على حسب ضيوفك (إللي دايم يزنقوك ههه) وفرزنيها بس تجيك ضيفه طلعي العلبه وسخني ورق العنب وعلى ورق الكب كيك حطي في كل واحده حبة ورق عنب وشريحة ليمون وشريحة خيار وعلى صحن التقديم.
*خليط الكيك شكلي أنواع وخليها بدولاب سريعه بتجهيزها ولذيذه.
*تعلمي وصفه سريعه للبسبوسه بحيث تتقنيها وقت الحاجه معروف البسبوسه ماتاخذ وقت.
*إذا سويتي سمبوسه فرزني كم حبه منها وقت الحاجه تطلعيها تفك شويه وتقليها (نفس شي مع الكبه المثلجه إللي تاخذيها من السوق)
*وقت فراغك خذي تمر فكيه طلعي النوى وأحشيه لوز ورشيه بسمسم أو أحشيه ببسكوت مطحون أخلطيه مع طحينه سايله أو أخلطيه مع زبدة الفول السوداني جربيهاا كلها طعمه مرره رصيها بصحن وغلفيها وعلى الثلاجه ماتخرب.
*كل مانظفتي بيتك ومسحتي السيراميك بخري قبل يجف السيراميك علشان تثبت الريحه.
*إذا مسحتي الطاولات حطي كم نقطه من المطهر الموف او الوردي من كلوركس وإمسحي تنفع لكل الطاولات البيت والمطبخ والمغاسل يصير بيتك ريحته نظافه.
&&أخواتي هذي أفكار بسيطه وأول موضوع لي بهالقسم يمكن في منكم يشوفها عاديه بس مبتدئه زيي بتشوفها مفيده ويارب تستفيدون منها وتدعون لي ..
احتياج @ahtyag_1
محررة فضية
يلزم عليك تسجيل الدخول أولًا لكتابة تعليق.
لارين جدة
•
أفكارك حلوة يعطيك العافية وجاري التنفيذ
مشكوره يعطيك العافيه واللي بيتها مفروش وعندها اطفال بيكون مكركب ايش تسوي؟
عااااااد ضيوف الايام هذي مايقبلون العذر يانجيك غصبا او نعلم امك دايم تصير لي ههههههههه
عااااااد ضيوف الايام هذي مايقبلون العذر يانجيك غصبا او نعلم امك دايم تصير لي ههههههههه
الصفحة الأخيرة