تعالي بقولك كلمتين....

بنات هي كلمتين وحابه تسمعوني من خلال شي جربته وعشته

يابنات الصلاه كل وحده تشوف صلاتها هي وزوجها 
هل صلاتك انتي وياه بخشووع  وفي وقتها 
والا تنامون ومتى ماصحيتو صليتو الصلاوات جمع 

عمرك زعلتي على زوجك لانه ترك صلاه و الا رفض يروح المسجد يصلي مع الجماعه 

عمرك بكيتي لانك فوتي صلاه عن وقتها

من اليوم  خلي نيتك المحافظه على الصلاه  ذكري نفسك بها  وذكري زوجك  احرصي تجهزين ملابسه مكويه ونظيفه  قولي هاذي عشان الصلاه  جهزت لك لبسك  وعطريه  خليه يحب الصلاه  تعالي باسلوب حلوو  
ذكري نفسك  وذكريه باللي يترك الصلاه متعمد  وذكريه بفضل الصلاه بالمسجد   ذكريه انها تواصل مع العزيز الجبار  اللي قادر يجعل حياتنا  سعاده  ويرزقنا من واسع فضله 


كل شي نركض وراه بالدنيا بنروح ونخليه 
وبناخذ معانا بس عملنا اللي سويناه

ذكري نفسك وزوجك باذكار الصباح والمساء 
قبل يطلع من البيت  قولي لاتنسى يالغالي اذكارك  وذكريه بدعاء الخروج من المنزل
وانتي معاه بالسياره قولي دعاء ركوب الدابه بصوت مسموع  وبابتسامه  قولي الله يحفظنا 

اذا جلستي على الاكل قبل  توزعين الصحون  قولي بسسسم الله  وخلي عيالك يرددون وراك  والله متعه واجر 
واللي يخلص اكله  خليه يقول الحمدلله 


اذا في بيتك درج عودي نفسك وعيالك وزوجك اذا طلعتو منه قولو  الله اكببر  وخليها بروح مرحه  وتنافسو عليها  من يذكر الثاني  مع جري بسيط  منها رياضه ومنها اجر 
واذا نزلتي من الدرج قولي سبحان الله 


حاولي تقرين على اطفالك قبل النوم الاذكار  وخليهم يرددون وراك  صدقيني يكسبهم هدوء وراحه بال وسكينه

وانتي انصحك تحفظين سوره الملك وقبل النوم ردديها بصوت واطي بس مسموع  زوجك  بيتاثر فيك  ويوم من الايام راح يقراها معاك ويحافظ عليها  بعد
 ولاتنسين باقي اذكار النوم 
سوره الملك  اذا ماتحفظيها حمليها بجوالك واقريها
تعرفين وش فضلها   تنجي صاحبها من عذاب القبر 

القبر اللي محد يدري متى يكون فيه
اليوم بكره بعد سنه بعد عشر 

تغسلين صحوون بدال ماتفكرين في اشياء ضايقتك وتقهرين نفسك والا تفكرين في فلانه وفلان  استغفري سبحي هللي احمدي الله على جميييع نعمه
 تاملوها فقط  سمع الله لمن حممممده 
بتحسين براحه  وتكونين استغليتي وقت سكوتك في شي ينفعك


عودي نفسك وزوجك واطفالك على ذكر الله في كل وقت وكل حيين 

اهدي زوجك  او ابنك الكبير  شريط للسياره عن فضل الصلاه  عن الجنه  عن ترك المعاصي  اختاري شييخ اسلوبه حلووو  وقريب لقلب زوجك  او ابنك  عشان يستفيد من كلامه  ولايمل 

اذا في السياره اشرطه اغاني بدليها بالشيلات اللي بدون موسيقى  اقرب لقلب الرجال 
وانتي ارمي كم كلمه بتعلق في راس زوجك ويفكر فيها 
قولي 
هالاغاني تروح لذتها وتبقى حسرتها 
دايم كرريها  مع الوقت تعلق في عقله الباطن ويصير فعلا مايطيق الاغاني 


شوفي كيف تتغير حياتك  وتصبح حياتك سعاده
فاذكروني اذكركم

وصدقيني اي غلط في حياتك راح يتصلح بقربك من الله 
واي امر يستصعب عليك  مالك غير رب السماوات والارض قادر يفرجها عليك ويفرحك


ادري والله فيكم الخير الكثثثير
بس من باب وذكر فان الذكرى تنفع المؤمنين

الله يسعدكم ويحفظكم يارب