جبت لكم سندوتشات والفكره بطعم العجينه عليها طعم امممممم وان شالله بتضبط معاك من اول مره وماراح تتعبك ابد وربي يوم شفتها عند عمتي ماصدقت انها هي الي مسويه العجينة احسبها جاهزة وهي بس الي حشتها الين حلفت لي ههههه
أدري طولت عليكم وهذي المقادير والطريقة:
تضعين بالخلاط:
- بيضتين
- بصلة متوسطة الحجم او بصلتين (اذا كانت الوحده بحجم البيضة)
- 4/3 كوب حليب (اما بودرة وتضيفين عليه ماء او حليب المراعي او اي شركة ثانية)
- م.ص. خميرة فورية
- م.ص. بيكنج بودر
- ملعقة طعام ممسوحة كركم مطحون
- م. ملح
وبعد ماتنخلط تحطينها بزبديه وتضيفين على الخلطة (كوبين طحين بر) وتعجنينها بيدك الى ان تتكون عجينة وتتماسك وتتركينها ساعة لتتخمر (ممكن تزيدين كمية الطحين حتى تتماسك العجينة)
بعد كذا افرديها وقطعيها دوائر (الافضل تقطعينها بصحن) ويكون قطر الدائرة تقريبا 10 سم
اذا قطعتي العجينه دوائر اقليها بالزيت وضروررررري يكون الزيت حار حار جدا عشان تنتفخ وتراها ماتشرب زيت ابد لانها تنتفخ مره ومايبقى عليها زيت وقلبيها بسرعة عشان تتحمر من كل الجهات مع ملاحظة انه اذا بغيتي العجينة تنتفخ بالزيت صبي بالملعقة عليها زيت باستمرار وانت تقلينها ماادري فهمتوني والا لا
وبعد كذا خذي كل قطعه واقطعيها بالنصف
وهذي صورتها بعد ماقليتها وقطعتها نصفين ..
واحشيها الحشوه هذي:
- امسحي جهات الخبزه من الداخل بجبن سائل او مايونيز للي يحبونه
- حشوة دجاج عاديه مثل حشوة الفطائر
- بطاطس مقلي مقطع اصابع صغيرة
- مخلل خيار مقطع اصابع صغيرة
- فلفل اخضر مقطع شرائح
- خس شرائح صغيرة
- جبن شرائح اقطعيها بالنصف
(واذا بغيتي اي حشوه تحبينها بس السر بطعم الخبز الي سويتيه بصراحه يجنننن) مع ملاحظه انه اذا بقى من العجينة عادي حطيها بالثلاجة وسويها باليوم الثاني ماراح تخرب..
وهذي صورتها بعد الحشوة ان شالله تعجبكم ..
وبالعافيه يارب...
ومثل ماقلت لكم قبل ارجع واقول ،،، الي تبي تلطش وتنقل كيفها تاخذ راحتها،الصور ماكتبت عليها اسمي والي تبي تنسبه لنفسها بعد كيفها عادي وسعوا صدوركم بس خخخخ ماراح اقعد اهاوش واطارد وانتي ليش اخذتي موضوعي وانتي ليش ماقلتي اسمي وكتبتي منقول ومن هالحكي الي ماله داعي ...
<< شعارها بالحياه الدنيا زائلة :)
أنا أسويها بس المقادير فيها إختلاف بسيط ،،بس طريقة تقديمها بأنك تقسمينها قسمين هذا الغريب فيها أنا طريقتي أفتحها على جنب وحشيهاوبس . تصدقين فكرت أسويها بكره لأني بروح لأهلي إنشاء الله .......