السلام عليكم
صباح الورد يااا بنات
حبيباتي من باب عدم كتمان العلم ونفع الغير حبيت انفعكم بهالموضوع وبالاخص لحديثات الزواج والاخوات الي مو عارفات كيف يدخلون لقلب اهل الزوج وكيف يكسبونهم ..
بناااات ارجوكم لا ارحب بالردود المزعجه او الجارحه او المحبطه او الي تحمل السب والشتائم لاهل الزوج ,, لان في الاخير هم عطوج جوهره وهي ولدهم مع غظ النظر عن عيوبه ومساوئه
اول شي حبيباتي اريد ان اهمس بهمسه :
حلو انك تعاملين اهل زوجك بما يرضي الله وحلو انك تكونين مثل البنت لهم ولكن نتيجه خبرتي تأكدت وتيقت ان اهل الزوج مستحيل يكونون محل الاهل الا في حالات نادره يعني لاتتوقعين ان اهل زوجك ممكن في يوم من الايام تكونين اغلى من ولدهم على قلبهم في الاخير هذا ولدهم وانتي الغريبه حتى لو كنت طيبه وفي نفس الوقت الاهل محد يعوضهم اهلج الوحيدين الي يقبلونج في مرضج وتعبج ومزاجج السئ وكل عيوبج وحد غيرهم ...
نبدأ ونقول بسم الله الرحمن الرحيم
اول شي خلونا نتكلم عن الهديه
طبعا تعرفون مفعول الهديه وما يحتاج اقول شنو مفعولها وبالاخص ان رسولنا الكريم صلى الله عليه واله وصى عليها , انا وحده من الناس احب الهديه على قولتهم انا غنيه واحب الهديه , المهم حاولي تتقربين لام زوجج بالهدايا بس بدون مبالغه يعني حلو ان كل عيد تشترين لها هديه حلوه , حلو انج تهدينها بين الفتره والثانيه ترا هذي ام زوجج وحسبه امج , حتى لوكانت ما تهدي ولا تبادر كوني انت احسن منها في ميزان حسناتج وزوجج راح يشوف طيبج وكرمج وانتي راح تكسبينها ...
الهدايا تقربج جدا للاطفال واذا كسبتي الاطفال كسبتي امهاتهم , حاولي تهدين عيال اخوات زوجج او اخوانه بس في حدود طاقتج وميزانتج يعني لاتكلفين روحج مالا طاقه لك به ..
ممكن بعضنا يتجاهل الهديه وينسى مفعولها ... لكن ترا مفعولها سحري ...
المبادره
جميل ان تكونين راعيه مبادره لاتنتظرين شكر ولا ثناء الاجر والثواب كافي جدا , مو على انج رسميه واتكيت تجلسين مثل الصنم شيلي وحطي وصيري سنعه , بصراحه هالشي حتى لو كان شاق على نفسج بس يرسم لج صوره حلوه , حلو ان تدخلين كل مره بطبق من عمل يدج واذا ما تقدرين كيك من اي مخبز او حلاوه المهم ما تدخلين ويدج فاضيه , في اشياء على الرغم من بساطتها الا انها تسبب السعاده , يعني ساعات يصير خاطري اودي لام زوجي شغلات بسيطه مثلا زعفران شريت منه وعجبني , او شغله شريتها لشقتي وريحتني رخيصه وغير مكلفه بس من باب المجامله والذوق ...
المبادره تكون في حدود المعقول وما تزيد عن حدها لان لو زودتي المبادره ممكن تصير ميانه شديده وبالتالي عواقب وخيمه ..
الميانه
خلي حواجز وحدود في كل شي في كلامج في غشمرتج في مزاحج يعني لا تتحاوزين حدودج عشان هم ما يتجاوزون حدودهم معاج , يعني لازم يكون في كلافه وميانه من بينكم واحترام , لو طاحت هالميانه وصرت على قولتنا كلوز او قريبه جدا من اخوات زوجج وتتراشقون بالعبارات البذيئه او الكلمات مثل حماره وكلبه كرمكم الله لا تلومونهم لو استخفو فيج ,, يعني كوني صديقتهم ولكن في نفس الوقت في حدود وحواجز لا تتجاوزينها... علميهم ان لو جاو بيتج لازم يتصلون وان انتي انسانه لج وعليج وعندج مشاغل والتزامات وما تصير الزياره الا باستئذان ..
الكلام الحلو
خلي كلامج سنع وحلو وذرب , مع ام زوجج وخواته ( ابشري , عمري , حبيبتي , تسلمين ,لاهنتي ) خلي لسانج حلو المثل يقول خل لسانك وكل الناس خلانك ويقولون بعد لسانك حصانك ان صنته صانك وان خنته خانك ياترى لو خليتي لسانك ينقط عسل راح يغلطون عليج ؟؟ ما اعتقد , اذا كان اللسان الحلو هو الي يخلي الزوج يتزوج على مرته بحثا عن بديله لسانها حلو وتعرف تقول كلام حلو فما بالج بالكلام الحلو مع اهل زوجج , الكلمه الطيبه صدقه , تصدقي بكلماتج الجميله وعباراتج السنعه ..
الصمت
اسمعي اكثر مما تتكلمين الانسان كثير الكلام كالكتاب المكشوف والمفتوح ماله سر ولا جاذبيه , حاولي تسمعين اكثر ولا تتكلمين الا بالكلام الي يفيد , وزني الكلمه قبل لا تقولينها هل راح تنفع او لا ,وفي نفس الوقت لا تكونين صامته جدا وممله ...
الغموض
كوني غامضه ولا تكونين صفحه مفتوحه وتقولين كل شئ يخصج الغموض مطلوب مع كل الناس العمل او الجيران او الزوج وكذلك اهل زوج , لا تتكلمين عن نفسج وبطولاتج وردود افعالج كثيرا ترا هالشي يخليج مكشوفه ومعروفه ومتوقعه في كل حركاتج ويفقدج بريقج
اهلج
مهما كان الخلاف مع اهلج ومهما كنت تكرهينهم ومهما كان هناك عيب فيهم وانتي مع اهل زوجج ممتازه علاقتهم لا تتكلمين عن اهلج بسوء عزيهم وحبيهم ومثلي المحبه والغلا لهم لو كان بينكم شي بس لا تتكلمين عنهم تراج بهالطريقه تهينين نفسج وتبيعينها برخيص لان الي مافيه خير لاهله مافيه خير للناس ..
عموما حبيباتي هذا الي حضرني ببالي الحين وهالكلام خلاصه 6 سنوات مع اهل زوجي وانا عايشه معاهم بشقه بنفس البيت , اول ايامي كانت علاقتي فيها شوي توتر بالاخص مع اخوات زوجي لكن الحمدلله الان كل الامور تمام قولو ماشاء الله لا حول ولا قوه الا بالله
اذا ذكرت شي برجع لكم ان شاء الله
والي عندها نقطه تضيفها وتحطها للفائده
دنيا ملونه @dnya_mlonh
محررة فضية
تعانين مع اهل زوجك؟؟كيفيه التعامل مع اهله من الالف الى الياء , نحو حياه اسريه سعيده
11
1K
يلزم عليك تسجيل الدخول أولًا لكتابة تعليق.
"حراير"
•
الله يجزاك خير كلامك درر .
الصفحة الأخيرة