تعبانة ولازم أفضفض.. في حدا يسمعني؟؟

مساء الخير..

أنا وحدة من هالناس عمري 30 سنة، متزوجة وبعد ثلاث شهور بكمل الخمس سنوات وعندي ولد بنت الله يخليهم..

مشكلتي وعقدة حياتي زوجي تعبت وبطلت عارفة كيف أتعامل معه.. مشاكل زوجي كتيرة وأغلبها سببها واحد، هي قلة خبرته في هالدنيا وقلة حيلته.. لما اتزوجته كان يشتغل في مشروع ملك لعائلته، وضل يشغتل في لحد قبل سنة ونص لحد ما صارت مشاكل بينه وين أعمامه على المشروع وطلع منه وطبعا بسبب شغله اللي زي الزفت.. بعدها أخد قرض من البنك وما كان عارف شو يسوي فيه، وأخيراً شارك واحد كبير بالعمر وكحيان وفتحوا مشروع وأنا أخدت قرض من شغلي وأعطتيه إياه علشان يكمل على المشروع الجديد... وطبعاً فشل المشروع فشل ذريع بسبب إدارته اللي كلها غلط بغلط، كان الكل ينصحه وبقول لازم تعمل هيك وهيك وأنا أقوله اللي بتسويه غلط والمحل مش ماشي كويس وطريقتك غلط، وأبداً ما كان يفهم ودائما كالعادة بعتبر حاله هو الصح وما برد على حدا لحد ما اتكوم عليه دين وبطل قادر يكمل وبعد ثمان شهور سكر المحل وباع كل شي وطبعا يا دوب بس كفى سداد الدين أما قرض البنك والقرض اللي أخدته من شغلي ما اتسددوا ولسة بندفع بأقساطهم.

ولسة كمان باقي ثمن الماكينات اللي باعها ما قبضها كامل ثمنها، واضطريت أعطيته فلوسي اللي قبضتها بدل إجازة الأمومة وهي عبارة عن راتب ثلاث شهور ونص، على إنه يسدد فيهم لحد ما يقبض باقي ثمن الماكينات ولسة ما قبض... وطبعا هلا ما عنا أي دخل غير راتبي وعنا طفلين.. أصلا كل الوقت وأنا راتبي هو اللي بصرف منه على البيت وهو يا دوب أشياء بسيطة.

كله هذا كوم وعنجيهته ولسانه الطويل وسلوكه اللي زي الزفت معي كوم.. والله يا بنات أنا مش مقصرة في بيتي ولا أولادي من مرة، وكل قرض يدخلني بصرفه على البيت وأهلي بساعدوني وهو مش متحمل أي مسؤولية يا دوب مساعدة..

كل وقته مقضيه على الألعاب على الكمبيوتر لحد الفجر وعلى الأرجيلة، بنام وجه الصببح وما بصحى قبل الظهر.. هذا لسانه زفر في البيت، بتلفظ علي ألفاظ سيئة وبنتي صارت تعيد من وراه.

وكل ما أقله ما بصير اتضلك قاعد بس على الكمبيوتر والأرجيلة على النوم، اصحى بدري وروح شوف رزقت أولادك، بضل يقلي ليش انتي شو ناقصك ولا بس بدي تحكي، أنا مش ساكت وعارف شو بسوي وبنتهي النقاش بمشكلة كبيرة.. والله يا بنات صرت أستحي لما بيجي عندي حدا الظهر وبلاقيه لسة نايم لا شغلة ولا مشغلة، وأنا قدام أهلي ما بحكي اشي بس همة شايفين ومستائيين منه كتير بس ساكتين ومقهورين، أزواج خواتي وأخوي رجال ما في متلهم، من النجمة بصحوا وبتعبوا على رزقت ولادهم، وكلهم ما شاء الله قايممين ببيتوتهم وقد حالهم، إلا اللي عندي الله يساعدني عليه.

ومن يومين صارت مشكلة بيني وبينه على الأرجيلة، لإنه بسويها في البيت والريحة مصيبة على الأولاد، قلتله حرام عليك أولادك هذا غير التنظيف اللي من وراها، قال أنا ما بستغني عنها وأنا بسكر الباب على حالي، ومني كلمة ومني كلمة قمت وكسرتها وولعت بيني وبينه ولحد الآن ما بنحكي مع بعض.

أنا ما بقول إنه شيطان، هو قلبه طيب وبحب أولاده وحنون .. بس حياته كلها مخربطة ومتعبة وما في استقرار بعيشتنا، وقفت جنبه كتير وطلعته من مليون مصيبة وساعدته ومش مقصرة معه وكل هذا ما ببين فيه ولا حمدا ولا شكرا ولا بفكر يوم يقلي الله يخلف عليكي وقفتي جنبي، بالعكس معتبرني إني أنا مبذرة وهمي بس الفلوس، وإنه أهلي بلعبوا بعقلي ومخربين حياتنا..

معلش كلامي مخربط وفي كتير أشياء جواتي مش قادرة أحكيها وكتير أشياء صارت وبتصير ومش عارفة شو أعمل..

كل وحدة بتتمنى رجل يحميها ويخاف عليها ويحترمها ويقوم فيها وفي أولادها، ويعرف يربي ولاده كويس وهو عكس كل هالصفات وفوقهم البخل واللسان الطويل ومدة والإيد.

تعبت من الصراخ والمشاكل كل يوم.. يا ريت يرجع فيه الزمن لورى وما عاد أتزوج من مرة..